Bathabatheni Njengomzekelo Abaprofeti—UYoweli
1. Singakuxelisa njani ukuthobeka kukaYoweli xa sishumayela?
1 Wayengubani umprofeti uYoweli? Ekuphela kwento ayichazayo ngaye kukuba ‘wayengunyana kaPetuweli.’ (Yow. 1:1) Lo mprofeti uthobekileyo wayebalaselisa isigidimi sikaYehova kungekhona indima yakhe njengomthunywa. Ngendlela efanayo, xa sisentsimini kunokuba sizizukise, salathisela ingqalelo kuYehova nakwiBhayibhile. (1 Kor. 9:16; 2 Kor. 3:5) Ukongezelela, siyomelela ngenxa yesigidimi esisivakalisayo. Ziziphi iinkalo zesiprofeto sikaYoweli ezinokusenza sibe nenzondelelo size sibe nethemba namhlanje?
2. Ukuba kufuphi kwemini kaYehova kufanele kusikhuthazele ukuba senze ntoni?
2 “Ikufuphi Imini KaYehova.” (Yow. 1:15) Nangona la mazwi abhalwa kwiminyaka engamawakawaka eyadlulayo, siphila kwinxalenye yokugqibela yokuzaliseka kwawo. Imeko yeli hlabathi ewohlokayo, inkcaso nokugculelwa esijamelana nayo entsimini bubungqina bokuba siphila kwimihla yokugqibela yale nkqubo ingendawo. (2 Tim. 3:1-5; 2 Pet. 3:3, 4) Xa sicamngca ngendlela esikufuphi ngayo isiphelo, sinesizathu sokuba ukuya entsimini ibe yeyona nto iphambili ebomini bethu.—2 Pet. 3:11, 12.
3. Kutheni kubalulekile ukuya entsimini njengoko imbandezelo enkulu isondela?
3 “UYehova Uya Kuba Yindawo Yokusabela Yabantu Bakhe” (Yow. 3:16): Ukunyikima ekuthethwa ngako kule ndinyana kunokusebenza kuphela kumgwebo kaYehova ngexesha lembandezelo enkulu. Kuyasithuthuzela ukwazi ukuba uYehova uza kubahlangula abakhonzi bakhe abathembekileyo ngelo xesha. (ISityhi. 7:9, 14) Njengoko sishumayela, sibona indlela uYehova asilondoloza aze asomeleze ngayo, siba nokholo nonyamezelo oluza kusinceda nangembandezelo enkulu.
4. Kutheni sinokonwaba size kwangaxeshanye sikhangele kwikamva?
4 Nangona abanye isigidimi sikaYoweli besichaza njengesinganik’ ithemba, abantu bakaThixo sibanika ithemba lokuhlangulwa. (Yow. 2:32) Ngoko ke, masikhangele phambili kwikamva size sivakalise iindaba ezilungileyo zoBukumkani bukaThixo ngenzondelelo njengoko sithobela amazwi akuYoweli 2:23 athi:“Vuyani nibe nemihlali ngoYehova uThixo wenu.”