Ngaba Unokwenza Okungakumbi Ekuzukiseni UYehova?
1 Lowo ngumbuzo obalulekileyo sonke esimele sicinge ngawo. Njengabaxelisi abathembekileyo beNkosi yethu, uYesu Kristu, namhlanje uThixo wethu simzukisa ngokulivuma ekuhleni igama lakhe. Le yimbopheleleko esimele siyithwale ukuba siza kuzuza inkoliseko kaThixo. (Marko 13:10; Luka 4:18; IZe. 4:20; Heb. 13:15) Elinjani lona ilungelo elingathethekiyo—ewe, elibalaseleyo—ekulilo ukusa ezi ndaba zilungileyo ‘kwizimvu’ ezisaseleyo ezisasazekileyo ezisenokuba yinxalenye yomhlambi kaYehova wendalo iphela!—Yoh. 10:16.
2 Ngaba wena nabantwana bakho ninokwenza okungakumbi ekuzukiseni uYehova ngokwandisa umsebenzi wenu kubulungiseleli? Ngamanani awandayo ehlabathini lonke, abazalwana noodade benu bangenela inkonzo yobuvulindlela. Ebudeni benyanga ka-Aprili 1992, eMzantsi Afrika abali-12 555 bebengoovulindlela abakhethekileyo, abathe ngxi, okanye abangabancedani. Ngaba wena ngokobuqu ukhe wacingisisa nzulu ngokuba nguvulindlela? Ngaba uyabakhuthaza abantwana bakho ukuba babe nosukelo lobulungiseleli bexesha elizeleyo?
3 Kutheni ungahlolisisi indlela ovakalelwa ngayo ngokobuqu ngenkonzo yobuvulindlela? Ngaba naninina kukhankanywa lo mbandela, ukhawuleza ugqibe kwelokuba iimeko zakho azikuvumeli kwaphela ukuba ukhonze njengomlungiseleli onguvulindlela? Kuyinyaniso ukuba asinguye wonk’ ubani onokuba nguvulindlela. Iimbopheleleko ezingokweZibhalo neminye imiqobo iyabathintela abaninzi ekubeni babe ngoovulindlela. (1 Tim. 5:8) Kodwa ngaba kutshanje ukhe wacingisisa ngalo mbandela ngomthandazo? Ngaba nikhe nawuxubusha lo mbandela njengentsapho ukuze nibone enoba ilungu elinye lentsapho alinakuba nguvulindlela kusini na? Inkupho yeMboniselo kaJuni 1, 1983, yathetha la mazwi abangel’ umdla kwiphepha 16: “Ngokwenene, wonke umlungiseleli ongumKristu ngomthandazo umele aqwalasele enoba unokuba nguvulindlela okanye akanakuba nguye na. Isibini saseMzantsi Afrika esibe ngoovulindlela iminyaka elishumi elinesihlanu sathi: ‘Kutheni le nto singoovulindlela? Ngaba ngesasinako ukuzithethelela phambi kukaYehova ukuba sasingengabo?’ Uninzi lwabangengabo oovulindlela banokuzibuza lo mbuzo uhlobene noku: ‘Ngaba ngokwenene phambi koYehova ndinokusithethelela isibakala sokuba ndingengovulindlela?’”
4 Elinye inqaku leMboniselo elixubusha ngalo mbandela lanikela la magqabaza ahlab’ emxholweni: “Ngamnye wethu umele abe ngonyanisekileyo kuye. Ngaba uthi, ‘Umoya uyavuma, kodwa inyama ibuthathaka’? Kodwa uvuma ngokwenene na umoya? Masiyeke ukusebenzisa ubuthathaka benyama njengesingxengxezo somoya ongavumiyo.”—wXO79 2/15 iphe. 21.
