Fundisa Abanye Ulwimi Olusulungekileyo
1 Nangona ephuma ‘kwiintlanga, izizwe nezizwana, neelwimi,’ amaNgqina kaYehova amanyene, yaye abubuzalwana bokwenene bezizwe ngezizwe. (ISityhi. 7:9) Oko kuyaphawuleka kweli hlabathi lanamhlanje lahluleleneyo. Kwenzeka njani oku? Isizathu kukuba ‘sitshintshelwe kulwimi olusulungekileyo.’—Zef. 3:9.
2 Imiphumo Emihle: Yintoni olu lwimi lusulungekileyo? Kukuyiqonda kakuhle inyaniso efumaneka kwiLizwi likaThixo ephathelele uYehova neenjongo zakhe, ngokukodwa inyaniso engoBukumkani bukaThixo. Njengokuba waxela kwangaphambili nguYesu, le nyaniso isasazwa ngejelo elibonakalayo lasemhlabeni, “ikhoboka elithembekileyo neliyingqondi,” ibe umphumo kukuba abantu “abaphuma kuzo zonke iilwimi zeentlanga” bamkela unqulo lokwenyaniso.—Mat. 24:45; Zek. 8:23.
3 Njengoko abantu befunda ulwimi olunyulu, bashukunyiselwa ukuba bavisisanise ubomi babo nemilinganiselo kaYehova. Bafunda ‘ukumanyana engqondweni enye nasengcamangweni enye.’ (1 Kor. 1:10) Imfundiso yobuthixo ibenza babe nehambo entle, bathethe inyaniso, ingakumbi ephathelele ukuxelela abanye iindaba ezilungileyo. (Tito 2:7, 8; Heb. 13:15) Ezi nguqulelo zimangalisayo zizukisa uYehova.
4 Ngokomzekelo, indoda eyashunyayezwa iindaba ezilungileyo yayinemibuzo emininzi, eyaphendulwa ngeBhayibhile. Ichukunyiswe koko yayikuva, yaqalisa ukufunda kabini ngeveki yaza yaya nasezintlanganisweni. Yamangaliswa yindlela efudumeleyo eyamkelwa ngayo eHolweni yoBukumkani, ekubeni abantu abaninzi ababelapho yayingabantu bohlanga olwahlukileyo. Ngexesha elingephi, yona nenkosikazi yayo baguqula indlela ababephila ngayo baza babhaptizwa. Ukususela ngoko incede abanye abantu abangama-40 ukuba bakhonze uYehova, kwanamalungu amaninzi entsapho. Nangona inesiphene, isandula ukuba nguvulindlela.
5 Ukufundisa Abanye: Iziganeko zehlabathi zibangela ukuba abantu abaninzi abanyanisekileyo bahlolisise indlela abacinga ngayo nabaphila ngayo. NjengoYesu, sifanele sibe nomdla wokunceda abanye. Iindlela eziphumelelayo zokubuyela nezokuqhuba izifundo zeBhayibhile ngundoqo ekuncedeni abanyanisekileyo bafunde ulwimi olusulungekileyo.
6 Indlela ephumelelayo yokuqhubela abantu abaxakekileyo isifundo kukubafundela ixesha elifutshane umi emnyango. (km-XO 5/02 iphe. 1) Ngaba ukhe wayizama le ndlela? Xa ulungiselela ukubuyela, khetha intshumayelo eya kufanela umninimzi kwisihlomelo esikuBulungiseleli Bethu BoBukumkani bukaJanuwari 2002. Iintshumayelo ezininzi ezikwesi sihlomelo zilungiselelwe ukuba zikhokelele kwingxubusho yencwadana enemifanekiso ethi Okufunwa nguThixo okanye yencwadi ethi Ulwazi. Qhelisela loo ntshumayelo uyikhethileyo ukuze emva kwentshayelelo kube lula ukuxubusha esinye seziqendu. Khetha isibhalo esinye okanye ezibini kweso siqendu oza kuzifunda uze uzixubushe, yaye ubuze umbuzo wokuqukumbela. Oko kuya kukunceda utshayelele isiqendu oza kusixubusha kwixa elizayo.
7 Abantu bakaYehova bayasikelelwa ngenxa yokufunda ulwimi olusulungekileyo. Ngamana singazimisela ukunceda abanye ukuze basithelele ‘ekubizeni egameni likaYehova nokuze simkhonze ngaxhatha linye.’—Zef. 3:9.