Ukuzinikela Ngokuzithandela Kuwo Wonke Umsebenzi Olungileyo
1 Enye impapasho yehlabathi yathetha ngamaNgqina kaYehova yenjenje: “Kunganzima ukufumana amalungu alo naliphi na elinye iqela asebenza nzima kunqulo lwawo njengoko esenza amaNgqina.” Kutheni amaNgqina kaYehova esebenza nzima kangaka yaye enomoya wokuzithandela?
2 Isizathu sokuqala sikukuba aqhutywa kukungxamiseka kwamaxesha. UYesu wayesazi ukuba wayenexesha elincinane lokugqibezela umsebenzi wakhe emhlabeni. (Yoh. 9:4) Ngoxa uNyana kaThixo ozukisiweyo eqhubeka esoyisa phakathi kweentshaba zakhe namhlanje, abantu bakaYehova bayaqonda ukuba banexesha elincinane lokwenza umsebenzi wabo. Ngoko ke, bayaqhubeka bezinikela ngokuzithandela enkonzweni engcwele. (INdu. 110:1-3) Ekubeni kufuneka abasebenzi abangakumbi bokuvuna, abayekeleli kwimigudu yabo. (Mat. 9:37, 38) Ngenxa yoko, bazabalazela ukuxelisa uYesu, owabamisela umzekelo ogqibeleleyo wokuzithandela nokukhuthala emsebenzini wakhe.—Yoh. 5:17.
3 Esinye isizathu esibangela amaNgqina kaYehova asebenze ngemiphefumlo iphela ngokunga kukuYehova sikukuba intlangano yawo esehlabathini lonke yahlukile kuwo onke amanye amaqela. Ngokuqhelekileyo iintlangano zonqulo zehlabathi zifuna ixesha nje elincinane nomgudu ongephi kubalandeli bazo. Oko bakukholelwayo kubuchaphazela nje kancinane okanye akubuchaphazeli kwaukubuchaphazela ubomi babo bemihla ngemihla, indlela abaqhubana ngayo nabanye, okanye usukelo lwabo ebomini. Ekubeni kungekho nto ishukumisa ukholo lwabo lokwenyaniso, baye banyanzelisa abalusi babo ukuba ‘babathethele izinto ezigudileyo,’ bebaqinisekisa ngelithi inkonzo yabo yokudlulisela usana kunina yanele. (Isa. 30:10) Abefundisi babo baye bazithandisa ‘ngokubonwaya iindlebe,’ bebatha umoya wokungakhathali nobuvila bokomoya.—2 Tim. 4:3, NW.
4 Hayi indlela abahluke ngayo abantu bakaYehova! Yonke into kunqulo lwethu ibandakanya umgudu, ukuzibhokoxa nomsebenzi. Mihla le nakuyo yonke into esiyenzayo, siyakuqhelisela esikukholelwayo. Ngoxa inyaniso isizisela uvuyo olukhulu, siva “ubunzima” ukuze sizalisekise oko kufunekayo. (Thelekisa eyoku-1 kwabaseTesalonika 2:2.) Ukunyamekela iimbopheleleko zobomi bemihla ngemihla kukodwa nje kugcina inkoliso yabantu ixakekile. Noko ke, asizivumeli ezi zinto zibe ngumqobo ekubekeni izilangazelelo zoBukumkani kwindawo yokuqala.—Mat. 6:33.
5 Oko sikunikwe ukuba sikwenze kwinkonzo kaYehova kuyingenelo kakhulu yaye kungxamisekile kangangokuba sishukunyiselwa ukuba ‘sizongele’ ixesha kwezinye izinto size silisebenzise ngokuyingenelo ngakumbi kwizinto zokomoya. (Efe. 5:16) Ekubeni sisazi ukuba ukuhlonela kwethu uThixo nomoya wokuzithandela ukholisa uYehova, sineyona ntshukumisa inamandla yokuqhubeka nomsebenzi wethu onzima. Ekubeni sifumana iintsikelelo ngoku namadinga obomi obuzayo, sizimisele ukuqhubeka “sisebenza nzima yaye sizibhokoxa” ngenxa yezilangazelelo zoBukumkani.—1 Tim. 4:10, NW.
