Uza Kufuna Ukubhaptizwa Kuba Umthanda UYehova

1-2. Ngokutsho kweZenzo 8:27-31, 35-38, yintoni eyenza ukuba igosa elingumTiyopiya libhaptizwe?

UYAFUNA ukubhaptizwa ukuze ube ngumfundi kaKristu? Ngenxa yokuba bemthanda uYehova kwaye befuna ukumbulela ngezinto abenzele zona, abanye baye babhaptizwa. Khawucinge ngento eyenziwa ligosa elalisebenzela ukumkanikazi waseTiyopiya.

² Emva kokuba lifunde iZibhalo, eli gosa labhaptizwa ngoko nangoko. (Funda iZenzo 8:27-31, 35-38.) Yintoni eyalenza labhaptizwa? Lalithanda iLizwi LikaThixo kuba lalikhwele kwinqwelo yalo lifunda incwadi kaIsaya. Xa uFilipu wayethetha nalo, layixabisa kakhulu into elayenzelwa nguYesu. Laliyokwenzani eYerusalem eli gosa? Lalimthanda uYehova. Siyazi njani loo nto? Lalivel’ okumkhonza eYerusalem. Kuyabonakala ukuba lalishiye icawa yakowalo laza laya kuba kunye nabantu abazinikele kuye. Ngenxa yokuba lalimthanda uYehova, labhaptizwa laza langumfundi kaKristu.​—Mat. 28:19.

3. Ziintoni ezinokwenza umntu angabhaptizwa? (Jonga ibhokisi ethi “Intliziyo Yakho Ifana Nowuphi Umhlaba?”)

³ Ukuthanda uYehova kunokukwenza ubhaptizwe. Kodwa ikwaluthando olunokukwenza ungafuni ukubhaptizwa. Njani? Nazi izinto ezinokwenzeka. Unokuthanda kakhulu intsapho okanye abahlobo bakho, ize loo nto ikwenze ungafuni ukubhaptizwa kuba ucinga ukuba baza kukucaphukela. (Mat. 10:37) Okanye kusenokwenzeka ukuba kunzima ukuyeka izinto ozithandayo ezingafunwayo nguThixo. (INdu. 97:10) Okanye ukhule usenza izinto ezenziwa ezicaweni. Kusenokwenzeka ukuba xa ucinga ngazo uncuma wedwa. Loo nto inokwenza kube nzima ukuziyeka. (1 Kor. 10:20, 21) Kodwa umbuzo omele uzibuze wona ngulo: “Yintoni okanye ngubani oyena mntu ndimthandayo?”

OYENA MNTU SIMELE SIMTHANDE

4. Yeyiphi eyona nto inokukwenza ubhaptizwe?

⁴ Sele zininzi izinto ozithandayo nombulela ngazo uYehova. Ngokomzekelo, kunokwenzeka ukuba uyithande iBhayibhile ungekafundi namaNgqina KaYehova. Loo nto ikwenze wamthanda uYesu. Mhlawumbi uyakuthanda nokuncokola namaNgqina KaYehova kuba ngoku uyawazi. Kodwa ukuthanda ezi zinto akunakukwenza ufune ukuzinikela kuYehova uze ubhaptizwe. Eyona nto inokukwenza ubhaptizwe kukuthanda uYehova uThixo. Ukuba uthanda uYehova ngaphezu kwayo nantoni na, akukho nto okanye umntu onokukwenza uyeke ukumkhonza. Ukumthanda kuza kukwenza ufune ukubhaptizwa kuze kukuncede uhlale uthembekile kuye nasemva kokuba ubhaptiziwe.

5. Yeyiphi imibuzo esiza kuyiphendula?

⁵ UYesu wathi simele simthande uYehova ngentliziyo, ngomphefumlo, ngengqondo nangamandla ethu onke. (Marko 12:30) Yintoni onokuyenza ukuze umthande uze umhloniphe uYehova? Xa sicinga ngendlela asithanda ngayo, nathi siza kumthanda. (1 Yoh. 4:19) Xa sele simthanda, yeyiphi indlela esiza kucinga ngayo nezinto esiza kuzenza?b

6. AmaRoma 1:20 athi yeyiphi enye indlela onokufunda ngayo ngoYehova?

⁶ Funda ngoYehova kwindalo yakhe. (Funda amaRoma 1:20; ISityhi. 4:11) Cinga ngendlela izityalo nezilwanyana ezibonisa ngayo ukuba zidalwe ngumntu osisilumko. Khawucinge nangendlela emangalisayo owenziwe ngayo umzimba wakho. (INdu. 139:14) Cinga nangamandla uYehova awanike enye yeenkwenkwezi ezininzi azidalileyo, ilanga.c (Isa. 40:26) Xa ucinga ngezi zinto, uza kuya umthanda kakhulu uYehova. Kubalulekile ukwazi ukuba uYehova ulumkile kwaye unamandla. Kodwa ukuze umthande kakhulu uze ube ngumhlobo wakhe, zininzi izinto ekufuneka uzazi ngaye.

