Ngaba Umsebenzi Wakho Ungumqobo Ekushumayeleni?
1 Inkoliso yabantu baphila ubomi obuxakekileyo. AmaNgqina kaYehova aphakathi kwabona bantu baxakekileyo—afundisisa iLizwi likaThixo, aya kwiintlanganiso zebandla aze aye kwinkonzo yasentsimini. Ukongezelela, siyasebenza ukuze sizixhase, sixakekile ngumsebenzi wasekhaya okanye owasesikolweni nezinye iimbopheleleko, zonke ezi zinto zifuna ixesha. Oku kulucelomngeni lokwenene kwiintloko-ntsapho.
2 Ngenxa yemeko yezoqoqosho engazinzanga kwiindawo ezahlukeneyo, iintloko-ntsapho kusenokufuneka ukuba zisebenze nzima ixesha elide ukuze zikwazi ukuzixhasa. Ngoxa umsebenzi wempangelo usenokuthabatha ixesha lazo elininzi namandla, zisala nexesha elincinane kwaye zingenamandla angako okwenza umsebenzi wokushumayela. Ekubeni zinembopheleleko yokuxhasa iintsapho zazo ngokwenyama, zimbi zinokuvakalelwa kukuba zinokuba nesabelo esilinganiselweyo kubulungiseleli. (1 Tim. 5:8) Kuyavunywa ukuba namhlanje kukho ingcinezelo enkulu ngokuphathelele ukunyamekela iimfuno zobomi. Kodwa umsebenzi kabani awumele ube ngumqobo ekushumayeleni iindaba ezilungileyo. (Marko 13:10) Ngenxa yoko, senza kakuhle ukuba sihlolisisa imeko yethu.
3 Ekubeni imeko yehlabathi isoloko iguquka, intloko-ntsapho isenokutyekela ekuchitheni ixesha elingakumbi emsebenzini, ngenjongo yokuziqwebela imali isenzela amaxesha kaxakeka. (1 Kor. 7:31) Ngoxa ukuzibhokoxa ngakumbi emsebenzini wokuziphilisa kusenokwandisa amathuba okufumana izinto eziphathekayo ezingakumbi okanye kuvelise amathuba angakumbi okuzihlaziya nokuzonwabisa, ngaba oku kuya kuyonwabisa ngakumbi intsapho ize yaneliseke ukuba kutyeshelwa izinto zokomoya nokuya rhoqo kwiintlanganiso? Ngokuqinisekileyo sifuna ukuyiphepha nantoni na enokwenzakalisa impilo yethu yokomoya. Ukuthobela isiluleko sikaYesu sokuba ‘siziqwebele ubuncwane ezulwini’ size sibe ‘zizityebi kuThixo’ likhondo lobulumko.—Mat. 6:19-21; Luka 12:15-21.
4 Funa Izilangazelelo ZoBukumkani Kuqala: UYesu wafundisa abalandeli bakhe ukuba babeke izinto zokomoya phambi kwayo nayiphi na enye into. Wababongoza wathi: “Musani ke ukuxhala nisithi, ‘Siza kudla ntoni na?’ okanye, ‘Siza kusela ntoni na?’ okanye, ‘Siza kunxiba ntoni na?’” Kwakutheni ukuze atsho? Wathi: “Kuba uYihlo osemazulwini uyazi ukuba ziyimfuneko kuni zonke ezi zinto.” Ukuba siyakukholelwa ngokwenene oko, akusayi kubakho nto iya kusithintela ekwenzeni oko kwatshiwo nguYesu ngokulandelayo: “Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.” UThixo uya kuqinisekisa ukuba sinazo izinto eziyimfuneko! (Mat. 6:31-33) Ngokuqinisekileyo eli asiloxesha lokuxhalabela izinto zobomi okanye ukunqwenela ukuphila ubomi obutofotofo kule nkqubo yezinto eza kudlula ngokukhawuleza.—1 Pet. 5:7; 1 Yohane 2:15-17.
5 Injongo eyintloko yomsebenzi kukuzixhasa ngokwezinto eziphathekayo. Kodwa kungakanani esikufunayo? Umpostile uPawulos wabhala: “Ukuba sinesixhaso nesambatho, masaneliswe zezo zinto.” Ngaba sizama ukufumana ngaphezu koko? Ukuba kunjalo, sinokuvuna imiphumo awalumkisa ngayo uPawulos xa wathi: “Abo bazimisele ukuba zizityebi beyela ekuhendweni nasemgibeni, nakwiminqweno emininzi engekho ngqiqweni neyenzakalisayo, ekhokelela entshabalalweni nasekonakaleni.” (1 Tim. 6:8, 9; Mat. 6:24; Luka 14:33) Sinokubona njani ukuba siqanyangelwa yiminqweno egqithiseleyo?
6 Ukuba ngenxa yempangelo sinesabelo esingephi kwinkonzo yasentsimini okanye asisiboni isizathu sokuzincama ngenxa yeendaba ezilungileyo, kukho imfuneko yokuba silungelelanise usukelo lwethu. (Heb. 13:15, 16) Ubomi obulula buya kuba luncedo ekupheliseni olu celomngeni kumsebenzi wethu wokushumayela. Izilangazelelo zoBukumkani zifanele zibe kwindawo yokuqala ngalo lonke ixesha sisebenzisa amandla ethu.
7 Umsebenzi Ongelolize: Amazwi kaPawulos asoloko esikhuthaza ukuba sibe ‘nokuninzi kokwenza emsebenzini weNkosi, sisazi ukuba ukusebenza kwethu akulolize eNkosini.’ (1 Kor. 15:58) Owona ‘msebenzi weNkosi,’ uyintloko kukushunyayelwa koBukumkani nokwenziwa kwabafundi. (Mat. 24:14; 28:19, 20) Ukuze sibe nesabelo ngokuzeleyo kangangoko kunokwenzeka, sifanele sicwangcise ixesha lenkonzo yasentsimini veki nganye size elo xesha singalisebenziseli enye into. (Efe. 5:15-17) Uya kwandula ke umsebenzi okanye nayo nantoni, ingabi ngumqobo kubulungiseleli bethu.
8 Xa sizibhokoxa ekwabelaneni nabanye ngeenyaniso zeBhayibhile, sinandipha ulonwabo olungathethekiyo olubangelwa kukupha. (IZe 20:35) Ngokuzibhokoxa kumsebenzi wokushumayela ngoBukumkani, sinokukhangela kwikamva ngentembelo, kuba “uThixo akanantswela-bulungisa ukuba angawulibala umsebenzi [wethu] nothando [esalubonisayo] ngegama lakhe.”—Heb. 6:10.