Bazali—Bethelelani Imikwa Eluncedo Kubantwana Benu
1 Imikhwa eluncedo ayizuzwa njengelifa, ingafunyanwa nangamabona-ndenzile. Ukongezelela ukubethelela imikhwa emihle ebantwaneni, kufuna ixesha elininzi. “Ukubethelela” kuthetha “ukungenisa into ngokuthe ngcembe” okanye “ukuyingenisa kancinane kancinane.” Kufuneka balungelelane abazali ukuze ‘baqhubeke bekhulisela [abantwana babo] kwingqeqesho nasekweyiselweni kwengqondo kuYehova.’—Efe. 6:4.
2 Qala Kwasebusaneni: Amandla abantwana abasebancinane okufunda nawokwenza izinto ezintsha angummangaliso. Ngoxa kunzima kubantu abadala ukufunda ulwimi olutsha, abantwana abangekaqalisi esikolweni banokufunda iilwimi ezimbini okanye ezintathu ngaxesha-nye. Ungaze uvakalelwe kukuba umntwana wakho usemncinane kakhulu ukuba angahlakulela imikhwa emihle. Ukuba imfundo yeenyaniso zeBhayibhile iqaliswa kwangethuba yaye iyaqhubeka, xa umntwana emdadlana, ingqondo yakhe iya kuzaliswa lulwazi oluya kumenza abe ‘nobulumko obusa elusindisweni.’—2 Tim. 3:15.
3 Kwenze Umkhwa Ukuya Kwinkonzo Yasentsimini: Umkhwa omhle ofanele ubethelelwe ngexesha lokukhula komntwana ngowokushumayela iindaba ezilungileyo zoBukumkani bukaThixo rhoqo. Abazali abaninzi bakuqalisa oku ngokuhamba nabantwana babo kubulungiseleli bendlu ngendlu ngoxa abantwana beseziintsana. Ukubakho rhoqo kwabazali kumsebenzi wokunikela ubungqina kunceda abantwana babo babe noxabiso nenzondelelo ngobulungiseleli. Abazali banokubonisa abantwana indlela yokuba nesabelo ekunikeleni ubungqina kwinkalo nganye yenkonzo yasentsimini.
4 Ukubhalisa kwiSikolo Sobulungiseleli Sobuthixo nako kuyabanceda abantwana. Sibafundisa imikhwa emihle yokufundisisa nendlela yokufunda ngokuqonda. Bafunda ukuncokola ngeBhayibhile, ukwenza amabuyelo nokuqhuba izifundo zeBhayibhile. Uqeqesho olunjalo lunokubashukumisela ukuba babe ngoovulindlela baze bazabalazele amalungelo akhethekileyo enkonzo. Abaninzi abakhonza eBheteli nabavangeli basemazweni bakhumbula imihla yabo yamandulo kwesi sikolo baze basikhumbule njengelungiselelo elabanceda bakhulisa imikhwa eluncedo.
5 Sonke sinjengodongwe ezandleni zoMbumbi oMkhulu, uYehova. (Isa. 64:8) Xa lusathambile udongwe kulula ukulubumba. Xa lomile kuba nzima ukulubumba. Kunjalo nangabantu. Xa beselula, bafundiseka lula—yaye kuhle xa kuqalwa beselula. Xa beselula kulula ukubabumba, yaye oko kunokuba nemiphumo emihle okanye emibi. Njengomzali okhathalayo, qala beselula ukubethelela imikhwa eluncedo ebantwaneni bakho kubulungiseleli bamaKristu.