6 Ukuzinikela Nomoya Wokuzincama: Namhlanje abantu abaninzi babeka izinto eziphathekayo nezilangazelelo zabo ngaphambi kwayo nayiphi na enye into. Bavakalelwa kukuba kuyeyona nto ilungileyo ukunikela ingqalelo koko baya kukudla, baya kukusela okanye abaya kukunxiba. (Mat. 6:31) Ekubeni benganeli zezi zinto ziyimfuneko, bashukunyiswa lusukelo lokufuna ukunandipha ubomi obumyoli ngokuzeleyo ngoku baze ‘babe nezinto ezininzi ezilungileyo ezibekelwe iminyaka emininzi, ukuze baphumle, badle, basele baze babe nemihlali.’ (Luka 12:19) Umhambi wecawa oqhelekileyo uvakalelwa kukuba nawuphi na umgudu unqulo lwakhe olufuna awenze uphazamisana namalungelo akhe. Inezothe kuye into yokuba ayeke okanye ayekelele kwindlela azifuna ngayo izinto eziphathekayo okanye ancame izinto eziyolisayo. Ekubeni ecinga ngokuzingca, ukuhlakulela umoya wokuzincama kuliphupha yaye akubobulumko.
7 Thina siwujonga ngokwahlukileyo lo mbandela. ILizwi likaThixo likuphucule ukucinga kwethu ukuze sicinge ngendlela uThixo acinga ngayo kunokucinga njengabantu. (Isa. 55:8, 9) Ebomini sinosukelo oluludlula lee usukelo lokwenyama. Ukuthethelelwa kolongamo lukaYehova nokungcwaliswa kwegama lakhe zezona zinto zibaluleke kakhulu kwindalo iphela. Le mibandela ibaluleke kakhulu kangangokuba, zonke iintlanga “zinjengento engento phambi kwakhe,” ngokwentelekiso. (Isa. 40:17) Naliphi na ilinge lokuphila ubomi bethu ngendlela etyeshela ukuthanda kukaThixo limele lijongwe njengobuyatha.—1 Kor. 3:19.
8 Ngoko ngoxa ezinye izinto eziphathekayo zifuneka yaye ezinye ziluncedo kakhulu ekuqhubekeni nemisebenzi yethu yoBukumkani, siyaqonda ukuba ezi zinto asizizo ngokwenene “izinto eziziincamisa.” (Fil. 1:10) Sihlala sinesimo sengqondo esichazwe kweyoku-1 kuTimoti 6:8 ekulinganiseleni ukusukela kwethu izinto eziphathekayo size ngobulumko sizabalazele ukugcina iintliziyo zethu zitsoliswe ‘kwizinto ezingabonwayo ezingunaphakade.’—2 Kor. 4:18.
9 Okukhona sicinga ngendlela uThixo acinga ngayo, kokukhona singayi kuzixhalabela kangako izinto eziphathekayo. Xa sicamngca ngoko uYehova sele esenzele kona neentsikelelo ezimangalisayo asithembise ngazo kwikamva, sikulungele ukuncama nantoni na ayifunayo kuthi. (Marko 10:29, 30) Simtyala ubomi bethu. Ukuba bekungengenxa yenceba nothando lwakhe, besingayi kubunandipha ubomi ngoku nakwikamva. Siziva sinyanzelekile ukuba sizinikele, ekubeni yonke into esiyenzayo kwinkonzo yakhe ‘ikoko besimelwe kukuthi sikwenze.’ (Luka 17:10, akekeliswe sithi.) Nayiphi na into esicelwa ukuba siyibuyisele kuYehova, siyinikela ngokuchwayita, sisazi ukuba ‘sovuna ngokuyintabalala.’—2 Kor. 9:6, 7, NW.
10 Kufuneka Abasebenzi Bokuzithandela Ngoku: Kwasekusekweni kwalo, ibandla lamaKristu lalixakeke gqitha. Kwakufuneka kunikelwe ubungqina ngokucokisekileyo ngaphambi kokubhukuqwa kweYerusalem ngowama-70 C.E. Ngelo xesha abafundi bakaYesu ‘babexakeke ngamandla lilizwi.’ (IZe. 18:5, NW) Ngenxa yolwando olukhulu kwafuneka kuqeqeshwe abahambisi bevangeli abangakumbi nabalusi abanobuchule ukuze bancedise. Kwakufuneka amadoda anamava ekusebenzisaneni namagunya ehlabathi kunye nalawo afanelekileyo awayeya kongamela ukuqokelelwa nokusasazwa kwezinto eziphathekayo. (IZe. 6:1-6; Efe. 4:11) Nangona iqaqobana lalidumile, uninzi lwalungadumanga. Kodwa bonke ‘babezama,’ besebenza kunye ngentliziyo iphela ukuze bafeze umsebenzi.—Luka 13:24.
11 Nangona kwakungekho msebenzi mninzi kangako ehlabathini lonke ebudeni beenkulungwane ezininzi ezalandelayo, umsebenzi woBukumkani waqala phantsi xa uYesu wathabatha igunya lakhe loBukumkani ngowe-1914. Ekuqaleni, yimbinana nje kuphela eyayiqonda ukuba yayiza kuba nkulu kangaka intswelo yabasebenzi boBukumkani, de kufuneke uncedo lwezigidi zabantu abangamatsha-ntliziyo kumazwe akuwo wonke umhlaba.
