Ucwangciso Olutsha Lwendibano Ekhethekileyo Yosuku Olunye
Umxholo wocwangciso lwendibano ekhethekileyo yosuku olunye lonyaka wenkonzo wama-2008 uthi “Siludongwe—UYehova UnguMbumbi Wethu,” yaye usekelwe kuIsaya 64:8. Isiluleko seZibhalo esikolu cwangciso siza kwandisa uxabiso lwethu ngobulumko, okusesikweni, amandla nothando lukaYehova, uMbumbi Omkhulu.
Intetho yomveleli wesiphaluka enomxholo othi, “Ukukhonza Njengezitya Ezibekekileyo Entsimini,” iza kubonisa indlela abantu abaninzi abasikeleleke ngayo ngokwazi inyaniso nangokuyixelela abanye. Intetho ethi “Ukucamngca Kuya Kukukhusela” iza kubonisa indlela ukucamngca ngemilinganiselo kaYehova yobulungisa okusikhusela ngayo. Isithethi esityeleleyo siza kuthetha ngomxholo othi “Musani ‘Ukumilisa Okwale Nkqubo Yezinto’” nothi “Vuma Ukubunjwa Ngumbumbi Omkhulu.” Abazali nabantwana baya kukhuthazwa ngumxholo othi “Ulutsha Olululutho KuYehova” nothi “Indima Ebalulekileyo Ephunyezwa Ngabazali Ekubumbeni.” Xa siphulaphule imiboniso nodliwano-ndlebe, siya kukuvuyela ukuva nokubona oko kwenziwa ngabazalwana noodade wethu entsimini. Abo bafuna ukufuzisela uzahlulelo lwabo kuThixo ngokubhaptizwa emanzini bafanele bakhawuleze baxelele umveleli owongamelayo. Qiniseka ukuba uphatha IMboniselo eza kufundwa ngeveki yendibano ekhethekileyo yosuku olunye.
Nantoni na uMbumbi Omkhulu anenjongo yokuyenza uyayiphumeza. Kodwa kuxhomekeka kuye ngamnye wethu ukukhetha ukuba usabela njani kwindlela asibumba ngayo. Abo bathi ngobulumko bathobele imilinganiselo kaYehova nokuxonxwa nguye banokubunjwa, bapolishwe baze benziwe izitya eziluncedo, kanye njengodongwe kwivili lombumbi. Xa sisebenzisana noYehova, siphakamisa ulongamo lwakhe yaye sifumana iintsikelelo ezininzi.