Dumisa UYehova Ngokushumayela Ngokungacwangciswanga
1 Abakhonzi bakaYehova abathembekileyo basebenzisa amathuba avelayo okumdumisa suku ngalunye. (INdu. 96:2, 3; Heb. 13:15) Enye indlela yokwenza oko kukushumayela ngokungacwangciswanga. Uninzi lwabakhonzi bakaYehova namhlanje lunombulelo kuba lwafundiswa isigidimi soBukumkani ngokushumayela ngokungacwangciswanga.
2 Ukushumayela emntwini ngokungacwangciswanga kudla ngokuvula ithuba lokuba nabanye bafumane isigidimi soBukumkani. Ngokomzekelo, ukuncokola kukaYesu nebhinqa elingumSamariya kwiqula likaYakobi kwabangela ukuba abaninzi babe nomdla kwiindaba ezilungileyo. (Yoh. 4:6-30, 39-42) Ngoxa uPawulos noSilas babevalelwe eFilipi, bashumayela kumgcini-ntolongo, ibe yonke intsapho yaloo ndoda yayamkela inyaniso.—IZe. 16:25-34.
3 Amathuba Onawo: Ngawaphi amathuba onawo okushumayela ngokungacwangciswanga? Abanye bashumayela xa beyokuthenga, bekwizithuthi zikawonkewonke, okanye beye kwagqirha. Abanye bashumayela ebudeni bekhefu lasemsebenzini okanye lasesikolweni. Ukubeka nje enye yeempapasho zethu zeBhayibhile ekuhleni kunokwenza abanye bafune ukuqonda ngeenkolelo zethu.—1 Pet. 3:15.
4 Indlela Yokuqalisa: Enye intwazana eneminyaka esixhenxe ubudala neneentloni yayivile ezintlanganisweni indlela ekubaluleke ngayo ukuba wonke umntu ashumayele. Ngoko xa yayisiya evenkileni nonina, yafaka iincwadana ezinemifanekiso ezimbini kwibhegi yayo. Ngoxa unina wayexakekile ekhawuntarini, le ntombazana yahambisela elinye ibhinqa incwadana enemifanekiso, yaye layamkela ngezandla ezishushu. Xa yabuzwayo ukuba yayisifumana phi isibindi sokuya kuthetha neli bhinqa, le ntombazana ineentloni yathi: “Ndivele ndathi, Maxhalanga ndidleni! Ndatshona khona ke!”
5 Ukuze sishumayele ngokungacwangciswanga, sonke sifanele sizimisele njengale ntwazana. Yintoni enokusinceda? Kukuthandazela inkalipho yokuthetha. (1 Tes. 2:2) Kukulungiselela umbuzo othile okanye umbandela obangela umdla esinokuqalisa ngawo incoko. Nokuthemba ukuba uYehova uya kuyisikelela imigudu yethu.—Luka 12:11, 12.
6 Ukushumayela ngokungacwangciswanga kubantu esidibana nabo mihla le kudumisa uYehova yaye kusizisela uvuyo. Kusenokunceda mntu uthile afumane indlela ekhokelela kubomi obungunaphakade.