Yibani Ngcwele Kuyo Yonke Ihambo Yenu
1 Kanye njengangaphambili, ubungcwele buyinto uThixo ayifunayo kubakhonzi bakhe namhlanje. Ngaloo ndlela kukho imfuneko engxamisekileyo yokuba ngamnye wethu akuqonde ngokucacileyo kungekuphela nje oko bukuko ubungcwele koko nendlela obufanele buphawule ngayo ukunqula kwethu uYehova nesizathu sako. Ngenxa yoku, umxholo othi “Yibani Ngcwele Kuyo Yonke Ihambo Yenu” uya kuxutyushwa kucwangciso lwendibano yosuku ekhethekileyo yonyaka wenkonzo we-1991.—1 Pet. 1:15.
2 Ekubeni imigaqo nemithetho yobulungisa kaYehova ivela kuye njengoThixo Ongcwele, ukugqalwa kwethu singamalungisa esikunandiphayo kubangelwa ngokungqalileyo kukuba nolwalamano lobuqu nolusenyongweni kwethu naye. Ngenxa yoko, olu cwangciso luya kuphuhlisa iindlela eziliqela zokubonisa indlela esinokuluphucula ngayo ulwalamano lwethu noThixo. Ezi zibandakanya ukuthobela imilinganiselo yakhe engcwele, kwanoko kusenokugqalwa njengezinto ezincinane. (Luka 16:10) Siya kuncedwa ukuba sihlakulele uxabiso olunzulu ngakumbi ngeemfuneko zikaYehova ezingcwele kwaye siya kukhunjuzwa ngesizathu sokuba ezi zifanele ziphembelele konke ukucinga, isimo sengqondo neendlela zethu.
3 Iintetho ezimbini eziziintloko eziya kubalaseliswa yethi “Ukuzithoba Ekucocweni Ngokuqhubekayo” nethi “Imisebenzi Enenkqubela Yabantu Abangcwele BakaYehova.” Njengoko iziganeko zamihla le ezichwayitisayo ehlabathini zibethelela ezingqondweni zethu ukungxamiseka kwexesha lethu, ucwangciso lwendibano yosuku ekhethekileyo yonyaka omtsha wenkonzo luya kusishukumisela ukuba siqhubeke sikhangele kuYehova ukuba asikhokele size sifune ukumkholisa kakuhle ngokuziphatha ngobungcwele.—1 Pet. 1:14, 16.