5 Abazali Abafuna Abantwana Babo Baphumelele: IMizekeliso 15:20 isiqinisekisa isithi: “Unyana olumkileyo uyamvuyisa uyise.” Abazali aboyika uThixo ngokungathandabuzekiyo bayavuya xa oonyana neentombi zabo belandela ikhondo lobomi benkonzo yokuzinikela kuYehova. Noko ke, abantwana bakho abanakusuka ngokuzenzekelayo bazikhethele ikhondo lobulumko. Umtsalane weli hlabathi unamandla kakhulu. Bazali, izinto ezixatyiswa ngabantwana benu ubukhulu becala zibangelwa nini. Ukuba nisoloko nithetha ngokufanelekileyo ngeengenelo zenkonzo yexesha elizeleyo, ukuba niyabakhuthaza abaselula benu ukuba banxulumane noovulindlela abazinikeleyo, ukuba ngokwenyaniso neyisekile kukuba ubulungiseleli bexesha elizeleyo ngowona msebenzi ubalaseleyo abantwana benu abanokuwenza, esi simo sengqondo sifanelekileyo ngokungathandabuzekiyo siya kuba nempembelelo enkulu ebantwaneni benu. Bancedeni baqonde ukuxabiseka kokuzenzela igama elihle kuYehova kunakubantu.
6 Nina baselula, IMizekeliso 22:1 ibalaselisa ukhetho enimele nilwenze: “Igama elilungileyo linokunyulwa ngaphezu kobutyebi obuninzi; isimilo esilungileyo silunge ngaphezu kwesilivere negolide.” Wena uya kuzenzela igama elinjani? Cinga ngamadoda namabhinqa esifunda ngawo eBhayibhileni awazenzela igama elihle kuThixo ngenkonzo yokuzinikela. Kwakukho uLuka, ugqirha oyintanda, noEnoki, owahamba noThixo oyinyaniso. USamuweli wafumana eyona mfundo ilungileyo, waqalisa ukukhonza etempileni kaYehova eselula kakhulu. Ngaba ucinga ukuba aba bakhonzi bathembekileyo bazisola ngokhetho abalwenzayo? Babenokukwenza njani oko? Bonke babephila ubomi obonwabisayo, obunemveliso nobuchwayitisayo. Yaye bafumana inkoliseko kaYehova kanaphakade!—INdu. 110:3; 148:12, 13; IMize. 20:29a; 1 Tim. 4:8b.
7 Xa abantwana bephumelela ebomini, abazali babo baziva benelunda. Ukuxhobisa ngokuqeqesha nangokufundisa eli ‘lifa livela kuYehova’ kuvuzwa ngokugqithiseleyo. (INdu. 127:3) Yintoni enokwenza nawuphi na umzali abe nelunda ngaphezu kwaxa unyana okanye intombi yakhe isenza konke okusemandleni ayo ukuze izukise uYehova? Inkoliso yabantu abaselula namhlanje ilandela emanyathelweni kaLuka, uEnoki noSamuweli, njengokuba enye ileta ibonisa: “Ndineminyaka eli-16 ubudala. Ndiqalise ukuba nguvulindlela othe ngxi . . . kwiinyanga ezisithoba emva kokuba ndibhaptiziwe, yaye ukususela ngoko bendifumana iintsikelelo zikaYehova. . . . Kwakhona ubuvulindlela buyakunceda esikolweni. Ngaphambili, abo ndifunda nabo bebendihleka kuba ndiliNgqina. Ngoku, ekubeni ndisenza ufundisiso lobuqu olungakumbi, ndiyakwazi ‘ukumphendula lowo undingcikivayo.’”
8 Imfundo Yokuxhobisa Ubani Kubulungiseleli: Kweli nqanaba sisenokuqwalasela umbandela wemfundo yehlabathi. Lo ngummandla apho kufuneka imbono elungeleleneyo ngokukhethekileyo kuwo. IMboniselo kaNovemba 1, 1992, ibinenqaku elithi “Imfundo Enenjongo.” Phantsi komxholwana othi “Imfundo Eyaneleyo,” inikele le ngongoma: “AmaKristu afanele akwazi ukuzixhasa, kwanokuba angabalungiseleli bexesha elizeleyo abangoovulindlela. (2 Tesalonika 3:10-12) . . . UmKristu oselula kufuneka afunde kangakanani ukuze akwazi ukuyihlonela le migaqo yeBhayibhile yaye aziphumeze iimbopheleleko zakhe zobuKristu? . . . Ngumvuzo onjani ekunokuthiwa ‘wanele’ . . . kwabo banqwenela ukuba ngabalungiseleli beendaba ezilungileyo abangoovulindlela? Ngokuqhelekileyo bona bafuna umsebenzi wesingxungxo ukuze bakuphephe ukuba ‘ngumthwalo’ kubazalwana babo okanye kwintsapho yabo.—1 Tesalonika 2:9.”
