“Zigcineni Kuthando LukaThixo”
1. Ibhalelwe yiphi injongo incwadi ethi “Zigcineni Kuthando LukaThixo”?
1 Ingathi alisafiki ixesha lokuba sifunde incwadi entsha ethi “Zigcineni Kuthando LukaThixo” kwiSifundo SeBhayibhile Sebandla ekuqaleni kweveki kaFebruwari 23! Ileta ebhalwe liQumrhu Elilawulayo eya kubo bonke abathandi bakaYehova iqukumbela ngala mazwi: “Sinethemba lokuba le ncwadi iza kukunceda uqhubeke uphila ngenyaniso ukuze uzigcine ‘kuthando lukaThixo ukhangele kubomi obungunaphakade.’—Yude 21.”
2. Le ncwadi intsha iza kusinceda kwiziphi iinkalo zobomi?
2 Oko Sinokukulindela: Isebenza njani imigaqo yeBhayibhile ephathelele izinto ezifana nonxulumano, ukuzonwabisa, ukuhlonela abantu abanikwe igunya, imikhwa esinayo, umtshato, izinto esizithethayo nezithethe? Izazela zethu ziya kuxonxwa ngemilinganiselo ephakamileyo yobulungisa etyhilwe liLizwi likaThixo. (INdu. 19:7, 8) Njengoko sisiya siyiqonda indlela uYehova acinga ngayo, ukumthobela kwethu kwizinto zonke kuya kuqhutywa kukunqwenela ukumkholisa.—IMize. 27:11; 1 Yoh. 5:3.
3. Kutheni sifanele senze unako nako ukuze sibe negalelo kwisifundo seveki nganye?
3 Zimisele Ukuba Negalelo: Xa ulungiselela, zimisele ukudumisa uThixo phakathi kwebandla labantu bakhe. (Heb. 13:15) Lonke ibandla liza kuyifunda kunye le mpapasho intsha. Ekubeni siza kugubungela umbandela omfutshane, siza kutsho sikwazi ukulungiselela ngokucokisekileyo, sizithembe xa sisabelana nabanye ngoko sikufundileyo. Iimpendulo zethu ezilungiselelwe kakuhle nezichanileyo ziya kubakhuthaza abanye abantu ukuba babe nothando kwaye benze imisebenzi emihle, kwaye ziya kubangela ukuba ingxubusho ifudumale kwaye sifunde lukhulu. (Heb. 10:24) Kwakhona, siya kuvuya kakhulu njengoko ngamnye wethu eya kuvakalisa ukholo lwakhe.
4. Kutheni kubalulekile ukuba sithobele imithetho kaYehova?
4 Ngobusuku bokugqibela awayephila ngabo apha emhlabeni, uYesu wanxibelelanisa ukuthotyelwa kwemithetho kaYehova nokuzigcina kuthando lukaThixo. (Yoh. 15:10) Incwadi ethi “Uthando LukaThixo” iya kusinceda sizimisele nangakumbi ukusebenzisa imigaqo yeBhayibhile kubomi bethu kwaye ‘sizigcine kuthando lukaThixo.’—Yude 21.