UThixo ‘omamela imithandazo,’ uyavuya xa sithetha naye.—INDUMISO 65:2
Qhubeka Uthandazela Ububele BukaThixo
UThixo wanika abantu isipho esixabisekileyo sokuthandaza, ukuze bamchazele indlela abaziva ngayo. Umprofeti uDavide wathandaza wathi: “Owu wena umamela imithandazo, zonke iintlobo zabantu ziza kuza kuwe.” (INdumiso 65:2) Kodwa ungathandaza njani ukuze uviwe uze uncedwe nguThixo?
ZITHOBE, UTHANDAZE NGOKUSUKA ENTLIZIYWENI
Imithandazo yethu isinceda sikwazi ukuxelela uThixo “zonke izinto ezisentliziyweni,” simxelele eyona ndlela siziva ngayo. (INdumiso 62:8) USomandla uyixabisa kakhulu imithandazo esuka entliziyweni.
UTHIXO MBIZE NGEGAMA LAKHE XA UTHANDAZA KUYE
Nangona uThixo ebizwa ngeendlela ezininzi, unegama elinye kuphela. “NdinguYehova. Ligama lam elo.” (Isaya 42:8) Igama elithi Yehova livela phantse kube kayi-7 000 kwiNcwadi Evela KuThixo. Abaprofeti abaninzi babembiza ngegama lakhe. UAbraham wade wathi: “Owu yhini Yehova, . . . ndivumele ndithethe [nawe].” (Genesis 18:30) Nathi xa sithandaza, masisebenzise igama elithi Yehova.
SEBENZISA ULWIMI LWAKHO XA UTHANDAZA
UThixo usiva kakuhle xa simchazela izinto esizicingayo, nendlela esiziva ngayo, nokuba sisebenzisa oluphi ulwimi. ILizwi lakhe liyasiqinisekisa ukuba: “UThixo akakhethi, kodwa kuzo zonke iintlanga wamkela nabani na omoyikayo nowenza izinto ezilungileyo.”—IZenzo 10:34, 35.
Kodwa ke, ukuze sincedwe nguThixo kufuneka singathandazi nje qha. Kula manqaku alandelayo, siza kufunda ngento esifanele siyenze.