Sebenza NoYehova Yonke Imihla

1. Ziziphi iindlela esinokusebenza ngazo noYehova?

UMDALI wayefuna ukuba abantu abafezekileyo basebenzisane naye ekwenzeni ukuthanda kwakhe. Ngoxa singafezekanga, abantu abangagungqiyo ekukhonzeni uYehova banokusebenza naye yonke imihla. Ngokomzekelo, ‘sisebenza noThixo’ xa sishumayela iindaba ezilungileyo zoBukumkani naxa sisenza abafundi. (1 Kor. 3:5-9) Khawucinge inyhweba esinayo yokuba phakathi kwabantu abasebenza noMdali wendalo yonke kumsebenzi wakhe obalulekileyo! Sekunjalo, ukushumayela nokwenza abafundi ayikokuphela kweendlela esinokusebenza ngazo noYehova. Kweli nqaku siza kuthetha ngezinye iindlela esinokusebenza naye ngazo. Sinokunceda iintsapho zethu namanye amaKristu, sibe nobuntu, sincedise kumsebenzi wentlangano okanye sandise inkonzo yethu engcwele.—Kol. 3:23.

2. Kutheni kungebobulumko ukuzithelekisa nabantu ngento onokuyenzela uYehova?

² Njengoko sifunda eli nqaku, ungazithelekisi nabantu ngento onokuyenzela uYehova. Kaloku abantu abafani ngeminyaka, impilo, iimeko zabo nobuchule abanabo. Umpostile uPawulos wathi: “Ngamnye makangqine oko ukuko umsebenzi wakhe, uya kwandula ke abe nesizathu sokugcoba ngaye siqu, kungekhona ngokuzithelekisa nomnye umntu.”—Gal. 6:4.

NCEDA INTSAPHO YAKHO NAMANYE AMAKRISTU

3. Kutheni kunokuthiwa wonke umntu okhathalele intsapho yakhe usebenzisa noThixo?

³ UYehova ulindele ukuba abakhonzi bakhe bazikhathalele iintsapho zabo. Ngokomzekelo, kusenokufuneka usebenze ukuze intsapho yakho ibe nezinto ezifunekayo. Abanye oomama bahlala emakhaya ukuze bahoye iintsana zabo. Abanye abantwana abadala kusenokufuneka bahoye abazali babo abagulayo. Le yimisebenzi ebalulekileyo. ILizwi LikaThixo lithi: “Ukuba nabani na akabalungiseleli abo bangabakhe, ngokukodwa amalungu endlu yakhe, ngokuqinisekileyo ulukhanyele ukholo yaye mbi ngaphezu kongakholwayo.” (1 Tim. 5:8) Ukuba wenza enye yezi zinto, usenokungakwazi ukuba nexesha obukade unalo lokwenza imisebenzi kaThixo. Mayingakutyhafisi ke loo nto. UYehova uvuya nyhani xa ukhathalela intsapho yakho.—1 Kor. 10:31.

4. Abazali banokwenza ntoni ukuze uBukumkani bube yeyona nto ibalulekileyo kubo, ibe loo nto inokubangela ntoni? (Jonga umfanekiso osekuqaleni.)

⁴ Abazali abangamaKristu basebenza noYehova xa befundisa abantwana babo ukuba bacinge ngokumsebenzela xa bekhulile. Abanye abazali abayenzileyo le nto baye babona oonyana neentombi zabo bekwinkonzo yexesha elizeleyo kude namakhaya abo. Abanye ngabathunywa bevangeli; abanye ngoovulindlela apho kufuneka abavakalisi abangakumbi; kanti abanye baseBheteli. Xa aba bantwana bekude namakhaya abo, abazali abasakwazi ukuchitha ixesha kunye nabo njengesiqhelo. Sekunjalo, abazali abathanda uYehova bayabakhuthaza ukuba bangemki kwizabelo zabo. Kutheni? Bavuyiswa kukuba ukuthanda uYehova yeyona nto ibalulekileyo kubantwana babo. (3 Yoh. 4) Mhlawumbi abanye baba bazali bafana noHana owathi ‘ubolekise’ ngonyana wakhe uSamuweli kuYehova. Bathi ukusebenza noYehova ngale ndlela yintsikelelo. Ayikho enye into abayifunayo ngaphandle kwale.—1 Sam. 1:28.

