Masiye Kwindlu Ngendlu Singayeki
1 KwaSirayeli wamandulo, kwakunikelwa amadini yonke imihla. (Eks. 29:38-42) Umlilo wesibingelelo wawusoloko uvutha; umsi onyukayo ‘wawulivumba elithozamisayo’ elalimkholisa uYehova. (Eks. 29:18) Namhlanje, sibongozwa ukuba “sinyuse . . . kuye uThixo umbingelelo wendumiso, oko kukuthi, isiqhamo somlomo olivumayo igama lakhe.” (Heb. 13:15) Kunokusebenzisa amadini awayefunwa nguMthetho, sinqula uYehova ngokubalisa iindumiso zakhe singayeki.—Isa. 43:21; IZe. 5:42.
2 UYesu Kristu, elona Ngqina libalaseleyo lakha laphila kulo mhlaba, wasifundisa indlela esimele siluphumeze ngayo unqulo olunyulu ngokunikela ngamadini eendumiso. Wafundisa abafundi bakhe ukuba isigidimi ababesishumayela sasingxamisekile. Wayesazi ukuba eyona ndlela iphumelelayo yokufikelela abantu ngeendaba ezilungileyo kukuthetha nabo ngokobuqu emakhayeni abo. (Mat. 10:7, 12) Ngoko sifumanisa ukuba abapostile balulandela ulwalathiso lwakhe oluphefumlelwe nguThixo lokushumayela kwindlu ngendlu.—IZe. 20:20.
3 Nanamhlanje kusenjalo. Njengabafundi bakaYesu, amaKristu okwenyaniso alandela umzekelo wakhe ngokushumayela iindaba ezilungileyo kwindlu ngendlu. Nangona sisenokugxekwa size sitshutshiswe ngenxa yoko, izigidi zifunde inyaniso ibe amakhulu amawaka abafundi abatsha angenela izintlu zesihlwele esikhulu nyaka ngamnye, enikela ubungqina bokuba le yindlela kaYehova yokufeza ukuthanda kwakhe. Kungenxa yoko sizingisa kubulungiseleli bethu.
4 Iingenelo Zokushumayela Kwindlu Ngendlu: “UThixo akamkhethi wabuso bamntu . . . lowo umoyikayo, asebenze ubulungisa, wamkelekile kuye.” (IZe. 10:34, 35) Ukuya ngokungqalileyo kwindlu nganye kwintsimi yethu kubonisa ukuba asikhethi buso, sinika wonk’ ubani ithuba lokuva isigidimi soBukumkani rhoqo. Ngokomphumo abaphulaphulayo bafumana uncedo lobuqu ngokweentswelo zabo.
5 Phantse bonke abavakalisi, kuquka abaselula, abalupheleyo kwanabo basebatsha, banokuba nenxaxheba kumsebenzi wendlu ngendlu. Ngale ndlela ngamnye unokwenza “uvumo lwasekuhleni losindiso.” (Roma 10:10, NW) Ukuba nenxaxheba nabanye kubulungiseleli bendlu ngendlu kusisondeza omnye komnye kumaqhina othando nawomanyano. Kwangaxeshanye, kusinika ithuba lokubonakalisa unyamezelo lwethu xa sidibana nabangenamdla okanye abachasayo. Oku kubonakalisa ukholo lwethu ekuhleni kusenza ‘sibukelwe,’ nto leyo enceda abanyanisekileyo baqonde ukuba sinelungiselelo elilungeleleneyo lokufundisa iBhayibhile ibe banokungenelwa kulo. (1 Kor. 4:9, NW) Zonke izinto zibonisa ngokucacileyo ukuba uYehova uyawusikelela umsebenzi wendlu ngendlu yaye usebenzisa wona ukuhlanganisela isihlwele esikhulu ‘kwindlu’ yakhe yonqulo olunyulu.—Isa. 2:2-4.
6 Ngoku kunanini na embalini, abantu kufuneka beve isigidimi soBukumkani. Masiqhubeke sishumayela kwindlu ngendlu singayeki de uYehova athi kwanele. (Isa. 6:11) Xa sisenjenjalo, siya kuvuzwa ngovuyo olufumaneka ngokuba nesabelo kubulungiseleli bendlu ngendlu obubalulekileyo nobuyingenelo kweli xesha lesiphelo.—1 Kor. 15:58.