9 Ukuba lowo uza kuba nguvulindlela uyijonga imfundo eyongezelelekileyo njengefanelekileyo ukuze imncede asukele ikhondo lenkonzo yexesha elizeleyo, IMboniselo kaNovemba 1, 1992 incomela oku: “[INgqina eliselula] kucebiseka ukuba, ukuba kunokwenzeka, liyifumane ngoxa lihlala ekhaya, ngaloo ndlela likwazi ukugcina imikhwa emihle yofundisiso lwamaKristu, ukuya ezintlanganisweni, nomsebenzi wokushumayela.”
10 Kukho amava avela eAfrika womnye oselula oneminyaka engama-22 ubudala owaya kwisikolo sokufundela ubugcisa, ngoxa wayecinga ngenkonzo yobuvulindlela. Ngoxa wayekweso sikolo sokufundela ubugcisa, wabhalisa njengovulindlela ongumncedani. Oontanga bakhe babemhleka, besithi ngokuqinisekileyo akazi kuziphumelela iimviwo. Wayesoloko ebaphendula athi: “Funani uBukumkani bukaThixo kuqala nobulungisa bakhe.” Eziqeqesha, wayevuka ekuseni ntsasa nganye aze alungiselele izifundo zakhe zesikolo kangangeeyure ezimbini aze abe nesabelo kwinkonzo yasentsimini emva kwemini xa isikolo siphumile. Bonke esikolweni bothuka xa lo uselula waba ngowesithathu kwabaphumelele iimviwo ezikhethekileyo zokukhethwa kwabafundi abathathu abaphume phambili abaza kufumana ibhaso elikhethekileyo lokufundiswa. Umfundi owaphumelela kwindawo yesibini yayingumntu onomdla umzalwana wethu onguvulindlela awayefunda naye iBhayibhile esikolweni. Umfundi owaphumelela kwindawo yokuqala wayengomnye oselula oliNgqina elinenzondelelo esikolweni.
11 Abadala Baphumeza Indima Yabo: Abadala bebandla, abanelunda ngomsebenzi owenziwa ngoovulindlela, babakhuthaza gqitha aba balungiseleli banenzondelelo. Abadala bayavuyiswa kukwenza oku ngenxa yokuba bayazi ukuba oovulindlela abasebenza nzima nabanemveliso bayintsikelelo nakweliphi na ibandla. Emva kokuchitha ithuba elingangonyaka kwinkonzo yobuvulindlela obuthe ngxi, abanjalo baye bafanelekele uqeqesho olongezelelekileyo kwiSikolo Senkonzo Yobuvulindlela. Esi sikolo siye sangqineka sisisixhobo esibaluleke kakhulu ekuphuculeni ubuchule boovulindlela. Nangona oovulindlela benendima ephambili emsebenzini, nabo bayalufuna ukhuthazo olunothando, yaye abadala bafanele bakuphaphele ukuzalisekisa loo ntswelo.—1 Pet. 5:1-3.
12 Abadala banokuwukhuthaza njani umsebenzi wobuvulindlela? Inyathelo lokuqala kukuhlolisisa ngamathuba athile abo basenokufanelekela eli lungelo likhethekileyo. Abadala banokuthetha nabo babonakala bekwimeko efanelekileyo yokuba bangangoovulindlela, kuquka abaninzi abaye babe ngoovulindlela abangabancedani rhoqo, abadla umhlala phantsi, oomama abanyamekela amakhaya nabantwana besikolo. Nangona kungekho namnye ofanele enziwe azive enyanzelekile ukuba abhalise, abo basenokuba banomnqweno kodwa beziva bemadolw’ anzima, ngokhuthazo olusengqiqweni, basenokuqonda ukuba banako ukubufikelela ubuvulindlela.
13 Ekunikeleni ukhuthazo kwabo banomdla wokufaka izicelo, abadala bafanele bakhumbule ukuba akuyomfuneko ukuba lowo ufaka isicelo achithe iinyanga eziliqela kumsebenzi wobuvulindlela bobuncedani ngaphambi kokubhalisa njengovulindlela othe ngxi. (kmXO 8/86 isihlomelo isiqe. 24-26) Kakade ke, abadala kuya kufuneka ngokusengqiqweni baqiniseke ukuba lowo ufaka isicelo unako ukuzifikelela iiyure ezifunekayo.