5. Unokubanceda njani abantu abasebandleni lakho? (Jonga umfanekiso osekuqaleni.)

⁵ Ukuba awuxakekanga ziingxaki zentsapho, ngaba ungakwazi ukuya kuncedisa amaKristu agulelwa ziintsapho zawo, ukunceda abantu abagulayo, abalupheleyo nabanye abadinga olunye uncedo? Kutheni ungakhangeli abantu abadinga uncedo ebandleni okulo? Mhlawumbi unokushiyeka nomzali owalupheleyo wodade ongumKristu ngoxa lo dade eyokwenza ezinye izinto. Okanye unokunceda amaKristu afuna ukusiwa ezintlanganisweni, ukuya evenkileni, ukwenza ezinye izinto nafuna ukuya kubona abantu bawo abagulayo esibhedlele. Xa usenza ezi zinto, kusenokwenzeka ukuba uYehova usebenzisa wena ekuphenduleni umthandazo womKristu.—Funda eyoku-1 kwabaseKorinte 10:24.

YIBA NOBUNTU

6. Kufuneka senze ntoni ukuze sibonise ukuba sinobuntu?

⁶ Abantu abasebenza noThixo baziwa ngokuba nobuntu. KwiZibhalo ZamaKristu ZesiGrike igama eliguqulelwe ngokuthi “ubuntu” lithetha “ukubuk’ iindwendwe.” (Heb. 13:2) ILizwi LikaThixo libalisa ngezinto ezisifundisa ukuba sibe nolo thando. (Gen. 18:1-5) Kufuneka sikhangele amathuba okusoloko sinceda abantu, enoba “bahlobene nathi elukholweni” okanye akunjalo.—Gal. 6:10.

7. Kutheni umele ucinge ngokuba nobubele kubakhonzi bakaYehova abakwinkonzo yexesha elizeleyo abazokusibona?

⁷ Ngaba sinokusebenza noThixo ngokuba nobubele kubakhonzi bakhe abakwinkonzo yexesha elizeleyo abazokusibona? (Funda eyesi-3 kaYohane 5, 8.) La idla ngokuba ngamathuba okuba “sikhuthazane elukholweni.” (Roma 1:11, 12) Khawuve le nto yenziwa nguOlaf esengumfana. Uthi ebandleni lakhe umveleli wesiphaluka ongatshatanga wayengafumani ndawo aza kuhlala kuyo. Wamcelela indawo kubazali bakhe ababengengomaNgqina. Bavuma kodwa bathi yena uza kulala esofeni. UOlaf akazange azisole ngokulala kwakhe esofeni. Uthi: “Kwakumnandi nyhani ngaloo veki. Qho xa sisitya isidlo sakusasa sasincokola ngezinto ezibangel’ umdla. Loo mzalwana wandinceda ndenza isigqibo sokukhonza uYehova ixesha elizeleyo.” Kwiminyaka eyi-40 edlulileyo uOlaf ebengumthunywa wevangeli kumazwe ahlukahlukeneyo.

8. Zeziphi izizathu esinazo zokuba nobubele nokuba ekuqaleni kubonakala ngathi abukhathalelwanga? Zekelisa.

⁸ Unokubabonisa ukuba uyabathanda abantu ongabaziyo ngeendlela ezininzi nokuba ekuqaleni kubonakala ngathi abaziboni izinto ozenzayo. Khawuve lo mzekelo. Omnye umvakalisi waseSpeyin waphawula ukuba ngoxa babefunda, isifundo sakhe sase-Ecuador, uYesica, siyakhala. Lo mvakalisi wasibuza ukuba kwenzeke ntoni. UYesica wathi ngaphambi kokuba beze eSpeyin wayesokola kangangokuba ngenye imini wayengenako nokutya. Ekuphela kwento awayenokuyinika intombi yakhe ngamanzi. Wazama ukuyilalisa, wabe kwangaxeshanye ethandaza. Kungekudala emva koko kwafika amaNgqina amabini, kodwa akazange awamkele. Wathatha imagazini awayemnika yona wayikrazula. Wathi: “Nicing’ ukuba umntanam uza kutya le nto?” Oodade bazama ukumthuthuzela kodwa akathuthuzeleka. Kamva aba dade bamshiyela ibhaskithi eyayinokutya emnyango. Intliziyo yakhe yaba buhlungu xa ecinga ngobubele babo kuba esithi akazange amhoye uThixo xa wayephendula umthandazo wakhe. Kodwa ngoku wayezimisele ukukhonza uYehova. Ububele awabenzelwa ngaba dade, baba nemiphumo emihle.—INtshu. 11:1, 6.

