Ukwenza Okungakumbi Entsimini
1 Umpostile uPawulos wabongoza amaKristu ukuba aqhubeke ehamba ngendlela kaThixo aze ‘aqhubeke ehamba ngayo ngokuphelele ngakumbi.’ (1 Tes. 4:1) Oku kuthetha ntoni kuthi? Phakathi kwezinye izinto kuthetha ukuba sifanele siqhubeke sikhangela iindlela zokwenza okungakumbi kumsebenzi wethu ‘sibufeze ngokupheleleyo ubulungiseleli bethu.’—2 Tim. 4:5.
2 Iinjongo Zethu: Ukwenza okungakumbi entsimini kubangelwa kukunqwenela kwethu ukukhonza uMdali wethu ngokupheleleyo. Sifuna ukukhula ngokomoya size sikhangele iindlela zokuphucula umsebenzi wethu wasentsimini. Ukuba nocwangciso neenjongo ezintle kuya kusinceda sizibekele usukelo lokomoya.—INdu. 1:1, 2; Fil. 4:6; Heb. 10:24, 25.
3 Ukwenza umgudu wokwandisa umsebenzi esiwenza entsimini kufuna sihlakulele umoya wokupha nowokuzincama. Umoya onjalo sinokuwuhlakulela ngokuthandaza size sicamngce ngomzekelo omhle kaYesu. (Mat. 20:28) UYesu wafumana uvuyo olugqithiseleyo kuba walungiselela abanye ngokushumayela kwakhe. (IZe. 20:35) Sinokuxelisa uYesu ngokuba nomdla ebantwini nokusebenzisa nawaphi na amathuba okwenza okungakumbi entsimini.—Isa. 6:8.
4 Umsebenzi Wabazali: Ukunqwenela ukunceda abanye nokwenza okungakumbi entsimini kunokubethelelwa ebantwaneni besebancinane. Abantwana baya kukubona ukuzimisela kwamalungu entsapho nokufuna kwawo ukwenza okungakumbi entsimini. Omnye umzalwana wazimisela ukwenza okungakumbi eseyinkwenkwana ngokusebenza noyisemkhulu kwimisebenzi yebandla. Ukubona ukuzimisela novuyo lukayisemkhulu kwamenza wakhangela amathuba okunceda abazalwana bakhe. Ngoku usisicaka solungiselelo.
5 Kufuneka Abazalwana: “Ukuba ubani uzabalazela isigxina sobuveleli, unqwenela umsebenzi omhle.” (1 Tim. 3:1) La mazwi akhuthaza abazalwana ukuba bazabalazele amalungelo enkonzo angakumbi kwintlangano kaYehova. Ukwenjenjalo akufuni buchule bukhethekileyo okanye iziphiwo zemvelo ezingaqhelekanga. Umzalwana ozabalazela amalungelo angakumbi uya kufuna kuqala uBukumkani aze asebenze ngokuzimisela entsimini. (Mat. 6:33; 2 Tim. 4:5) Uya kuba ngumzekelo omhle kwabanye.
6 Ehlabathini Lonke: UYehova ukhawulezisa umsebenzi wokuhlanganisa. (Isa. 60:22) Kufuneka ngokungxamisekileyo ukuba bonke abo balandela umzekelo kaYesu bazimisele ngakumbi entsimini. Ingxelo yehlabathi yonyaka wenkonzo wama-2006 ibonisa ukuba bangama-248 327 abaye babhaptizwa. Loo nto ibonisa umlinganiselo wabantu abatsha abangaphezu kwama-680 suku ngalunye! Ngamana sonke singakhangela iindlela zokwenza okungakumbi entsimini.