Xelisa Ukulunga KukaYehova
1 Emva kokondela ukutshona kwelanga okanye emva kwesidlo esiluncuthu, ngaba asishukunyiselwa ukuba simbulele uYehova, uMthombo wako konke ukulunga? Ukulunga kwakhe kusishukumisela ukuba sifune ukumxelisa. (INdu. 119:66, 68; Efe. 5:1) Singalubonakalisa njani uphawu lokulunga?
2 Kwabangakholwayo: Enye indlela esinokukuxelisa ngayo ukulunga kukaYehova kukuba nenkxalabo engazenzisiyo ngabo banokholo olungafaniyo nolwethu. (Gal. 6:10) Ukubonisa ukulunga kunokuba luncedo kwindlela ajongwa ngayo amaNgqina kaYehova nesigidimi esisishumayelayo.
3 Ngokomzekelo, ngoxa lalilinde esibhedlele, ityendyana lomzalwana elinguvulindlela lahlala ecaleni kwexhegokazi elalibonakala libambekile kunaye wonke umntu owayelapho. Xa kwafika ixesha lokuba lidibane nogqirha, lavumela elo xhegokazi ukuba lingene kuqala. Kamva lo mfana wadibana nalo kwakhona emarikeni, lavuya ngokwenene lakumbona. Nangona laliye lingasifuni isigidimi seendaba ezilungileyo ngaphambili, lathi ngoku liyazi ukuba amaNgqina kaYehova abathanda ngokwenene abamelwane bawo. Kwaqaliswa isifundo seBhayibhile esiqhutywa rhoqo nalo.
4 Kubazalwana Bethu: Kwakhona sixelisa ukulunga kukaYehova xa sinceda amanye amakholwa. Ngamaxesha entlekele, siba ngabokuqala ukuza kunceda abazalwana bethu. Sibonisa lo moya xa sinceda abo bafuna izithuthi zokuya kwiintlanganiso, xa sityelela abagulayo naxa sibonisa uthando kwabo singabaziyo ebandleni.—2 Kor. 6:11-13; Heb. 13:16.
5 Enye indlela akubonisa ngayo uYehova ukulunga kwakhe ‘kukulungela ukuxolela.’ (INdu. 86:5) Sinokumxelisa ngokubonisa ukuba siyakuthanda ukulunga ngokubaxolela abanye. (Efe. 4:32) Oku kwenza ukuhlala namanye amakholwa ‘kulunge kuze kuthandeke.’—INdu. 133:1-3.
6 Ngamana ukulunga kukaYehova okukhulu kungasishukumisela ekubeni simdumise size sidanduluke ngovuyo. Ngamana kungasishukumisela ukuba sixelise ukulunga kwakhe kuko konke esikwenzayo.—INdu. 145:7; Yer. 31:12.