Thuthuzela Abantu Abanxungupheleyo
1 Intuthuzelo ifuneka ngakumbi ngoku kunokuba kwakukhe kwanjalo ngaphambili. Nathi sifuna ukulandela umzekelo kaKumkani wethu, uYesu Kristu, ‘ngokubopha abantliziyo zaphukileyo.’—Isa. 61:1.
2 Indlela Yokuthuthuzela: Ukuze sithuthuzele abantu, iintshumayelo zethu zifanele zilungelelane kwaye zikhuthaze. Xa singathethi kakhulu ngezinto ezimbi ezenzeka kweli hlabathi nangeemfundiso zobuxoki, inyaniso evela kwiZibhalo nethemba eliqaqambileyo esilifumana kwizithembiso zikaThixo ziye zibalasele encokweni. Loo nto ayithethi kuthi asifanele sithethe ngeArmagedon. Sithunywe ukuba sivakalise “unyaka wenkoliseko kaYehova nomhla wempindezelo kaThixo wethu,” size ‘silumkise ongendawo endleleni yakhe engendawo.’ Noko ke, ukulumkisa ngeArmagedon nangemiphumo yayo akufanele kugqumelele iindaba zilungileyo zoBukumkani bukaThixo.—Isa. 61:2; Hez. 3:18; Mat. 24:14.
3 Kwindlu Ngendlu: Sidla ngokudibana nabantu abaxhwalekileyo ngenxa yokugula, ukufelwa, abacinezelweyo okanye abaneengxaki zemali. Ekubeni sixelisa uKristu, nathi siba “nosizi” size sivelane nabantu esidibana nabo entsimini. (Luka 7:13; Roma 12:15) Nangona siye sibafundele isibhalo esinye okanye ezibini, simele ‘sikhawuleze ukuva,’ sibanike ithuba lokuphalaza iintlungu zabo. (Yak. 1:19) Emva kokuba sibaphulaphule, siya kutsho sikwazi ukubathuthuzela.
4 Xa kuvela ithuba ebudeni bencoko, sinokuthi, “Ndingathanda ukukufundela amazwi akhuthazayo avela eBhayibhileni.” Sifanele siyilumkele into yokuzimisela ukuphikisa kwanto ephosakeleyo ethethwa nguloo mntu. Kunoko, masizimisele ukukhuthaza nokuthuthuzela loo mntu sisebenzisa iZibhalo ukuze simomeleze. Kule nkalo, unokufunda incwadi Ukuqiqa NgeZibhalo iphepha 168-171 kumxholo othi “UKhuthazo.” Okanye unokunika umninimzi iphecana elithi Intuthuzelo Kwabadandathekileyo nize nixubushe ngenkcazelo ekhuthazayo engaphakathi.
5 Wakhangele Amathuba Okuthuthuzela: Ngaba ukho ummelwane, umntu osebenza naye, ofunda naye okanye isihlobo esifuna ukuthuthuzelwa? Kutheni ungazami ukuya kusibona ekhaya ngenjongo yokusithuthuzela ngeZibhalo? Ekubeni uyazi ingxaki abanayo, unokulungiselela ukubathuthuzela kuloo ngxaki. Abanye baye bakwenza oko ngokubhala iileta okanye ngokufowuna. Ukuba sibathanda nyhani abamelwane bethu siya kuba novelwano size sibathuthuzele ngeZibhalo.—Luka 10:25-37.
6 Ewe, sithunywe ukuba sithuthuzele abazilileyo, sikhuthaze abatyhafileyo size sibashiye benethemba eliqaqambileyo ngekamva. Nantso ke intuthuzelo efunwa ngabantu kweli hlabathi. Ukuthetha ngodlamko ngezinto ezintle uThixo azithembisileyo kuya kubathuthuzela kuze kubenze babe nethemba abantu abanyanisekileyo. Ngamana singahlala sikhumbula ukuba kufuneka sibabophe abantliziyo zaphukileyo.