12 Namhlanje intlangano ixakeke yimisebenzi eyahlukahlukeneyo eye yafuna side siqongqothe nobokugqibela ubuncwane esinabo. Umsebenzi woBukumkani uhambela phambili ngesantya esikhulu. Ukungxamiseka kwamaxesha ethu kusishukumisela ukuba sizibhokoxe size sisebenzise bonke ubuncwane esinabo ukuze sifeze lo msebenzi sinawo. Ekubeni isiphelo sayo yonke le nkqubo yezinto ingendawo sisondele kangaka, silindele owona msebenzi mkhulu kwimihla ezayo. Wonke umkhonzi kaYehova ozahluleleyo ucelwa ukuba azinikele ngokuzithandela kumsebenzi ongxamisekileyo wokuhlanganisa.
13 Yintoni Efuna Ukwenziwa? Ngenene singatsho ukuba kukho ‘okuninzi esimele sikwenze emsebenzini weNkosi.’ (1 Kor. 15:58, NW) Kwimimandla emininzi amasimi amhlophe, kodwa bona abasebenzi bambalwa. Sicelwa ukuba siphumeze kungekuphela nje indima yethu ekunikeleni ubungqina ngokucokisekileyo kwintsimi yethu kodwa nokuhlangabezana nocelomngeni lokukhonza apho kukho imfuneko enkulu khona.
14 Kuyancomeka ukubona indlela amaNgqina azinikela ngayo ngokuzithandela mbombo zone zomhlaba nakweminye imisebenzi. Le isenokuquka ukuzinikela ngokuzithandela ekwakhiweni kweendawo zonqulo, ukukhonza kwiindibano, nokunceda ngamaxesha eentlekele nokucoca iHolo yoBukumkani yasekuhlaleni rhoqo. Ngokuphathelele umsebenzi okhankanywe ekugqibeleni, kufuneka kuqinisekwe ukuba iHolo yoBukumkani ishiywa icocekile yaye ikwimeko encumisayo emva kwentlanganiso nganye. Ukwenza imisebenzi esenokubonakala ingabalulekanga kubonisa ukuba siwaqonda kakuhle amazwi kaYesu akuLuka 16:10 athi: “Othembekileyo kokuncinane, uthembekile nakokukhulu; nongalungisiyo kokuncinane, akalungisi nakokukhulu.”
◼ Ukuxhasa Imisebenzi Yebandla: Ngoxa ibandla ngalinye lisebenza njengenxalenye yentlangano yonke lize lifumane ulwalathiso ‘kumkhonzi othembekileyo noqondayo,’ libunjwe ngabavakalisi boBukumkani ngabanye. (Mat. 24:45) Izinto eliziphumezayo zixhomekeke ngokuyintloko koko kunokwenziwa liNgqina ngalinye. Umsebenzi ophambili kwibandla kukushumayela iindaba ezilungileyo kwintsimi yalo, ukwenza abafundi abatsha nokubomeleza ngokomoya. Ngamnye kuthi unokufak’ isandla kulo msebenzi. Kwakhona sinokuzibekela usukelo lofundisiso lubuqu, ukuba nenxaxheba ngokubonakalayo kwiintlanganiso nokunceda abasweleyo ebandleni. Ezi zinto zisivulela amathuba amahle okubonakalisa ukwenza kwethu izinto ngokuzithandela.
◼ Ukukhokela Kwabo Bakwizikhundla Zokuvelela: UYehova uye wanika abadala abamiselweyo imbopheleleko yokuvelela ibandla ngalinye. (IZe. 20:28) La ngamadoda aye azabalazela ukufanelekela eli lungelo. (1 Tim. 3:1) Phantse wonke umzalwana ebandleni angakwazi ukufanelekela iimbopheleleko ezinkudlwana. Abazalwana abaninzi bayakhula ngokomoya yaye bafanele baqhubeke bekhula besalathiswa yaye bencedwa ngokunothando ngabadala bebandla. La madoda afanele abe ngabafundi abakhutheleyo beBhayibhile neempapasho zethu. Anokukubonakalisa ukukhuthala kwawo ngokuthobela abadala abamiselwe ngomoya, axelise ukholo lwabo aze ahlakulele iimfaneleko ezifunwa kubaveleli.—Heb. 13:7, 17.