14 Emva kokuba isicelo siye sahlolisiswa yiKomiti Yenkonzo Yebandla saza ngenyameko sahlolwa ngunobhala ukuqinisekisa ukuba yonke imibuzo iphendulwe, sifanele sithunyelwe ngokukhawuleza kuMbutho.
15 Unobhala ufanele aqhubeke ebazisa abadala ngazo naziphi na iingxaki abasenokuba banazo oovulindlela. Oku kubaluleke ngakumbi kumabandla apho kukho oovulindlela abaninzi. Ukongezelela ekuhlolisiseni umsebenzi woovulindlela ekupheleni konyaka wenkonzo, njengokuba Ingxelo Yohlahlelo Lwebandla (S-10) ifuna njalo, unobhala ufanele ameme umveleli wenkonzo ukuba badibane ekuqaleni kukaMatshi ukuze bahlole abo basenokuba bayasilela ukufikelela iiyure ezifunekayo nabo kusenokufuneka kunikelwe ingqalelo kubo ngokobuqu. (Bona iZaziso kuBulungiseleli Bethu BoBukumkani bukaFebruwari 1992.) Ukuba kuye kwanikelwa uncedo ngaphandle kokulibazisa, uvulindlela anganako ukuwugqiba unyaka wenkonzo ngokunempumelelo.
16 Oovulindlela abaninzi abatsha baselula ngeminyaka yaye ngokwentelekiso basebatsha enyanisweni. Umoya wabo wentumekelelo ngokuqinisekileyo uyasivuyisa! Kodwa sekunjalo aba basebatsha basalufuna uqeqesho lokukhulisa ubuchule kumsebenzi wendlu ngendlu, ekwenzeni amabuyelo ngokunempumelelo nasekufundiseni kwizifundo zeBhayibhile. Ukuba akalufumani olu qeqesho, lowo usemtsha usenokudimazeka kwithuba elingangonyaka aze ekugqibeleni ayeke kwinkonzo yobuvulindlela ngenxa yokungafumani miphumo mihle kubulungiseleli. Abadala abaphaphileyo basenokuba nako ukuzibona iingxaki ezincinane okanye ukuhla emsebenzini. Ukuba kunokunikelwa ingqalelo ngokukhawuleza aze uvulindlela ancedwe kwingxaki yakhe, usenokunandipha iminyaka emininzi enkonzweni enemveliso.
17 Ngaba Unokuloba Kumanzi Akude? Bambi kubafundi bakaYesu babengababambisi beentlanzi. Maxa wambi, emva kokuloba ubusuku bonke, iminatha yabo yayingabuyi nanto. (Yoh. 21:3) Kwiinxalenye zeli lizwe oko ‘kubanjiswa kwabantu’ bekuqhubeka kangangeminyaka, bambi oovulindlela basenokugqiba kwelokuba zimbalwa “iintlanzi” ezisaseleyo “kumanzi” ebandla labo. (Mat. 4:19) Ngokwahlukileyo koko, ngaba asichukunyiswa kukufunda ngeengxelo ezivela kwamanye amazwe apho abavakalisi noovulindlela baqhuba izifundo zeBhayibhile ezininzi? Uvuyo olufunyanwa ngoovulindlela nabavangeli basemazweni abakula mazwe lubonakala ngokucacileyo. (wXO92 9/1 iphe. 20 isiqe. 15) Ngaloo ndlela, ukuba oovulindlela abathile abasebenza nzima banako ukufudukela kwilizwe apho kukho imfuneko enkulu, bafanele bakuqwalasele oku neofisi yesebe ngaphambi kokuba bafuduke.
