Umhlala-phantsi—Ngaba Lithuba Lokwandisa Inkonzo?
1 Abantu abaninzi abasebenza nzima balangazelela ixesha laxa beya kufumana umhlala-phantsi baze bakhululeke ekusebenzeni nzima nakwiingcinezelo zomsebenzi wempangelo. Noko ke, ngokufuthi ukudla umhlala-phantsi kubangela ukungakhathali, isithukuthezi, nokwaluphala ngaphambi kwexesha. Ukuba ubani akananto ibalulekileyo ayenzayo, unokuzibona sele ehlala ekhathazekile ngesiqu sakhe. Elinye iphephandaba laseBrazil lathi abaqeshwa abadla umhlala-phantsi bakhalazela iingxaki abazifumanayo ‘zokunganeliseki, uchuku, ukunganqabiseki nokuxhomekeka, nto ezo ezibangela ukuba bacinezeleke yaye baphile ubomi obungenanjongo.’
2 Ngokwahlukileyo kubo, amaKristu amaninzi awujonga umhlala-phantsi njengethuba lokuzibhokoxa ngakumbi kumsebenzi wokomoya. Omnye umzalwana owaqalisa ubuvulindlela emva kweeveki ezimbini egqibe iminyaka engama-65 ubudala wathi: “Kubo bonke ubomi bam andizange ndinandiphe ixesha elizaliswe ziintsikelelo njengale minyaka ilishumi idluleyo ndinguvulindlela.” Esinye isibini sabhala: “Eyona minyaka siyinandiphe ngakumbi ebomini bethu yeyaxa saqalisa ukuba ngoovulindlela.” Ewe, kwabaninzi, ukudla umhlala-phantsi kuvula ithuba elihle lokwandisa ubulungiseleli nokusikelelwa ngakumbi nguYehova.
3 Ukuxakeka Nokuba Nemveliso: Abaninzi abadla umhlala-phantsi bakhule bengabazi ubutofo-tofo bale mihla yaye baye bafunda ukusebenza nzima beselula. Nangona basenokuba abasenawo amandla obutsha, basengabasebenzi abanemveliso. Kwintsimi yelinye isebe, oovulindlela abangama-22 ekhulwini—abazalwana noodade abamalunga nama-20 000—ubuncinane baneminyaka engama-60 ubudala. Aba sele bekhulile bafak’ isandla ngakumbi entsimini. Amava abanawo neempawu zabo zobuthixo ziyintsikelelo kumabandla abakuwo.—Yak. 3:17, 18.
4 Ukuxakeka kubulungiseleli bamaKristu kufak’ isandla empilweni entle nakubomi obonwabileyo. Omnye udade oneminyaka engama-84 ubudala owaqalisa ubuvulindlela emva kokuba ethabathe umhlala-phantsi wathi: “Ukuqhuba izifundo zeBhayibhile nabantu abaninzi abanomdla kuye kwandinceda ndahlala ndithe qwa engqondweni. Andinanqwelo-mafutha, ngoko amaxesha amaninzi ndihamba ngeenyawo. Oko kundenza ndihlale ndisempilweni.”
Esinye isibini esikhulileyo esingoovulindlela sathi: “Inkonzo yenza iingqondo zethu zihlale zithe qwa yaye sisempilweni. Sisoloko sikunye. Sihlala sihleka yaye siyabunandipha ubomi.”
5 Ukukhonza Apho Kukho Imfuneko Enkulu Khona: Amanye amaKristu adla umhlala-phantsi iimeko zawo ziye zawavumela ukuba afudukele apho kukho imfuneko enkulu yabavakalisi boBukumkani. Abanye baye babandisa ubulungiseleli babo ngokukhonza kwintsimi ethetha ulwimi lwasemzini. Njengompostile uPawulos, aba bavakalisi banenzondelelo ‘benza zonke izinto ngenxa yeendaba ezilungileyo, ukuze babelane nabanye ngazo.’—1 Kor. 9:23.
6 Esinye isibini saqalisa ubuvulindlela emva kokuba sikhulise oonyana baso ababini. Emva kweminyaka emininzi singoovulindlela, saqalisa ukufunda isiTshayina. Ngoku sele siphakathi kwiminyaka yama-70 ubudala, siye savuyiswa kukubona iqela labantu abathetha isiTshayina esasisebenza nabo lisiba libandla. Hayi indlela eziyintsikelelo ngayo izibini ezifana nezi!
7 Akudliwa Mhlala-phantsi Entsimini: Ngoxa abantu abaninzi ekugqibeleni bethabatha umhlala-phantsi kwiindawo zabo zengqesho, akukho namnye umKristu odla umhlala-phantsi enkonzweni kaThixo. Onke amele aqhubeke ethembekile ‘kude kube sekupheleni.’ (Mat. 24:13, 14) Kakade ke, ngenxa yokukhula, abanye abasakwazi ukwenza okungakumbi enkonzweni kaYehova njengokuba kwakunjalo ngaphambili. Kodwa hayi indlela ekukhuthaza ngayo ukubabona besenza oko kusemandleni abo ngentliziyo yabo yonke! ILizwi likaThixo liyabaqinisekisa ukuba uYehova akasayi kuwulibala umsebenzi wabo nothando abaye balubonisa ngegama lakhe.—Luka 21:1-4; Heb. 6:10.
8 Ukuba usondela kubudala bokuba udle umhlala-phantsi, kutheni ungathandazi uze ucinge ngendlela onokuzisebenzisa ngokuzele ngayo iimeko zakho eziguqukayo? Ngoncedo lukaThixo, usenokufumanisa ukuba umhlala-phantsi ukuvulela umnyango wokwandisa inkonzo, nto leyo edumisa uYehova ize ikuzisele iintsikelelo.—INdu. 148:12, 13.