Bathabatheni Njengomzekelo Abaprofeti—UMika
1. Nguwuphi umbuzo ekusenokwenzeka ukuba uMika wazibuza wona, ibe kutheni sisithi ukushumayela kwakhe kwakungelolize?
1 ‘Siza kude sifike nini isiphelo sale nkqubo yezinto?’ Umele ukuba wabuza watsho uMika njengoko wayeprofeta ngokugweba kukaYehova uSirayeli noYuda. Kodwa ukushumayela kwakhe kwakungelolize. UMika wakubona ukutshatyalaliswa kweSamariya ngonyaka ka-740, lee ngaphambi kokuba uYesu eze emhlabeni. (Mika 1:6, 7) Emva koko kwatshatyalaliswa iYerusalem ngonyaka ka-607. (Mika 3:12) Sinokumxelisa njani uMika njengoko silindele umgwebo kaYehova namhlanje?
2. Singawubonisa njani umonde njengoko silindele imini kaYehova, ibe kutheni simele senjenjalo?
2 Yiba Nomonde: UMika wabhala wathi: “Mna ke, ndiza kuhlala ndikhangele kuYehova. Ndiza kubonisa isimo sengqondo sokulindela kuThixo wosindiso lwam.” (Mika 7:7) Noko ke, uMika akazange asong’ izandla elinde ukufika kwesiphelo. Wayexakekile njengomprofeti kaYehova. Njengoko silindele imini kaYehova, nathi sifanele sixakeke “ngokuphathelele ihambo engcwele nezenzo zozinikelo lobuthixo.” (2 Pet. 3:11, 12) Ukuba nomonde kukaYehova kunika abantu ithuba lokuguquka. (2 Pet. 3:9) Ngoko, silandela icebiso leBhayibhile lokuxelisa ukuba nomonde kwalo mprofeti.—Yak. 5:10.
3. Kutheni simele simcele uYehova ukuba asinike umoya wakhe oyingcwele?
3 Thembela Kumandla KaYehova: Nangona uMika wayenesabelo esinzima, wathembela kumandla kaYehova. (Mika 3:8) Nathi, uYehova usibongoza eLizwini lakhe ukuba sithembele kumandla akhe. Unika abadiniweyo amandla ukuze bakwazi ukufeza iimbopheleleko zabo njengoko bemkhonza. (INdu. 84:5, 7; Isa. 40:28-31) Ngaba uye wakubona oku ekukhonzeni kwakho uThixo? Ngaba umcela rhoqo uYehova ukuba akuncede ngomoya wakhe oyingcwele onamandla?—Luka 11:13.
4. Nguwuphi umzekelo obalaseleyo asimisela wona uMika namhlanje?
4 Ukwenza ukuthanda kukaThixo kwakuyeyona nto iphambili kuMika. Wayezimisele ukuhlala ethembekile nangona abantu awayephila phakathi kwabo babeziphethe kakubi. Nokwethu ukuthembeka kuvavanywa yonke imihla. Ngoko masizimisele ‘ukuhamba egameni likaYehova uThixo wethu ngonaphakade.’—Mika 4:5.