“Ukunikela Ubungqina Obucokisekileyo” NgoBukumkani BukaThixo
1. Yiyiphi incwadi eza kufundwa ukususela kwiveki kaMatshi 14 kwiSifundo SeBhayibhile Sebandla?
1 Ukususela kwiveki kaMatshi 14, 2011, siza kufunda incwadi ethi “Ukunikela Ubungqina Obucokisekileyo” NgoBukumkani BukaThixo kwiSifundo SeBhayibhile Sebandla. Le mpapasho igubungela incwadi yeZenzo ngendlela ebangel’ imincili kumfundi ngokuphathelele iziganeko ezishiy’ amehlo ezibhalwe kuyo. Kunokuba ixubushe indinyana nganye, incwadi ethi Ukunikela Ubungqina ibalaselisa izifundo ngokuphathelele ingxelo yeZenzo nendlela esinokuyisebenzisa ngayo ebomini bethu.—Roma. 15:4.
2. Chaza ezinye zezinto ezibangel’ umdla kwincwadi ethi Ukunikela Ubungqina.
2 Izinto Ezibangel’ Umdla Kule Ncwadi: Kwiphepha 2 kukho ileta efudumeleyo evela kwiQumrhu Elilawulayo lichaza indlela elifuna singenelwe ngayo kule ncwadi. Ukususela kwisahluko 2, kwenziwa amagqabantshintshi ngoko kuqulethwe sisahluko ngasinye, yaye kuchazwa nenxalenye yencwadi yeZenzo eza kuxutyushwa. Kwizahluko ezininzi kukho iibhokisi ezichaza ngabantu, iindawo okanye iziganeko. Emacaleni kukho isikhewu esikhulu sokubhala amanqaku. Le ncwadi inemifanekiso ebonisa ngeziganeko ekuthethwa ngazo eBhayibhileni, esinceda sibe nombono woko kwakusenzeka, yaye kwiphepha lokugqibela kukho isalathiso semifanekiso nenkcaza yayo. Kumphakathi weqweqwe elingaphambili nelingasemva kukho iimaphu ezisinceda sikwazi ukubona iindawo amaKristu enkulungwane yokuqala ayehamba kuzo xa ayeqala ukusasaza iindaba ezilungileyo ‘kwezona nxalenye zikude zomhlaba.’—IZe 1:8.
3. Yiyiphi imibuzo ebalulekileyo eza kuphendulwa kwincwadi yeZenzo?
3 Iimpendulo Zemibuzo Ebalulekileyo: Ukufunda incwadi yeZenzo kuya kusinceda siziqonde kakuhle iimpendulo zemibuzo ebalulekileyo ngokuphathelele ubulungiseleli bamaKristu. Ngokomzekelo, abalandeli bakaYesu Kristu babesenza wuphi umsebenzi yaye sasisithini isigidimi sabo? Umsebenzi wokushumayela ehlabathini walathiswa ngubani yaye njani? Intshutshiso nenkcaso ibavulela liphi ithuba abalungiseleli? Umoya oyingcwele usinceda njani kubulungiseleli bethu?
4. Unokungenelwa njani ngokupheleleyo ngokufunda le mpapasho?
4 Ukuze ungenelwe ngokupheleleyo, lungiselela kwangaphambili ukuze ube nenxaxheba kwingxubusho yebandla. Yibakho rhoqo ezintlanganisweni, uze ubone indlela onokukusebenzisa ngayo oko ukufundayo kubulungiseleli bakho. Ngamana ukufunda kwethu le mpapasho kungasenza sinikele ubungqina obucokisekileyo ngoBukumkani bukaThixo!—IZe 28:23.