‘Malingcwaliswe Igama LikaThixo’
1. Uthini umxholo wendibano yesiphaluka yonyaka wenkonzo wama-2012, yaye usekelwe phi?
1 Sinelungelo elingathethekiyo lokuthwala igama loMongami Wendalo Iphela, uYehova! NguThixo ngokwakhe owasithwalisa igama lakhe, ngokukhethekileyo ukususela ngowe-1931, besisoloko sibizwa ngegama lakhe, amaNgqina kaYehova. (Isa. 43:10) UNyana kaThixo okuphela kwamzeleyo, uYesu, waliphakamisa igama likaThixo, elibeka kwindawo yokuqala kumthandazo awawufundisa abalandeli bakhe. (Mat. 6:9) Umxholo wocwangciso lwendibano yethu yesiphaluka yonyaka wenkonzo wama-2012 usekelwe kula mazwi kaYesu. Uthi ‘Malingcwaliswe Igama LikaThixo.’
2. Yiyiphi inkcazelo esimele sikhangele phambili kuyo?
2 Oko Siza Kukuva: NgoMgqibelo intetho enomxholo othi “Njengabakhonzi Bexesha Elizeleyo, Laziseni Igama LikaThixo” iza kuxubusha isizathu sokuba inkonzo yexesha elizeleyo ibe yindlela eyanelisayo yobomi. Siza kuva nongcelele lweentento olunomxholo othi “Lumkela Ukuzisa Ugculelo Kwigama LikaYehova,” oluya kusinceda sikulumkele ukubanjiswa yimigibe emine efihlakeleyo. Intetho ethi “Isizathu Sokuba Igama likaThixo Limele Lingcwaliswe” iya kuphendula imibuzo ethi Yintoni eya kusinceda sishumayele ngenzondelelo nakubeni abantu bengenamdla? nethi Yintoni eya kusinceda siphumelele kubulungiseleli? NgeCawa siza kunandipha ungcelele oluneentetho ezine oluthetha ngendlela esinokulingcwalisa ngayo igama likaThixo ngezinto esizicingayo, ngentetho yethu, ngezigqibo esizenzayo nangendlela esiziphatha ngayo. Abantu abasebatsha baya kuyinandipha ngokukhethekileyo intetho yesidlangalala ethi “UYehova Uya Kulingcwalisa Igama Lakhe Elikhulu NgeArmagedon.”
3. Liliphi ilungelo esinalo, yaye iya kusinceda njani le ndibano?
3 Kungekudala uYehova uza kulithethelela igama lakhe. (Hez. 36:23) Okwangoku, sinelungelo elimangalisayo lokuxhasa yonke into emelwa ligama likaYehova elingcwele. Siqinisekile ukuba olu cwangciso lwendibano yesiphaluka luya kusinceda sifeze imbopheleleko esinayo yokuba ngabathwali begama likaThixo.