Ngaba Uyakhumbula?
Ngaba uye wakuvuyela ukufunda iiMboniselo zakutshanje? Khawubone ukuba unokuyiphendula kusini na le mibuzo ilandelayo:
Sinokuwucima njani umlilo wolwimi olungalawulwayo?
Sifanele sihlole iintliziyo zethu. Kunokuba simkrokrele umzalwana, kufuneka sihlole izizathu zokuba simgxeke. Ngaba simgxeka kuba sifuna kubalasele thina? Ukwenjenjalo, kunokwenza ukuba iimeko zibe mbi ngakumbi.—8/15, iphepha 21.
UMthetho wayibonisa njani indlela uThixo awajonga ngayo amabhinqa?
KuSirayeli wamandulo, amabhinqa ayekhululekile yaye ayefundile. Ayephathwa ngembeko, yaye amalungelo awo ayehlonitshwa.—9/1, iphepha 5-7.
Kuza kwenzeka ntoni ngaphambi kokuba isiphelo sifike?
Baya kuthi, “Luxolo nonqabiseko!” Iintlanga ziya kuhlasela zize zitshabalalise iBhabhiloni Enkulu. Kuya kuhlaselwa abantu bakaThixo. Kuya kuqhambuka imfazwe yeArmagedon, kuze kulandele ukutshatyalaliswa kukaSathana needemon zakhe.—9/15, iphepha 4.
Ziziphi iindlela okusinceda ngayo ukungawazi umhla okanye ilixa lesiphelo?
Ukungazi kwethu ukuba isiphelo siza kufika nini kusivulela ithuba lokutyhila oko kusezintliziyweni zethu. Kusivulela ithuba lokuvuyisa intliziyo kaYehova. Kusikhuthaza ukuba siphile ubomi bokuzincama size sithembele ngokupheleleyo kuThixo nakwiLizwi lakhe. Ukongezelela, kuvulela ithuba lokuba iinzingo zale nkqubo zisicikide.—9/15, iphepha 24-25.
Sinokuyisebenzisa njani iGenesis 3:19 ukuze siqiqe nomntu okholelwa kwisihogo somlilo?
Le ndinyana ithi xa uAdam esifa wayeza kubuyela eluthulini, kungekhona kwisihogo somlilo.—10/1, iphepha 13.
Zimela bani ‘iinkwenkwezi ezisixhenxe’ ezisesandleni sasekunene sikaYesu ezikhankanywe kwiSityhilelo 1:16, 20?
Zimela abaveleli abathanjisiweyo yaye ukongezelela zimela bonke abaveleli abasemabandleni.—10/15, iphepha 14.
Intsapho inokuhlangabezana njani namatyala ayo?
Isibini esitshatileyo sifanele sizole size sithethe phandle ngamatyala aso. Kuya kusinceda ukuhlola indlela esiyisebenzisa ngayo imali yaso. Ngaba asinakongeza umvuzo waso okanye sinciphise iindleko zentsapho? Simele sigqibe ngendlela esinokuwahlawula ngayo amatyala aso, mhlawumbi sithethathethane nombolekisi wemali. Kodwa kufuneka izinto sizijonge ngendlela eziyiyo yaye imali ibe kwindawo yayo efanelekileyo. (1 Tim. 6:8)—11/1, iphepha 19-21.
UYesu wakubonisa njani ukuthobeka ekuthethwe ngako kuIsaya 50:4, 5?
Ezi ndinyana zithi lowo ‘unolwimi lwabafundileyo’ ‘akajikelanga kwicala elahlukileyo.’ UYesu wabonisa umoya wokuthobeka waza waphulaphula oko wayekufundiswa nguYise. Wayekulangazelela yaye ekulungele ukufunda kuYehova waza wafunda ngokwenene kumzekelo kaThixo wokubonakalisa ukuthobeka ngokuba nenceba kubantu abanesono.—11/15, iphepha 11.
Istampu senkumbulo sase-Estonia sayingqinela njani ingqibelelo yamaNgqina kaYehova?
Ngowama-2007 iPosi yelo Lizwe yakhupha istampu esibonisa ukubulala kukaStalin abantu abaninzi base-Estonia. Sasinenani elingu-382, elibhekisela kwinani lamaNgqina nabantwana abathathwa ngowe-1951 basiwa kwiinkampu eziphakathi eRashiya ukuze basetyenziswe ngebhaxa. —12/1, iphepha 27-28.