Inyani Singayifumana EBhayibhileni
Sele kulithuba elide abantu beyikholelwa iBhayibhile ukuba ithetha inyani. Nakule mihla, abantu abaninzi basazenza izinto ezithethwa yiyo. Abanye bakholelwa ukuba iphelelwe lixesha yaye yincwadi yamabali. Ngaba wena uyayikholelwa iBhayibhile ukuba ithetha inyani?
INTO ENOKWENZA UYITHEMBE IBHAYIBHILE
Zikhona izinto ezinokwenza uyithembe iBhayibhile, masenze umzekelo: Andithi umhlobo wakho ohlala ekuxelela inyani ngalo lonke ixesha uyamthemba? Ngaba nayo iBhayibhile ihlala ithetha inyani njengaloo mhlobo? Jonga le mizekelo.
Abantu Ababeyibhala Babethetha Inyani
Abantu abayibhalayo bathetha inyani, babede bathethe nangezinto abangazenzanga kakuhle. Ngokomzekelo, umprofeti uYona wabhala ngokungamameli kwakhe. (Yona 1:1-3) Kwisahluko sokugqibela sencwadi yakhe awayibhalayo usixelela ukuba uThixo akazange ayithande into awayenzayo. Akasiqhayiseli ukuba wayilungisa njani loo nto. (Yona 4:1, 4, 10, 11) Bonke ababhali beBhayibhile babeyithanda kakhulu inyani.
Inezinto Ezisincedayo
Ngalo lonke ixesha, iBhayibhile ihlala isixelela izinto ezisincedayo. Ngokomzekelo, xa isicebisa ngendlela yohlala sivana nabantu ithi: “Zonke izinto, ngoko, enifuna abantu bazenze kuni, yenzani ngokunjalo nani kubo.” (Mateyu 7:12) Iphinda ithi: “Impendulo, xa inobulali, isusa umsindo, kodwa ilizwi elibangela intlungu linyusa umsindo.” (IMizekeliso 15:1) IBhayibhile isasinceda, ayiphelelwanga lixesha.
Ithetha Inyani Ngezinto Ezenzeka Kudala
Abaphandi bezinto zakudala bayavuma ukuba abantu ekuthethwa ngabo eBhayibhileni babekhe baphila, nezinto ethi zenzeka ziyinyani, ibe neendawo ethetha ngazo zisekhona. Ngokomzekelo, nantsi enye yezinto abavumayo ukuba yenzeka. IBhayibhile ithi ngexesha likaNehemiya, amaFenike aseTire awayehlala eYerusalem ‘ayesizisa iintlanzi nalo lonke uhlobo lwezorhwebo.’—Nehemiya 13:16.
Abaphandi bathi ikhona into abayifumeneyo ngale nto ithethwa yiBhayibhile. Bafumene izinto zamaFenike kwaSirayeli, loo nto ibonisa ukuba babethengiselana nyhani. Enye into, xa babesemba eYerusalem, bafumana amathambo eentlanzi zolwandle iMeditera. Baqikelela ukuba ezo ntlanzi zazithengiswa ngabantu abahlala ngaselwandle. Emva kokuba ejonge yonke loo nto, omnye umphandi wathi: “Ezi zinto zembiweyo zibonisa ukuba abantu baseTire babezithengisa nyhani iintlanzi eYerusalem, ngokutsho kukaNehemiya 13:16.”
Ithetha Inyani Nangesayensi
Ezona zinto iBhayibhile ethetha ngazo kakhulu nguThixo nezinto ezenzeka kudala. Naxa ithetha ngesayensi, ithetha inyani. Nanku umzekelo.
Kwiminyaka ephantse ibe yi-3 500 eyadlulayo, iBhayibhile yathi umhlaba uxhonywe “kokungento.” (Yobhi 26:7) Kanti kwakukho amabali athi umhlaba udada phezu kwamanzi, amanye esithi ufunqulwe lufudo. Kwadlula iminyaka eyi-1 100 uYobhi ethe umhlaba ume emoyeni, kodwa abantu abazange bayithembe loo nto. Kutshanje kwiminyaka eyi-300 edluleyo, kusandul’ ukufunyaniswa ukuba umhlaba ume emoyeni. Loo nto yathethwa nguIsaac Newton ngo-1687. Le nto bayithethe emva kweminyaka eyi-3 000 iBhayibhile iyithethile.
IBhayibhile Iyachana Nakwiziprofeto
Ngaba iBhayibhile iyayichaza into ize yenzeke? Khawucinge nje ngesiprofeto sikaIsaya esasisithi iBhabhiloni iza kutshabalala.
Isiprofeto: Kudala umprofeti uIsaya wathi, iBhabhiloni eyayisele iza kulawula umhlaba, yayiza kutshatyalaliswa, ingaphinde ihlale abantu. (Isaya 13:17-20) UIsaya wathi nguKoreshi owayeza kuyitshabalalisa. Wachaza nokuba uKoreshi uza ‘komisa’ imilambo. Wade wathi uza kufika iingcango zeBhabhiloni zivulekile.—Isaya 44:27–45:1.
Yenzeka La Nto Yayiprofetiwe: Emva kweminyaka eyi-200 uIsaya ethethe loo nto, ukumkani wasePersi wayihlasela iBhabhiloni. Loo kumkani yayinguKoreshi. Ekubeni kwakunzima ukungena eBhabhiloni, uKoreshi wasebenzisa uMlambo UmEfrati owayeyijikelezile, amajoni akhe avula emacaleni omlambo, amanzi aphuma ade amancinci. Wakwazi ukuwela namajoni akhe kuba amanzi ayemancinci. Nabantu baseBhabhiloni babezishiye zivulekile iingcango zesixeko. Ngoko uKoreshi wangena ezo ngcango zivulekile, wayitshabalalisa iBhabhiloni.
Kodwa nantsi enye into: Ngaba bakhona abantu abahlala eBhabhiloni? Babekhe bahlala abantu ixesha elide apho. Kodwa ngoku akusekho mntu uhlalayo eBhabhiloni kufutshane neBaghdad, eIraq. Yenzeka into eyathethwa yiBhayibhile. IBhayibhile isoloko ithetha inyani naxa ichaza into eza kwenzeka.