18 Noko ke khumbulani ukuba abo bafuna ukufudukela kwamanye amazwe ukuze babe nesabelo kwinkonzo yexesha elizeleyo bafanele babe nempilo entle, bakhule ngokomoya, babe ngabanentsebenziswano, babe nomoya wobuthixo, yaye bafaneleke njengabavakalisi boBukumkani. Kwakhona bafanele babe nengxelo entle evela kwibandla abakhonza kulo ngoku. Ukongezelela, bafanele bakwazi ukuzixhasa ngemali yaye bangalindeli ukuba abazalwana belo lizwe abafuna ukuya kulo babaxhase. Kuqala bafanele baxubushe oko bakucebayo nabadala abakwibandla labo baze bafumane uncomelo oluvela kubo. Ukuba abadala abaqinisekanga ngawo nawuphi na umbandela ophathelele nokukhonza kukabani kwenye indawo, bafanele bathethe nomveleli wabo wesiphaluka, okanye babhalele iofisi yesebe ukuze bafumane iinkcukacha ezongezelelekileyo.
19 Ekuqaleni, bambi basenokuba babuqalisa ubuvulindlela kuba babesazi ukuba buyinto elungileyo emele yenziwe kodwa bethandabuza enoba babenako ukuphumelela kubo. Basenokuba basifaka isicelo bethandabuza yaye bengaqinisekanga ngandlel’ ithile. Xa babeqala, imiphumo yabo entsimini isenokuba yayimincinane. Noko ke, ekuhambeni kwexesha ubuchule babo banda, yaye ekuhambeni kwexesha kwabakho ubungqina bokuba uYehova uyawusikelela umsebenzi wabo. Ngenxa yoko, uvuyo nentembelo yabo yakhula. Kwabathile, ubuvulindlela buye bangqineka bulinyathelo elikhokelela kwinkonzo yaseBheteli, kwiSikolo Sokuqeqeshelwa Ubulungiseleli kwanomsebenzi wokuhamba hamba.
20 Usenokungabi nako ukufudukela kwelinye ilizwe okanye ungenele iSikolo Sokuqeqeshelwa Ubulungiseleli, kodwa sekunjalo akho amathuba okuloba kwamanye amanzi kweli lizwe ukuba intsimi okuyo ngoku ayinamveliso ikhethekileyo. Nceda udibane noMbutho ukuba unomdla wokukhonza apho imfuneko inkulu khona eMzantsi Afrika okanye kumazwe aselumelwaneni. Inyathelo elilolo hlobo lisenokufuna ukuba uguqule indlela ophila ngayo, kodwa eneneni uya kufumana imivuzo yokomoya evuyisayo.—Mat. 6:19-21.
21 Okanye ukuba iimeko zakho ziyakuvumela, usenokunceda ibandla elikufutshane elisesiphalukeni sakho. Ukuba uyafaneleka, umveleli wakho wesiphaluka uya kukuvuyela ukukucebisa ngamabandla asesiphalukeni anokungenelwa bubukho bomnye uvulindlela.
22 Bambi oovulindlela nabavakalisi baye bakwazi ukukhonza iimfuno kwimimandla abakuyo behlala kumakhaya abo. Basenokuba bayalwazi olunye ulwimi. Ngaba ufumanisa ukuba kwintsimi yakho abemi abaninzi bathetha olunye ulwimi? Ngaba bakho abantu abafuna ukufumana isigidimi soBukumkani kubani osebenzisa intetho yezandla? Abo bazi olunye ulwimi banokuba luncedo kakhulu ekufikeleleni zonke iindidi zabantu ngesigidimi soBukumkani. Nangona oku kusenokuba lucelomngeni ngokwenene, kwakhona kusenokungqineka kuvuza kakhulu.—1 Tim. 2:4; Tit. 2:11.
23 Ukuba ngoku wenza konke okusemandleni akho ekuzukiseni uYehova, wanandiphe amalungelo enkonzo onawo ngoku. Ukuba uvakalelwa kukuba unokwenza okungakumbi, lo mbandela wuse kuYehova ngomthandazo. Ngokunyaniseka hlolisisa iinguqulelo iimeko zakho ezisenokukuvumela ukuba uzenze. Xelela umdala onomoya wobuvulindlela okanye umveleli wesiphaluka oko ukucebayo. Xa uye wenza isigqibo esisengqiqweni ngomthandazo, siphumeze ngokukhawuleza, unentembelo kwidinga likaYehova lokuba uya kubazukisa abo bamzukisayo.—Heb. 13:5, 6; 1 Sam. 2:30.