“Ndaphiwa Eyona Nto Izodlula Zonke”

La ngamazwi awathethwa yintombazana eneminyaka eyi-13 xa yaphiwa inja. Ibhinqa elingusomashishini ophum’ izandla lathi esona sipho satshintsha ubomi balo yikhompyutha elayiphiwa ngutata walo lisekumabanga aphakamileyo. Umfana osandul’ ukutshata uthi esona sipho wasithanda ngaphezu kwazo zonke likhadi awalenzelwa ngumfazi wakhe xa babegqiba unyaka betshatile.

Qho ngonyaka, abantu abaninzi bachitha ixesha labo, besenza konke okusemandleni bekhangela “esona” sipho abanokusipha umhlobo okanye umntu abazalana naye ngosuku olukhethekiyo. Ibe abaninzi bangathanda kuthethwe kubo la mazwi asekuqaleni kweli nqaku. Wena? Ngaba ungathanda ukupha okanye ukuphiwa into oyithanda kakhulu?

Sonke siyayibawela loo nto, kuba ayivuyisi nje lo mntu uphiwayo kodwa nalowo uphayo. NeBhayibhile ithi: “Kunoyolo ngakumbi ukupha kunokwamkela.” (IZenzo 20:35) Eyona nto ivuyisayo kukubona indlela asithanda ngayo isipho sakho loo mntu umphayo.

Ungenza njani ukuze ukupha kuvuyise wena naloo mntu umphayo? Ukuba akukwazanga ukumpha eyona nto aza kuyithanda ngaphezu kwazo zonke awakha waziphiwa, yintoni ke onokuyenza ukuze asixabise isipho sakho?