Indlela Yokweyisela Abanye
1 Umpostile uPawulos wazenzela igama ngokuba ngumlungiseleli okwaziyo ukweyisela. (IZe. 19:26) KwanoKumkani uAgripa wamxelela esithi: “Ngexesha elifutshane ubuya kundeyisela ekubeni ndibe ngumKristu.” (IZe. 26:28) Yintoni eyenza uPawulos wayinkunkqele yokweyisela kubulungiseleli bakhe? Wayenobuchule bokuqiqa ngokusuka eZibhalweni, evisisanisa iingxoxo zakhe nabaphulaphuli bakhe.—IZe. 28:23.
2 Nathi njengoPawulos, kufuneka sikwazi ukweyisela kubulungiseleli bethu. Njani? Ngokusebenzisa ukuqonda xa sithetha naxa siphulaphule abanye. (IMize. 16:23) La manyathelo mathathu abalulekileyo aya kusinceda senze oku.
3 Phulaphula Ngenyameko: Xa omnye umntu ethetha, phulaphula ukuze ufumane into enivisisana ngayo. Ukuba uyachasa, zama ukuqonda isizathu soko. Kuya kukunceda ukuze uqonde oko akukholelwayo, isizathu sokukholelwa, nento eyambangela wakholelwa kuloo nto. (IMize. 18:13) Ngobuchule menze athethe.
4 Buza Imibuzo: Ukuba umntu ukholelwa kuBathathu Emnye, umele umbuze ukuba: “Ngaba ubusoloko ukholelwa kuBathathu Emnye?” Landelisa ngokuthi: “Ngaba wakha waphanda ngokucokisekileyo ngoko kuthethwa yiBhayibhile ngalo mbandela?” Usenokubuza uthi: “Ukuba uThixo ebeyinxalenye kaBathathu Emnye, ngaba asimele kulindela ukuba iBhayibhile ikutsolise oko?” Impendulo oyifumanayo iya kukunceda uqiqe nalo mntu ngoko kuthethwa ziZibhalo.
5 Sebenzisa Ingqiqo: Elinye iNgqina labuza ibhinqa elalikholelwa ukuba uYesu nguThixo: ‘Ukuba ubuzama ukundicacisela ukuba abantu ababini bayalingana, luluphi ulwalamano lwentsapho obuya kulusebenzisa?’ Laphendula lathi: “Bendinokuzekelisa ngomntu nomntakwabo.” Longezelela lathi: “Mhlawumbi kwanamawele.” Kodwa xa uYesu wayesifundisa ukumgqala uThixo njengoYise yena njengoNyana, wayefundisa ntoni?” Eli bhinqa layifumana ingongoma yokuba omnye mdala yaye unegunya elingaphezulu. (Mat. 20:23; Yoh. 14:28; 20:17) Intliziyo nengqondo yakhe zafikelelwa ngobuchule bokweyisela.
6 Kakade ke, asingabo bonke abayamkelayo inyaniso, kungakhathaliseki enoba intshumayelo yethu isengqiqweni yaye ichane kangakanani na. Kodwa, njengoPawulos, masizimisele ukukhangela abantliziyo zinyanisekileyo entsimini yethu, sibeyisele ukuba bamkele isigidimi soBukumkani.—IZe. 19:8.