Ngaba Ubona Imbonakalo Yangaphandle Kuphela?
1 Xa sikubulungiseleli bethu basesidlangalaleni, indlela esibakhangela ngayo abanye abantu xa siqala ukubabona inokusenza sikuthandabuze ukwabelana nabo ngeendaba ezilungileyo. Ngokomzekelo, ubuya kusabela njani ukuba isigantsontso sendoda sisoloko sikukrwaqula ngamehlo akrokrayo xa utyelele ummelwane wayo obonise umdla enyanisweni? Udade othile onguvulindlela wajamelana nemeko efanayo waza wagqiba ekubeni aye kule ndoda aze athethe nayo. Yambulisa krwada. Kodwa, ngokungalindelekanga, yasiphulaphula isigidimi seBhayibhile yaye ngehlombe yamkela isifundo. Ngenxa yokuba lo dade engazange agwebe ngokwembonakalo yangaphandle, kwavuleka ithuba lokuba le ndoda nomfazi wayo bafunde inyaniso.
2 Omnye udade wayesoyikiswa yinkangeleko yangaphandle yomfana owayeneenwele ezinde kodwa wazingisa enikela ubungqina kuye nanini na esiza evenkileni awayesebenza kuyo. Imigudu yakhe yathwala isiqhamo, kuba kungokunje lo mfana liNgqina elibhaptiziweyo. Yintoni eya kusithintela ekubeni senze isigqibo ngokungxama sokuba abo banjalo abayi kuphulaphula?
3 Ukuxelisa Umzekelo KaYesu: UYesu wayesazi ukuba wayeza kunikela ngobomi bakhe kuwonke wonke. Ngenxa yoko, akazange atyhafiswe yinkangeleko yangaphandle yabanye. Wayeqonda ukuba kwanabo babesaziwa ngehambo embi babenokukulungela ukuguquka ukuba banikwa uncedo oluyimfuneko nokhuthazo. (Mat. 9:9-13) Wazama ukunceda abazizityebi nabangamahlwempu. (Mat. 11:5; Marko 10:17-22) Ngamana asingebagwebi abantu esidibana nabo entsimini ngenkangeleko yabo yangaphandle, size singakuboni oko kunokuba yintliziyo elungileyo. (Mat. 7:1; Yohane 7:24) Yintoni enokusinceda sixelise umzekelo kaYesu obalaseleyo?
4 Ngokufundisisa kwethu iBhayibhile, siye saqonda ukuba iLizwi likaThixo linamandla okuguqula indlela ubani acinga ngayo, ihambo nobuntu bakhe. (Efe. 4:22-24; Heb. 4:12) Ngoko ke, sifanele sibe nesimo sengqondo esakhayo size okunye sikushiyele ezandleni zikaYehova, Lowo ufunda iintliziyo zabantu.—1 Sam. 16:7; IZe. 10:34, 35.
5 Ngamana ukwabelana kwethu neendidi zonke zabantu ngeendaba ezilungileyo ngokungenamkhethe, kungakhathaliseki ukuba injani inkangeleko yabo yangaphandle, kungafak’ isandla kumsebenzi omkhulu wokuvuna kule mihla yokugqibela.—1 Tim. 2:3, 4.