NCEDISA KWIMISEBENZI YENTLANGANO

9, 10. (a) Ngamaxesha okubhalwa kweBhayibhile, amavolontiya ayefuneka xa kutheni? (b) Namhlanje, abazalwana banokunceda njani ebandleni?

⁹ Kudala, kwaSirayeli kwakuye kufuneke amavolontiya. (Eks. 36:2; 1 Kron. 29:5; Neh. 11:2) Nanamhlanje maninzi amathuba onokunikela ngexesha lakho, izinto onazo nangobuchule bakho ukuze uncede abazalwana noodade. Uya kuvuya kakhulu uze ufumane iintsikelelo ezininzi ngokuzenza ufumaneke.

¹⁰ ILizwi LikaThixo likhuthaza amadoda asebandleni ukuba asebenze noYehova ngokuba zizicaka zolungiselelo okanye abadala. (1 Tim. 3:1, 8, 9; 1 Pet. 5:2, 3) Izicaka zolungiselelo nabadala banceda amanye amaKristu kwizinto azidingayo nakwizinto zonqulo. (IZe. 6:1-4) Ngaba abadala bakhe bakucele ukuba ube ngumlindi, ube sezincwadini, uncede entsimini, ekulungiseni iHolo YoBukumkani nakwezinye izinto? Abazalwana abenza le misebenzi baya kukuxelela indlela ekumnandi ngayo ukunceda amanye amaKristu.

11. Kwamnceda njani omnye udade ukuba nabahlobo kwizakhiwo awayesebenza kuzo?

¹¹ AmaKristu ancedisa xa kusakhiwa asoloko efumana abahlobo abatsha. Makhe sithethe ngoMargie, udade owasebenza ekwakhiweni kweeHolo ZoBukumkani kangangeminyaka eyi-18. Kuyo yonke le minyaka, ebesoloko esiba nabahlobo abangoodade abasebatsha ukuze abaqeqeshe. Uthi le ibiyeyona ndlela yokukhuthazana. (Roma 1:12) Ngamaxesha anzima, wayekhuthazwa ngaba bahlobo azenzele bona. Wena, ngaba ukhe uncedise elwakhiweni? Enoba unobuchule bokwakha okanye awunabo, ngaba ungancedisa?

12. Unokunceda njani xa abazalwana behlelwe yintlekele?

¹² Xa kwehle intlekele, abantu bakaThixo basebenza naye ngokunceda abazalwana. Ngokomzekelo, baye baxhase ngemali. (Yoh. 13:34, 35; IZe. 11:27-30) Eny’ indlela abanceda ngayo kukucoca nokulungisa izindlu ezimoshakeleyo. Udade wasePoland, uGabriela, wavuyiswa kukubona abazalwana abasuka kumabandla akufutshane beze kumnceda xa indlu yakhe yayidilizwe sisikhukula. Uthi: “Andifuni kuthetha ngezinto ezandilahlekelayo, kodwa ndiza kuthetha ngento endayifumanayo. Le nto indenza ndiqiniseke ukuba, ukuba kwibandla lamaKristu kuluncedo kwaye kuyavuyisa.” Abazalwana abaninzi abaye bancedwa emva kokuba behlelwe yintlekele bathetha into efanayo. Nabo basebenza noYehova ekuncedeni aba bazalwana bayavuya.—Funda iZenzo 20:35; eyesi-2 kwabaseKorinte 9:6, 7.

13. Ukunceda abanye abazalwana kuye kusincede njani siye simthanda uYehova? Zekelisa.

¹³ UStephanie nabanye abavakalisi bavuya nyhani xa babesebenza noThixo ekuncedeni amaNgqina awayebalekele eMerika. Banceda ekufuneni nasekulungiseni izindlu ababeza kuhlala kuzo aba bazalwana basuka kwiindawo ekwakusiliwa kuzo. Uthi: “Sayithanda nyhani indlela ababevuya nababeyixabisa ngayo indlela abazalwana ababonisa ngayo ukuba bayabathanda. Aba bazalwana babecinga ukuba sibancedile, kanti xa sithetha inyani, ngabo abanceda thina. Siye samthanda nyhani uYehova xa sibona indlela abathandana nabamanyene ngayo abazalwana, ukholo lwabo nokuthembela kwabo ngaye. Le nto yenze sayibulela kakhulu yonke into esiyifumana kwintlangano yakhe.”

