ILizwi LikaThixo Elidluliselwa Kuthi NgoYeremiya
1. Yiyiphi incwadi eyakhululwa kwindibano yesithili yowama-2010, ibe siza kuyisebenzisa njani?
1 Savuya gqitha xa kwakhululwa le ncwadi kwiNdibano yeSithili yowama-2010 eyayinomxholo othi “Hlala Usondele KuYehova!” Le ncwadi ibalaselisa izifundo esinokuzifunda kwincwadi kaYeremiya neyeZililo. (Roma 15:4) Le ncwadi elungiselelwe iSifundo SeBhayibhile Sebandla iya kufundwa ukususela kwiveki kaNovemba 5, 2012.
2. Siya kungenelwa njani ngokufunda incwadi yeBhayibhile kaYeremiya neyeZililo?
2 Iluncedo Namhlanje: UYeremiya, owabhala le ncwadi yeBhayibhile iphefumlelweyo, waprofeta ngexesha ekwakusenzeka ngalo izidubedube kwaYuda. Ekuqaleni, wayecinga ukuba akakufanelekeli ukwenza lo msebenzi. (Yer. 1:6) Wayetshutshiswa ngabantu awayebazi yaye kusenokwenzeka ukuba nezalamane zakhe ezazihlala kwidolophu yakowabo iAnatoti zazimtshutshisa. (Yer. 11:21, 22) Ngoko unokusibona isizathu sokuba uYeremiya wayekhe adimazeke ngamanye amaxesha. (Yer. 20:14) Njengoko siphumeza isabelo sethu ‘sokwenza abafundi abantu beentlanga zonke,’ sidla ngokujamelana nocelomngeni size sivakalelwe njengoYeremiya. (Mat. 28:19) Ukuqwalasela oko wakubhalayo kuya kusinceda siphumeze ubulungiseleli bethu ngenkalipho nangenzondelelo.
3. Siza kuzisebenzisa njani ezinye zezinto eziqulethwe yincwadi kaYeremiya?
3 Ekuquletheyo: Izibhalo eziyintloko ezimele zifundwe xa kuxutyushwa le ncwadi zibhalwe ngamagama akekeleyo. Ekupheleni kwesifundo seveki nganye, kukho umbuzo omnye okanye emibini ebhalwe ngqindilili nebalaselisa izifundo eziyintloko. Le mibuzo ifanelwe ibuzwe xa kusenziwa impinda. Kuyo yonke le ncwadi kukho imifanekiso emihle yaye siqinisekile ukuba ibandla liya kukuthanda ukugqabaza ngayo.
4. Sinokungenelwa njani ngokupheleleyo njengoko sifunda incwadi kaYeremiya?
4 Ukuze ungenelwe, kuza kufuneka ulungiselele kakuhle. Khangela iingongoma onokuzisebenzisa kubomi bakho nasentsimini. Qiniseka ukuba uyagqabaza. UYehova wamsikelela uYeremiya waza wasiphumeza ngovuyo nangolwaneliseko isabelo sakhe. (Yer. 15:16) Ngamana ukufunda le ncwadi intsha kungasinceda siyisebenze njengoYeremiya intsimi yethu.