◼ Ukungenela Inkonzo Yexesha Elizeleyo: Owona msebenzi uphambili webandla kukushumayela iindaba ezilungileyo. (Mat. 24:14) Hayi indlela ekuyintsikelelo ngayo xa abantu abanenzondelelo besandisa umsebenzi wabo ngokubhalisa njengoovulindlela! Ngokuqhelekileyo oku kufuna bahlengahlengise ebomini babo. Kusenokufuneka bahlengahlengise ngokubhekele phaya ukuze baqhubeke bekule nkonzo ikhethekileyo. Kodwa abo balibamba nkqi eli lungelo kunokuba banikezele emva konyaka okanye bayeke ngenxa yokudimazeka nje kwexeshana ngokuqinisekileyo baya kusikelelwa nguYehova. Abadala abanothando nabanye abantu abaqolileyo banganegalelo kwimpumelelo yoovulindlela, babakhuthaze ngokuthetha nangokwenza. Hayi indlela omhle ngayo umoya oboniswa ngabantu abaselula abangenela ubuvulindlela besakuba nje begqibe esikolweni! Kukwanjalo nangabantu abakhulileyo ababhalisa njengoovulindlela abathe ngxi besakungabi nazimbopheleleko zingako zomsebenzi. Olunjani lona ulwaneliseko olubangelwa koku kumKristu ozahluleleyo xa esebenzisana ngolo hlobo noYehova ekukhawuleziseni umsebenzi wokuhlanganisa!—Isa. 60:22.
◼ Ukuba Nesabelo Ekwakhiweni Nasekugcinweni Kweendawo Zokuhlanganisana Zisemgangathweni: Eneneni kuye kwakhiwa amakhulu eeHolo zoBukumkani zezi mini kunye nentaphane yeeHolo zeNdibano. Okumangalisayo kukuba phantse wonke lo msebenzi uye wenziwa ngabazalwana noodade bethu abaye banikela ngexesha nobuchule babo ngokuzithandela. (1 Kron. 28:21) Amawaka aba basebenzi bokuzithandela bazigcina ezi zakhiwo zisemgangathweni ngokwenza nawuphi na umsebenzi ofunekayo. (2 Kron. 34:8) Ekubeni lo msebenzi uyinxalenye yenkonzo engcwele, abo bancedayo bazinikela ngokuzithandela, bengafuni mbuyekezo ngenxa yoku, kanye njengokuba bengenakufuna ntlawulo ngokushumayela kwindlu ngendlu, ngokunikela iintetho zesidlangalala ebandleni, okanye ngokunceda kwiindibano. La matsha-ntliziyo anceda ngesisa ekwenzeni iiplani nokwakha iindawo zokunqula ukuze kudunyiswe uYehova. Ngenkuthalo anceda kwizinto ezinjengokuzalisa amaxwebhu asemthethweni, ukugcina iingxelo zemali, imiba yezentengo nasekubaleni inani lezinto zokwakha ezifunekayo. Aba bakhonzi banyanisekileyo bakaYehova abafuni ntlawulo okanye abathi nangayiphi na indlela bafune inzuzo yokuphathekayo enoba kungokuthe ngqo okanye ngenye indlela ngenxa yemisebenzi abayenzayo, ekubeni bonke ubuchule nobuncwane babo bebunikele kuYehova. (Bona UBulungiseleli Bethu BoBukumkani bukaFebruwari 1992, iphepha 3, isiqendu 10.) Lo msebenzi ufuna abasebenzi abakhutheleyo abenza imisebenzi yabo “ngokwasemphefumlweni, kunge kukwiNkosi.”—Kol. 3:23.
15 Yintoni ke ngoko ebangela ukukhuthala kwabantu bakaYehova kukhetheke? Ngumoya wokupha. Ukupha kwabo ngobubele akuphelelanga nje kwimali okanye kwizinto eziphathekayo—‘bazinikela ngeentliziyo.’ (INdu. 110:3, akekeliswe sithi.) Lo ngundoqo wokuzahlulela kwethu kuYehova. Sivuzwa ngendlela ekhethekileyo. Sifumana ‘uyolo olungakumbi’ yaye ‘sivuna ngokuyintabalala’ ngenxa yokuba oko sikwenzayo kuyaxatyiswa ngabanye, abathi bona basibuyisele. (IZe. 20:35; 2 Kor. 9:6, NW; Luka 6:38) Oyena Mphi wethu mkhulu nguBawo wethu wasezulwini, uYehova, ‘othanda umphi ochwayitileyo.’ (2 Kor. 9:7) Yena uya kusibuyisela kalikhulu, ngeentsikelelo eziya kuhlala zikho ngonaphakade. (Mal. 3:10; Roma 6:23) Ngoko xa unikwa amalungelo enkonzweni kaYehova, ngaba uya kuzinikela ngokuzithandela uze uphendule njengokuba uIsaya wenzayo: “Ndikho, thuma mna”?—Isa. 6:8.