UNOKUYANDISA NJANI INKONZO YAKHO?

14, 15. (a) Wathini uIsaya xa uYehova wayefuna umntu aza kumthuma? (b) Abavakalisi boBukumkani banokufana njani noIsaya?

¹⁴ Ungathanda ukusebenza noYehova ngaphezu kokuba usenza? Ungakuvuyela ukuya kukhonza apho intlangano yakhe ifuna abasebenzi abangakumbi? Akunyanzelekanga ukuba abakhonzi bakaThixo bayokumkhonza kwiindawo ezikude. Kodwa abanye abazalwana noodade bayakwazi ukwenjenjalo. Bafana nomprofeti uIsaya owathi: “Ndikho! Thuma mna” xa uYehova wayebuza, “ndothuma bani na, ngubani na owosiyela?” (Isa. 6:8) Ngaba nawe ungakwazi ukufana nalo mprofeti xa kufuneka uye kunceda apho kufuneka abasebenzi abangakumbi? Zeziphi ezinye iindlela onokunceda ngazo?

¹⁵ Xa wayethetha ngomsebenzi wokushumayela nokwenza abafundi uYesu wathi: “Isivuno sikhulu, kodwa abasebenzi bambalwa. Ngoko ke, bongozani iNkosi yesivuno ukuba ikhuphe abasebenzi baye esivunweni sayo.” (Mat. 9:37, 38) Ngaba ungakwazi ukuya kuba nguvulindlela kwintsimi efuna abavakalisi abangakumbi? Okanye ngaba unokunceda omnye umvakalisi enjenjalo? Abazalwana noodade abaninzi bathi eyona ndlela onokubonisa ngayo ukuba uyamthanda uThixo nabantu, kukuya kuba nguvulindlela kwintsimi efuna abavakalisi abangakumbi. Ngaba zikho ezinye iindlela ozicingayo onokuyandisa ngazo inkonzo yakho? Uya konwaba kakhulu.

16, 17. Zeziphi ezinye izinto onokuzenza xa ufuna ukumsebenzela ngakumbi uYehova?

¹⁶ Ngaba ungathanda ukuya kusebenza eBheteli okanye elwakhiweni, mhlawumbi okwethutyana okanye iintsuku ezithile evekini? Kusoloko kufuneka abavakalisi abanokuya kukhonza uYehova naphi na, baze benze nantoni na ekuthiwa mabayenze. Le nto isenokufuna baye kwindawo edinga uncedo oluthile, nangona benobuchule kwenye into. UYehova uyayithanda indlela abazincama ngayo abazalwana abazinikela ekukhonzeni apho kufuneka abavakalisi abangakumbi.—INdu. 110:3.

¹⁷ Ngaba uyafuna ukuqeqeshwa ukuze wenze imisebenzi engakumbi? Ukuba uyafuna, mhlawumbi unokufaka isicelo sokuya kwiSikolo Sabavangeli BoBukumkani. Esi sikolo siqeqesha abazalwana noodade abakwinkonzo yexesha elizeleyo ukuze intlangano kaYehova ibasebenzise nakwezinye izinto. Abo baya kwesi sikolo, kufuneka bazi ukuba banokuthunyelwa naphi na ukugqiba kwabo. Ngaba wena akunakuthanda ukuya kwesi sikolo ukuze ukwazi ukwenza eminye imisebenzi?—1 Kor. 9:23.

18. Kungakunceda njani ukusebenza noYehova yonke imihla?

¹⁸ Ekubeni singabantu bakaYehova, sizama ukunceda abantu yonke imihla. Loo nto ibonisa ukuba singamalungisa, sinobubele, sithanda abantu kwaye sibakhathalele. Le nto isenza sivuye size sibe noxolo. (Gal. 5:22, 23) Enoba zinjani iimeko zethu, siza konwaba ukuba sifana noYehova ngokuba nobubele size sisebenze naye.—IMize. 3:9, 10.