Indlela Amalungu Entsapho Asebenzisana Ngayo Ukuze Abe Nenxaxheba Ngokuzeleyo—Kwiintlanganiso Zebandla
1 Iintsapho zamaKristu zimele ziwuthobele umyalelo wokuhlanganisana kunye kwiintlanganiso zebandla. (Heb. 10:24, 25) Ngokusebenzisana kakuhle, bonke bangakwazi ukulungiselela, ukubakho, nokuba nenxaxheba kwiintlanganiso. Iimeko zeentsapho ziyahluka, kodwa kukho izinto umyeni ongumKristu, umfazi okholwayo, okanye umzali ongenaqabane angazenza ukuze akhuthaze ubunye kwimibandela yokomoya, lingakhathaliseki inani labantwana ekhayeni nobudala babo.—IMize. 1:8.
2 Ziphe Ixesha Lokulungiselela: Amalungu entsapho ayasebenzisana ukuqinisekisa ukuba ngamnye uzilungiselele kakuhle iintlanganiso zebandla. Abaninzi baxubusha kunye inqaku leeveki ngeeveki leSifundo seMboniselo. Bambi balungiselela iSifundo Sencwadi Sebandla okanye bafunde kunye njengentsapho ufundo lweBhayibhile lweeveki ngeeveki. Injongo kukufumana iingongoma ezingundoqo ngaphambi kokuba kuyiwe ezintlanganisweni. Ngaloo ndlela, bonke baya kungenelwa ngakumbi koko bakuvileyo yaye baya kuxhotyiselwa ukuba babe nenxaxheba xa kuvela ithuba.—1 Tim. 4:15.
3 Ceba Ukuba Nenxaxheba: Wonke umntu entsatsheni ufanele abe nosukelo lokuvakalisa ithemba phambi kwabanye ngokugqabaza ezintlanganisweni. (Heb. 10:23) Ngaba ilungu lentsapho lifuna uncedo okanye ukhuthazo ukuze likwenze oku? Luluphi uncedo ngamnye alufunayo ekulungiseleleni izabelo zeSikolo Sobulungiseleli Sobuthixo? Abafazi baba noxabiso xa abayeni babo bebonakalisa umdla yaye mhlawumbi benikela uluvo ngomzekeliso ofanelekileyo okanye indlela efanelekileyo enokucetywa ngayo intetho. Abazali abafanele bavakalelwe kukuba bafanele balungiselele iintetho zabantwana babo abaselula. Ukwenjenjalo kunokwenza umntwana angakwazi ukuziqalela izinto. Kodwa abazali banokubanceda abaselula yaye baphulaphule njengokuba beqhelisela ngokuvakalayo.—Efe. 6:4.
4 Lungiselela Ukubakho: Abantwana banokufundiswa besebancinane ukuba banxibe baze balungele ukuya ezintlanganisweni ngexesha elimisiweyo. Amalungu entsapho afanele abambisane ekunyamekeleni imisebenzi yekhaya ukuze kungabikho kulibaziseka.—Bona amacebiso kwincwadi ethi Ulonwabo Lwentsapho, iphepha 112, nethi Abantu Abaselula Bayabuza, iphepha 316-17.
5 Abazali nabantwana ngokufanayo banokucingisisa ngamazwi kaYoshuwa wamandulo, owathi: “Ke mna nendlu yam siya kukhonza uYehova.” Ngoko ke zimisele ukuba nenxaxheba ngokuzeleyo kwiintlanganiso zebandla.—Yosh. 24:15.