Xelisa ‘UThixo Wethu Onoyolo,’ UYehova
1 UYehova ufuna ngokwenene ukuba abantu bonwabe. ILizwi lakhe lisenza sizilangazelele iintsikelelo azigcinele uluntu. (Isa. 65:21-25) Kufanele kubonakale kwabanye ukuba siyakuvuyela ukwabelana nabo ‘ngeendaba ezilungileyo ezizukileyo zoThixo onoyolo.’ (1 Tim. 1:11) Indlela esithetha ngayo ngesigidimi soBukumkani ifanele ibonise ukuba siyayithanda inyaniso yaye sinomdla wokwenene kubantu esithetha nabo.—Roma 1:14-16.
2 Liyinyaniso elokuba, maxa wambi kusenokuba nzima ukuhlala sichwayitile. Kwezinye iindawo, bambalwa abantu abasabela kakuhle kwisigidimi soBukumkani. Maxa wambi sisenokuhlangabezana neemeko ezinzima ebomini. Ukuze sihlale sonwabile, sinokucinga ngendlela abantu abakwintsimi yethu abakufuna ngayo ukuva nokwazi ngeendaba ezilungileyo zoBukumkani esizishumayelayo. (Roma 10:13, 14, 17) Ukucamngca ngoku kuya kusinceda siqhubeke sonwabile size sixelele abanye ngamalungiselelo kaYehova osindiso.
3 Ngokuyintloko Thetha Ngezinto Ezintle: Kwakhona sifanele sinikele ingqalelo koko sikuthethayo. Nangona sinokuqalisa incoko ngokuthetha ngengxaki ethile okanye ngezinto ezingundaba-mlonyeni, sifanele sikuphephe ukuthetha ngokungeyomfuneko ngezinto ezidimazayo. Umsebenzi wethu kukuzisa “iindaba ezilungileyo zento elunge ngakumbi.” (Isa. 52:7; Roma 10:15) Ezi ndaba zilungileyo zisisigidimi esisekelwe kwizithembiso zikaThixo zekamva eliqaqambileyo. (2 Pet. 3:13) Ucinga ngoku, sebenzisa iZibhalo ukuze ‘ubophe abantliziyo zaphukileyo.’ (Isa. 61:1, 2) Oku kuya kuba lukhuthazo kuye ngamnye wethu.
4 Ngokungathandabuzekiyo abantu baya kuphawula ukuba siyakuvuyela ukushumayela. Ngoko ke, masihlale sicinga ‘ngoThixo wethu onoyolo,’ uYehova, njengoko sishumayela iindaba ezilungileyo zoBukumkani kubantu abakwintsimi yethu.