7. Ukuze umthande kakhulu uYehova, yintoni ekufuneka uqiniseke ngayo?

⁷ Kufuneka uqiniseke ukuba uYehova ukuthanda nyhani. Ngaba kunzima ukukholelwa ukuba uMdali wezulu nomhlaba uyakwazi ukuba ukho yaye ukukhathalele? Ukuba kunzima, khumbula ukuba uYehova ‘akakho kude kuthi sonke.’ (IZe. 17:26-28) ‘Uhlola zonke iintliziyo’ kwaye ukuthembisa ukuba, ‘ukuba uyamfuna, uza kukuvumela umfumane.’ (1 Kron. 28:9) Phofu uyakuxelela isizathu sokuba ngoku ufunde iBhayibhile, uthi: “Ndikutsalele kum.” (Yer. 31:3) Xa usiya uzazi izinto uYehova akwenzele zona, uza kumthanda kakhulu.

8. Unokubonisa njani ukuba uyamthanda uYehova?

⁸ Indlela onokubonisa ngayo ukuba nawe uyamthanda uYehova kukuthandaza. Xa umxelela izinto onexhala lazo uze umbulele ngazo zonke izinto akwenzele zona, uza kuya umthanda. Ubuhlobo benu buza kuqina xa ubona indlela ayiphendula ngayo imithandazo yakho. (INdu. 116:1) Uza kuqiniseka ukuba uyakwazi. Ukuze ube ngumhlobo wakhe nyhani, kufuneka uyazi indlela acinga ngayo nezinto alindele ukuba uzenze. Ukuze uzazi ezi zinto, kufuneka ufunde iLizwi lakhe iBhayibhile.

9. Yeyiphi indlela onokubonisa ngayo ukuba uyayithanda iBhayibhile?

⁹ Lithande iLizwi LikaThixo iBhayibhile. YiBhayibhile qha ekuxelela inyani ngoYehova nezinto aza kukwenzela zona. Indlela obonisa ngayo ukuba uyayithanda iBhayibhile kukuyifunda yonke imihla, ukulungiselela xa uza kuqhutyelwa isifundo nokuzenza izinto ozifundayo. (INdu. 119:97, 99; Yoh. 17:17) Ngaba unalo ixesha olibhalileyo oza kuyifunda ngalo iBhayibhile ngosuku? Ngaba uyifunda yonke imihla?

10. Yeyiphi enye yeendlela eyahluke ngazo iBhayibhile kwezinye iincwadi?

¹⁰ Enye yeendlela eyahluke ngazo iBhayibhile kwezinye iincwadi kukuba ithetha ngabantu abambonayo uYesu. Yiyo qha ekuxelela inyani ngento uYesu akwenzele yona. Xa ufunda ngezinto awazithethayo nawazenzayo, uza kufuna ukuba ngumhlobo wakhe.

11. Yintoni onokuyenza ukuze uye umthanda uYehova?

¹¹ Ukuba umthanda kakhulu uYesu, uza kuya umthanda uYehova. Kutheni sisitsho? Kuba uYesu uneempawu ezifana ncam nezikaTata wakhe. (Yoh. 14:9) Ngoko xa ufunda ngoYesu, uza kuya umazi kwaye umthanda uYehova. Khawucinge indlela uYesu awayebahoye ngayo abantu ababengakhathalelwanga kuba bengamahlwempu, begula kwaye bengakwazi ukuzenzela nto. Khawucinge nangamacebiso akunika wona nendlela anokubutshintsha ngayo ubomi bakho xa uwasebenzisa.​—Mat. 5:1-11; 7:24-27.

12. Njengoko ufunda ngoYesu, yintoni oza kufuna ukuyenza?

¹² Uza kumthanda kakhulu uYesu xa ucingisisa ngento awayincamayo ukuze kuxolelwe izono zethu. (Mat. 20:28) Xa ucinga ukuba uYesu zange anyanzelwe mntu ukuba akufele, uza kufuna ukuguquka ukuze uYehova akuxolele. (IZe. 3:19, 20; 1 Yoh. 1:9) Ngokuya umthanda uYesu noYehova, uza kubathanda nabantu ababathandayo.

13. Yintoni uYehova aza kukunceda uyifumane?

¹³ Bathande kakhulu abantu abathanda uYehova. Intsapho yakho nabahlobo bakho abangengomaNgqina basenokungasiqondi isizathu sokuba ufune ukuzinikela kuYehova. Basenokude bangafuni nokukubona. UYehova uza kukunceda ufumane oomama, ootata, abantakwenu noodadewenu ebandleni. Ukuba uhlala ukunye nabo, baza kukuthanda baze bakuncede. (Marko 10:29, 30; Heb. 10:24, 25) Ekuhambeni kwexesha, nentsapho yakho isenokwenza izinto ezithandwa nguYehova ize imkhonze.​—1 Pet. 2:12.

