ISikolo Esinendima Ebonakalayo
1 Njengoko sihlolisisa umbandela okuCwangciso LweSikolo Sobulungiseleli Sobuthixo Sowama-2006, siya kuzama ukungenelwa kwiimfundiso ezisekelwe kwiZibhalo ngokuzisebenzisa kwinkonzo yethu engcwele nakubomi bethu bemihla ngemihla. Sizimisele ukuzenza izinto esizifundayo.—Yoh. 13:17; Fil. 4:9.
2 Ukugqabaza: Ucwangciso lwalo nyaka longeze umzuzu omnye kwixesha elabelwe amagqabaza abaphulaphuli kwiimbalasane zeBhayibhile. Oku kuthetha ukuba umzalwana owabelwe iimbalasane ufanele aqiniseke ukuba uqukumbela inxalenye yakhe ngemizuzu emihlanu kunokuba asebenzise emithandathu. Abo bagqabazayo bafanele balumke bangatyi ixesha. Xa ecingisiswe kakuhle, amagqabaza abo anokudlulisela inkcazelo ebalulekileyo kwimizuzwana engama-30 okanye engaphantsi. Bamalunga neshumi abantu abanokugqabaza ngendlela enentsingiselo kuloo mizuzu mihlanu yabelwe abaphulaphuli.
3 Iintetho Ezifundisayo: Iimbalasane zeBhayibhile nentetho efundisayo zifanele zibonise indlela loo mbandela obaluleke ngayo kubulungiseleli bethu nakwezinye iinkalo zobomi bethu. Isithethi asifanele sanele nje ukushukumisela abaphulaphuli ekubeni benze okuthile. Sifanele sibachazele loo nto bafanele bayenze, indlela yokuyenza, neengenelo zokuyenza. Sinokuthi, “Nantsi ke indlela lo mbandela osikhokela ngayo,” okanye “Sinokuzisebenzisa ngolu hlobo ke ezi ndinyana kubulungiseleli.” Abadala nezicaka zolungiselelo abazaziyo iimeko zasekuhlaleni bafanele bazabalazele ukuwusebenzisa kakuhle umbandela baze bangqale kangangoko banako.
4 Ukucaphula imizekelo efumaneka eBhayibhileni kunokuphumelela nangakumbi xa sichaza indlela umbandela osebenza ngayo. Emva kokuchaza umzekelo ofumaneka kwiZibhalo, isithethi sinokuthi, “Nawe unokuzifumana ukwimeko efanayo nale.” Sifanele siqiniseke ukuba nayiphi na indlela esichaza ngayo umzekelo ofumaneka eBhayibhileni ivisisana nomongo, neBhayibhile iphela, kunye noko kupapashwe “likhoboka elithembekileyo neliyingqondi.”—Mat. 24:45.
5 Ubulumko kukukwazi ukusebenzisa ulwazi nokuqonda ngendlela ephumelelayo. “Ubulumko yinto eyintloko.” (IMize. 4:7) Njengoko siqhubeka singenisa ulwazi ngezinto esizifunda kwiSikolo Sobulungiseleli Sobuthixo, ngamana singalola ubuchule bethu bokuludlulisela kwabanye abantu.