Qhubeka Ufundisa Ungayeki
1 IBhayibhile isixelela ngokucacileyo ngohlobo lwentsimi ababeyisebenza abapostile nabafundi bokuqala abangamaKristu. Kungekudala emva kokufa kukaYesu, abasemagunyeni babalumkisa ukuba “bangabi sakhankanya nakanye, bangafundisi nokufundisa” ngoYesu. (IZe. 4:18) Ngoba? Esinye isizathu sasiyimpumelelo emangalisayo ababenayo. Abangamawaka babesiba ngamakholwa, njengoko IZenzo 4:4 zinale ngxelo: “Into eninzi yabo babelivile ilizwi, yakholwa; lathi inani lamadoda langa limawaka mahlanu.”
2 Ngenxa yokuba nathi siqhubeka sifundisa singayeki, abangamakhulu amawaka, ewe, abazizigidi baba ngamakholwa kulo mhla wethu. Ebudeni bukaOktobha sinelungelo lokuhambisa umrhumo kaVukani! noweMboniselo. Alithandabuzeki elokuba uVukani! uye wanendima ebalulekileyo ekwenzeni abantu baphaphele intswelo yabo yokomoya. Oku kuye kwakhokelela ekubeni abaninzi bonwabe, njengoko beye bafunda ukwenza ukuthanda kukaThixo.—Thelekisa uMateyu 5:3.
BAFIKELELE BONKE
3 Nakubeni sisenokuba sinentsimi esetyenzwa ngokufuthi, kuseyinto enokwenzeka ukuthetha nabathile abaye ababa nathuba lingako lokuva ngeendaba ezilungileyo. Kunokwenzeka njani oko? Kwintsimi engafikelelekiyo ngobulungiseleli bendlu ngendlu, kutheni ungakusebenzisi ngokunengenelo ukunikela ubungqina ngomnxeba? Okanye wenze umgudu okhethekileyo wokuthetha nendoda yendlu xa ukumsebenzi wokunikel’ ubungqina ngamarhatya okanye ngeempelaveki. Ngokugcina iingxelo ezichanileyo zendlu ngendlu, sinokukwazi ukuzingela amanye amalungu entsapho, njengomakhulu, umtshana okanye umzala ofundayo, okanye umlanyakazi osebenzayo ebudeni beveki. Umgudu owongezelelekileyo owenziwayo ekuthetheni nelungu ngalinye lentsapho unokuzisa imivuzo emihle.
4 Kukho iindlela ezininzi ezifanelekileyo zokufumana imirhumo ebudeni bale nyanga. Enye isenokuba kukukhuthaza izifundo zethu zeBhayibhile nabanye abantu abanomdla ukuba barhumele. Mhlawumbi esinye sezifundo zethu sele sirhumela elinye lala maphephancwadi. Kutheni ungasicebisi ukuba siwarhumele omabini? Iintsapho zisenokukhuthazwa ukuba zirhumelele lungu ngalinye lentsapho iMboniselo ukuze zibe nokulungiselala iSifundo seMboniselo. Elinye icebiso lingakukuqalisa imizila yamaphephancwadi uze ke unikele umrhumo kwabo babonakalisa umdla kakhulu. Kwakhona sifanele sizinikele ukuba sifundisise iBhayibhile nabo babonakalisa umdla wokwenene.
BANDISE UBULUNGISELELI BAKHO
5 Nangoku alikakushiyi kangako ixesha lokuba ufake isicelo senkonzo yobuvulindlela bobuncedani ngenyanga kaOktobha. Njengentsapho, ngaba niceba ukuba nesabelo kumsebenzi wobuvulindlela ebudeni beeholide zehlabathi zikaDisemba? Ngoku lixesha lokuqalisa ukucinga ngendlela eninokukwenza ngayo oku ngokuphumelelayo. Ukuba asingabo bonke entsatsheni abanokukwazi ukuba ngoovulindlela abangabancedani, ngaba ninokusebenzisana ukuze elinye ilungu lentsapho okanye angakumbi abe angakwenza oko? Ukuba aninako, ngaba ubuncinane kunokwenzeka ukuchitha ixesha elingakumbi kubulungiseleli ninikela iphephancwadi uVukani! neMboniselo?
6 Siyazixabisa iingenelo neentsikelelo zokomoya esiye sazifumana kuVukani! nakwiMboniselo. Siyazi ukuba nabantu abantliziyo zinyanisekileyo abakwintsimi yethu basaya kungenelwa ngokutyebileyo ekuwafundeni rhoqo la maphephancwadi. Ebudeni benyanga kaOktobha, masiqhubeke sifundisa ngezixhobo ezisebenzisekayo uYehova azenze zafumaneka kuthi. Ngokwenza oko, siya kuvuna intsikelelo kaYehova size nathi sizingqine siyintsikelelo kwabanye.—Gal. 6:9.