Unokulufumana Njani Uncedo Lokwazi IBhayibhile?

Masithi uyafika kweli lizwe, ubona abantu, inkcubeko yabo, ukutya nemali abayisebenzisayo, ibe zonke ezo zinto akuziqhelanga. Mhlawumbi usenokubhideka.

Kusenokuba njalo naxa uqala ukufunda iBhayibhile. Ufika kwilizwe lakudala ongalaziyo. Apho udibana nabantu ekuthiwa ngamaFilisti, inkcubeko ongayiqhelanga efana ‘nokukrazula izambatho,’ okanye ufunda ngokutya ekuthiwa yimana nemali ekuthiwa yidrarhma. (Eksodus 16:31; Yoshuwa 13:2; 2 Samuweli 3:31; Luka 15:9) Yonke le nto inokukubhida. Njengaxa ukwilizwe oqalayo ukuya kulo, akungethandi ukuncedwa ngumntu onokukucacisela ezi zinto?

UNCEDO KWIXA ELIDLULILEYO

Ukususela kwixesha lokubhalwa kwemibhalo engcwele kwiminyaka yoo-1500 ngaphambi kwexesha likaYesu, bekuncedwa abantu bayazi iBhayibhile. Ngokomzekelo, uMoses, inkokeli yokuqala yamaSirayeli, ‘waqala ukucacisa’ oko kwakubhaliwe.—Duteronomi 1:5.

Abafundisi abafanelekayo beZibhalo babesekho nasemva kweminyaka engaphezu kwamakhulu alishumi. Ngo-455 B.C.E., iqela elikhulu lamaYuda, kuquka abantwana abaninzi, lahlanganisana kwindawo kawonke-wonke kwisixeko saseYerusalem. Abafundisi beBhayibhile babelapho ‘befunda ngokuvakalayo encwadini engcwele.’ Benza okungaphezulu koko. Banceda abantu ‘bakuqonda oko kwakufundwa.’—Nehemiya 8:1-8.

Kwiminyaka engamakhulu amahlanu kamva, uYesu Kristu wenza umsebenzi ofanayo wokufundisa. Phofu ke, abantu babemazi engumfundisi. (Yohane 13:13) Wafundisa izihlwele zabantu, kwanomntu ngamnye. Ngesinye isihlandlo, xa wayenikela iNtshumayelo yaseNtabeni, “zathi khamnqa izihlwele yindlela yakhe yokufundisa.” (Mateyu 5:1, 2; 7:28) Ngentwasahlobo yango-33 C.E., uYesu wancokola nabafundi bakhe ngoxa babehamba endleleni yelali engaseYerusalem, “ebavulela ngokupheleleyo iZibhalo.”—Luka 24:13-15, 27, 32.

Nabafundi bakaYesu babengabafundisi beLizwi likaThixo. Ngesinye isihlandlo igosa laseTiyopiya lalifunda iSibhalo. Umfundi onguFilipu waya kulo, walibuza: “Uyakwazi na okunene oku ukufundayo?” Eli gosa lathi: “Ngokwenene, ndingakwenza njani oko, ngaphandle kokuba ndikhokelwe nguthile?” Ngoko uFilipu walicacisela intsingiselo yeso Sibhalo.—IZenzo 8:27-35.

UNCEDO LUYAFUMANEKA NANAMHLANJE

Njengabafundisi beBhayibhile bexesha elidluleyo, nanamhlanje amaNgqina kaYehova axakeke ngumsebenzi wokufundisa iBhayibhile kumazwe ayi-239. (Mateyu 28:19, 20) Veki nganye, anceda abantu abangaphezu kwamawaka alithoba ukuba bayazi iBhayibhile. Uninzi lwabo bantu lukhulele kwintsapho engengomaKristu. AmaNgqina abafundela mahala kumakhaya abo okanye kwenye indawo ekhethwe ngabo. Abanye bafundelwa ngefowuni okanye ngevidiyo kusetyenziswa ikhompyutha okanye iselfowuni.

Nceda udibane neNgqina likaYehova ukuze likuncede ufumane iinkcukacha ngendlela onokuyifundiswa ngayo iBhayibhile. Uya kufumanisa ukuba kunokuba ibe yincwadi ekunzima ukuyazi, iyincwadi ‘eyingenelo ekufundiseni, ekohlwayeni, ekulungelelaniseni izinto, ekuqeqesheleni ebulungiseni,’ ukuze ‘uwufanelekele uze uwuxhobele ngokupheleleyo wonke umsebenzi olungileyo.’—2 Timoti 3:16, 17.