Nimele Ukuba Ngabanjani Na?
1 Ixesha lokuphenduliswa kwabo bonke abantu liyasondela. IBhayibhile ilibiza ngokuthi “imini kaThixo.” Lixesha apho kuya kuphunyezwa umgwebo kaThixo kwabangendawo; kwakhona lixesha lokukhululwa kwabangamalungisa. Bonke abantu abaphilayo ngelo xesha baya kuphenduliswa ngendlela ebebebusebenzisa ngayo ubomi babo. Ecinga ngoko, uPetros ubuza umbuzo ocikidayo: “Nimele ukuba ngabanjani na”? Ubethelela ukubaluleka ‘kwehambo engcwele, nezenzo zokuhlonela uThixo, nokulindela imini kaThixo,’ kunye nemfuneko yokungabi ‘nabala, nasiphako nokuba seluxolweni.’—2 Pet. 3:11-14.
2 Ihambo Engcwele Nezenzo Zokuhlonela UThixo: Ihambo engcwele iquka imisebenzi engumzekelo ebonisa ukuhlonela imigaqo yeBhayibhile. (Tito 2:7, 8) UmKristu umele aphephe ihambo yehlabathi ebangelwa kukuzingca naziinkanuko zenyama.—Roma 13:11, 14.
3 “Ukuhlonela uThixo” kuchazwa ngokuthi “bubuhlobo bobuqu noThixo, obusuka entliziyweni eqhutywa luxabiso olunzulu ngeempawu zakhe ezinomtsalane.” Inzondelelo yethu kubulungiseleli yindlela ebalaseleyo esilubonisa ngayo olu phawu. Xa sishumayela asishukunyiswa yimvakalelo yokuba oko kuyimbopheleleko nje kuphela; sishukunyiswa luthando olunzulu ngoYehova. (Marko 12:29, 30) Xa sishukunyiswa lolo thando, ubulungiseleli bethu sibujonga njengendlela enentsingiselo yokubonakalisa ukuhlonela kwethu uThixo. Ekubeni ukuhlonela kwethu uThixo kungafanele kutshintshatshintshe, isabelo sethu kumsebenzi wokushumayela asimele sitshintshatshintshe. Sifanele sibe yinxalenye ephambili kucwangciso lwethu lwezinto esizenza veki nganye.—Heb. 13:15.
4 ‘Ukulindela’ imini kaYehova kuthetha ukuyigcina iyeyona nto iphambili kwizinto esizicingayo mhla ngamnye, singaze siyenze into engabalulekanga. Kuthetha ukugcina izilangazelelo zoBukumkani kwindawo yokuqala ebomini bethu.—Mat. 6:33.
5 Singenabala, Singenasiphako Yaye Siseluxolweni: Njengenxalenye yesihlwele esikhulu, siye ‘sazihlamba iingubo zethu sazenza mhlophe egazini leMvana.’ (ISityhi. 7:14) Ngoko, ukungabi “nabala” kuthetha ukuba simele sixhathise ukuze ubomi bethu obucocekileyo nesibahluleleyo bungadyojwa kukungcola kwehlabathi. Sizigcina ‘singenabala’ ngokungavumeli usukelo lwezinto eziphathekayo lokungahloneli Thixo, lonakalise ubuntu bethu bobuKristu. (Yak. 1:27; 1 Yoh. 2:15-17) Ukuba ‘seluxolweni’ sikubonisa ngokubonakalisa “uxolo lukaThixo” kuzo zonke iinkqubano zethu nabanye.—Fil. 4:7; Roma 12:18; 14:19.
6 Ukuba sikulumkele ngokuphumelelayo ukungcoliswa lihlabathi, asinakuze ‘similise okweli phakade,’ eligwetyiweyo nguYehova. Kunoko, imisebenzi yethu emihle iya kunceda abanye bawubone umahluko “phakathi komkhonzayo uThixo nongamkhonziyo.”—Roma 12:2; Mal. 3:18.
7 Xa sikuxhalabela ukulondoloza ‘imisebenzi emihle’ igama likaYehova liyadunyiswa, ibandla liyomelezwa, yaye abanye bayangenelwa. (1 Pet. 2:12) Ngamana singasoloko singabantu abanjalo.