Ukunikela Iindaba Ezilungileyo
Ngokunikela Ubungqina Esitratweni
1 IMizekeliso 1:20 ithi: “Ubulumko bumemeza ngaphandle, buvakalisa izwi labo ezitratweni.” Loo mazwi ayinyaniso ngokukhethekileyo namhlanje njengoko abakhonzi bakaYehova beshumayela ngenzondelelo iindaba ezilungileyo zoBukumkani naphi na apho banokufumana khona abantu. NjengoYesu nabaprofeti bangaphambi kobuKristu, uthando lwethu olunzulu ngabantu lusishukumisela ukuba sazise inyaniso kubantu bonke, kuyo yonke indawo.—Yer. 11:6; Marko 6:56; Luka 13:22, 26.
2 Nangona ngokuqhelekileyo ikhaya lomntu liyeyona ndawo ifanelekileyo yokuthetha naye kuyo ngenyaniso, abantu abaninzi asibafumani emakhaya xa sityelela kwizindlu ngezindlu. Xa abaninimzi besemakhaya, idla ngokuba kwangulaa mntu sasithethe naye ngaphambili osamkelayo, ibe amanye amalungu entsapho awafumaneki. Ngaloo ndlela, ukunikela ubungqina esitratweni kufanele kube nendawo yako kubulungiseleli bethu. Njengokuba omnye uvulindlela watshoyo, usenokufumanisa ukuba ukunikela ubungqina esitratweni “yintsimi enandiphekayo, ehlaziyayo nelula.”
ISIMO SENGQONDO SOBUHLOBO NESIKHUTHAZAYO
3 Kutheni ungazami ukunikela ubungqina rhoqo esitratweni kummandla omnye? Omnye udade okwenzayo oku uthi uye waqhelana noonovenkile abaninzi nabanye abantu abasoloko bekwisitrato “sakhe.” Kuye kwakho unxibelelwano oluhle, oluye lwakhokelela kwiingxubusho ezininzi neziphumelelayo zeBhayibhile. Uvulindlela ongumncedani okunandipha kakhulu ukunikela ubungqina esitratweni wathi uzama ukuthetha nabantu ababuka iimpahla ezifestileni, abo bahleli kwiinqwelo-mafutha zabo, abantu abalindele ooduladula kwanabo baye bachasa kumatyeli adluleyo. Kufuneka inkalipho nogwebo olulungileyo ukuze sibe nenkalipho size sibeyisele kokuthile abantu, ukanti singazingisi ngokukruqulayo.
4 Undoqo wokunikela ubungqina ngokuphumelelayo esitratweni kukuthetha nabantu ngobuhlobo, ngodlamko nangokunyaniseka. Ncuma. Mjonge emehlweni umntu ukuba unako, kodwa ukuba akunako, qhubeka uze uthethe naye ngobuhlobo. Phawula izinto ezithile kuye uze uthethe ngazo ngokunengenelo. Omnye udade uphawula amabhinqa athwele iingxowa zokutya aze athi, “Ndiphawula ukuba beniye kuthenga izinto ezityiwayo. Ngokuqinisekileyo amaxabiso azo aphakamile kwezi ntsuku. Nicinga ntoni ngokutya okuthile okuhlaziyayo kwengqondo nentliziyo? Ndilinandiphile eli nqaku . . . .” Kumntu ohamba nabantwana, uthi, “Ndiphawula ukuba unabantwanana ababini abathandekayo. Ngaba ubusazi ukuba iBhayibhile ithi abantwana bayintsikelelo evela kuThixo? Khangela apha, ndikubonise . . . .” Esiya kumntu obonakala ecinga nzulu, uthi “Ndiyabona ukuba ikho le nto ucinga ngayo. Namhlanje ihlabathi lizaliswe ziinkathazo, uthini wena? Ngaba ucinga ukuba loze lifike ixesha laxa . . . ?”
5 Ukuba umntu uhla ngesitrato ekhawulezile, usenokumnika nje iphecana uze uthi, “Nazi iindaba ezilungileyo endikuphathele zona ukuze uzifundele xa unexesha.” Ukuba abantu babonakala bengangxamanga, banike amaphephancwadi. Kuyinto entle ukunika abantu uncwadi nanini na kunokwenzeka.
6 Abavakalisi abaninzi ekuqaleni ababekoyika ukunikela ubungqina esitratweni ngoku bakujonga njengeyona ndlela bayithandayo yokushumayela. Kambe ke, kumele kusetyenziswe ubulumko xa kusetyenzwa kwimimandla eyingozi okanye ngamaxesha anobungozi. Kwanakwiidolophu ezincinane, ngokuqhelekileyo zibakho iindawo ekunyakazela abantu kuzo, iindawo ezima kuzo izithuthi zikawonke-wonke, okanye iindawo zokumisa iinqwelo-mafutha zikawonke-wonke apho kunokuthethwa nabantu ngeendaba ezilungileyo. Xhakamfula ithuba elivelayo, yaye ngobulumko sebenzisa ilizwi lakho ekuvakaliseni iindaba ezilungileyo ezitratweni nakwiindawo zikawonke-wonke, ukuze kusikelelwe abo bevayo nokuze kudunyiswe uYehova.—IMize. 1:20.