‘Ukuvavanyelwa Ukufaneleka’—Njani?
1 Ekubeni kukho ulwando oluqhubekayo entlanganweni kaYehova, kukho imfuneko eqhubekayo yabazalwana abafanelekayo abaza kukhonza njengezicaka zolungiselelo. Inkoliso yabazalwana abangekamiselwa, abaquka abakwishumi elivisayo, banomnqweno wokukhonza ebandleni. Xa babelwe umsebenzi ongakumbi, baziva besebenziseka yaye baba nemvo yokufeza okuthile. Ukuhambela kwabo phambili kuxhomekeke ‘ekuvavanyelweni ukufaneleka.’ (1 Tim. 3:10) Kwenziwa njani oku?
2 Indima Yabadala: Njengenxalenye yokuhlolisisa umzalwana ngeemfaneleko ezingokweZibhalo zezicaka zolungiselelo ezifumaneka kweyoku-1 kuTimoti 3:8-13, abadala baya kondela indlela umzalwana ayinyamekela ngayo imbopheleleko ayinikiweyo. Banokumabela ukuba enze iinkonzo eziluncedo ezinxibelelene nokusingatha amaphephancwadi noncwadi, ukunyamekela izandisi-lizwi, ukunyamekela iHolo yoBukumkani nezinye izinto. Abadala baya kujonga indlela asabela ngayo nazinyamekela ngayo izabelo zakhe. Baya kukhangela iimpawu ezinjengokuthembeka, ukubamba ixesha, ukukhuthala, ukuthozama, umoya ovumayo, nokukulungela ukusebenzisana nabanye. (Fil. 2:20) Ngaba ungumzekelo kwindlela yakhe yokunxiba neyokuzilungisa? Ngaba ungumntu onokusingatha imbopheleleko? Bafuna ukubona ‘imisebenzi yakhe kwihambo entle enobulali nobulumko.’ (Yak. 3:13) Ngaba uyazibhokoxa ukuze abe luncedo ebandleni? Ngaba uyawuphumeza umyalelo kaYesu ‘wokwenza abantu abafundi’ ngokuba nesabelo ngenzondelelo kubulungiseleli basentsimini?—Mat. 28:19; bona IMboniselo kaSeptemba 1, 1990, iphepha 18-28.
3 Ngoxa iBhayibhile ingena budala buqingqiweyo bokuba ubani amiselwe njengesicaka solungiselelo, ibhekisela kwabo bazalwana ‘njengamadoda alungiselela kakuhle.’ Besingenakulindela ukuba babe basaqala ishumi elivisayo okanye baphakathi kulo, ngokukodwa ekubeni kukhankanywa ukuba basenokuba nabafazi nabantwana. (1 Tim. 3:12, 13) Amadoda anjalo akafanele azinikele ‘kwiinkanuko zobutsha’ kodwa afanele aziphathe ngendlela enesidima, enokuma okuhle nesazela esicocekileyo phambi koThixo nabantu.—2 Tim. 2:22.
4 Ngoxa ubuchule bokwemvelo busebenziseka, isimo sengqondo nomoya ubani awubonisayo zezona zinto zibalulekileyo. Ngaba lo mzalwana ngokuthobeka unqwenela ukudumisa uThixo aze akhonze abazalwana bakhe? Ukuba kunjalo, uYehova uya kuyisikelela imigudu yakhe yokwenza inkqubela ebandleni.