Yiba Nesabelo Kumsebenzi Ongasokuze Uphinde Wenziwe
1 Ngezihlandlo ezahlukahlukeneyo kwimbali yoluntu, kwakuye kufuneke uYehova azigwebe iintshaba zakhe. Noko ke, ngenxa yenceba yakhe, wayebavulel’ ithuba lokusinda abo bantliziyo zilungileyo. (INdu. 103:13) Ukusinda kwabo kwakuxhomekeka kwindlela abasabela ngayo.
2 Ngokomzekelo, ngaphambi koMkhukula, ngowama-2370 B.C.E., uNowa ‘wayengumshumayeli wobulungisa.’ Abo bangazange basifak’ engqondweni isilumkiso sikaThixo batshatyalaliswa. (2 Pet. 2:5; Heb. 11:7) Ngaphambi kokutshatyalaliswa kweYerusalem ngowama-70 C.E., uYesu wakuchaza ngokucacileyo oko kwakuya kufuneka umntu akwenze ukuze asinde ekuphanzisweni kweso sixeko. Bonke abo bangazange basithobele isilumkiso sakhe behlelwa yinto ebuhlungu. (Luka 21:20-24) Izilumkiso nemigwebo kaThixo enjalo yaphindaphindwa izihlandlo ezininzi kuyo yonke imbali.
3 Umsebenzi Wanamhlanje Wokulumkisa: Kude kudala uYehova wathi umsindo wakhe wayeza kuwuphalazela kule nkqubo ingendawo yanamhlanje aze asindise abalulamileyo kuphela. (Zef. 2:2, 3; 3:8) Ixesha lokushumayela esi silumkiso liyaphela! “Imbandezelo enkulu” isemnyango, yaye ngoku kuhlanganiswa abalulamileyo. Okunene, “amasimi” ‘amhlophe ukuba kuvunwe.’ Ngenxa yoko, awukho omnye umsebenzi obaluleke nongxamiseke njengalo.—Mat. 24:14, 21, 22; Yoh. 4:35.
4 Simele sibe nesabelo ekuhlokomiseni isilumkiso sanamhlanje kwabanye, “nokuba bathe beva, nokuba bathe bala.” Esi sisabelo esisinikwe nguThixo esingamele sisityeshele. (Hez. 2:4, 5; 3:17, 18) Ukuba nesabelo ngokuzeleyo kulo msebenzi kubonakalisa ngokucacileyo uthando lwethu olungazenzisiyo ngoThixo, inkxalabo yokwenene ngabamelwane bethu nokholo lwethu olungenakushukunyiswa kuMsindisi wethu, uYesu Kristu.
5 Ngoku Lixesha Lokuthabatha Inyathelo: Emva kwemigwebo kaYehova kwixa elidluleyo, ubungendawo babusoloko buvuka phantsi ngenxa yokuba uSathana needemon zakhe babesaphila. Noko ke, ngoku akayi kusinda. Impembelelo kaSathana iya kupheliswa. Isilumkiso esiya kumhlaba wonke ‘esingembandezelo enkulu’ esondelayo asisayi kuphinda sifuneke. (ISityhi. 7:14; Roma 16:20) Sinelungelo elikhethekileyo lokuba nenxalenye kulo msebenzi ungasokuze uphinde wenziwe. Ngoku lixesha lokuba silisebenzise kakuhle eli thuba.
6 Mayela nomsebenzi wakhe wokushumayela, umpostile uPawulos, eqiniseke ngokupheleleyo, wathi: “Ndimsulwa egazini labantu bonke.” (IZe. 20:26) Akazange azive enetyala legazi ngokusilela ukuhlokomisa isilumkiso. Ngoba? Ngenxa yokuba wathi ngobulungiseleli bakhe: “Ngenxa yoku ndisebenza nzima ngenene, ndizibhokoxa.” (Kol. 1:29) Nathi masibe nolwaneliseko olunjalo lokuba nesabelo ngokuzeleyo kangangoko kunokwenzeka kulo msebenzi ungasokuze uphinde wenziwe!—2 Tim. 2:15.