14. Xa ucinga ngeyoku-1 kaYohane 5:3, uyibona injani indlela uYehova afuna uphile ngayo?

¹⁴ Ziphathe ngendlela uYehova afuna uziphathe ngayo. Ngoku ubungekamazi uYehova kusenokwenzeka ukuba ubuphila ngendlela ofuna ngayo, kodwa ngoku uyabona ukuba indlela afuna uphile ngayo yeyona ibhetele. (INdu. 1:1-3; funda eyoku-1 kaYohane 5:3.) Cinga ngamacebiso iBhayibhile ewanika amadoda, abafazi, abazali nabantwana. (Efese 5:22–6:4) Ngaba ukusebenzisa la macebiso kunincede naphila kamnandi ekhaya? Ngaba umyalelo kaYehova wokubakhetha kakuhle abahlobo ukuncede waziyeka ezinye izinto obuzithanda? Ngaba wonwabile? (IMize. 13:20; 1 Kor. 15:33) Mhlawumbi le mibuzo ungayiphendula ngokuthi, ewe.

15. Yintoni onokuyenza ukuze ukwazi ukusebenzisa imigaqo yeBhayibhile?

¹⁵ Ngamanye amaxesha kusenokuba nzima ukusebenzisa imigaqo yeBhayibhile. Yiloo nto uYehova esebenzisa intlangano yakhe ukuze isinike iincwadi ezisinceda sahlule into elungileyo kwembi. (Heb. 5:13, 14) Xa uzifunda, uza kuyibona indlela imigaqo yeBhayibhile enokukunceda ngayo xa uyisebenzisa, uze ufune ukuba ngomnye wabantu abakwintlangano kaYehova.

16. Bakhonza phi abantu bakaYehova?

¹⁶ Funda izinto ezininzi ngentlangano kaYehova uze usebenzisane nayo. Abantu bakaYehova bakhonza emabandleni, ibe uNyana wakhe, uYesu, yintloko yaloo mabandla. (Efe. 1:22; 5:23) UYesu ukhethe amadoda ambalwa athanjisiweyo ukuze akhokele kumsebenzi afuna wenziwe. Xa ethetha ngala madoda uthi ‘likhoboka elithembekileyo neliyingqondi.’ Eli khoboka likunceda ube ngumhlobo kaThixo nokuba kungabikho nto ikwahlukanisa naye. (Mat. 24:45-47) Enye indlela elikunceda ngayo kukuqiniseka ukuba kukho abadala abaza kukwalusa. (Isa. 32:1, 2; Heb. 13:17; 1 Pet. 5:2, 3) Aba badala benza konke okusemandleni abo ukuze bakuthuthuzele baze bakuncede ube ngumhlobo kaYehova. Kodwa enye yezona zinto zibalulekileyo abanokukunceda kuzo kukuba ukwazi ukufundisa abantu ngoYehova.​—Efe. 4:11-13.

17. Ngokutsho kwabaseRoma 10:10, 13, 14, kutheni sixelela abantu ngoYehova?

¹⁷ Nceda abanye abantu bafunde ngoYehova baze bamthande. UYesu waxelela abalandeli bakhe ukuba bafundise abantu ngoYehova. (Mat. 28:19, 20) Ungakwazi ukuyenza loo nto kuba uyazi ukuba kufuneka uwuthobele loo myalelo. Xa usiya umthanda uYehova, unokuthetha into eyathethwa ngumpostile uPetros noYohane abathi: “Thina asinakuyeka ukuthetha ngezinto esizibonileyo nesizivileyo.” (IZe. 4:20) Kuvuyisa kakhulu ukunceda umntu athande uYehova. Khawucinge indlela anoba wavuya ngayo umvangeli uFilipu xa wanceda umTiyopiya wazazi iZibhalo waza wabhaptizwa. Xa ulinganisa uFilipu, ushumayele, njengokuba uYesu watshoyo, ubonisa ukuba ufuna ukuba liNgqina likaYehova. (Funda kwabaseRoma 10:10, 13, 14.) Xa sele ushumayela, mhlawumbi uza kuzibuza lo mbuzo wabuzwa ngumTiyopiya: “Ndinqandwa yintoni ndingabhaptizwa?”—IZenzo 8:36.

18. Yeyiphi imibuzo eza kuphendulwa kwinqaku elilandelayo?

¹⁸ Uya kuba wenza esona sigqibo sibalulekileyo ebomini bakho xa ufuna ukubhaptizwa. Ngenxa yokuba ukubhaptizwa kubaluleke kakhulu, ngoko kufuneka ucingisise kakuhle ngokuba kuthetha ntoni. Yintoni ekufuneka uyazi ngokubhaptizwa? Yintoni ekufuneka uyenze ngaphambi kokuba ubhaptiziwe nasemva koko? Le mibuzo iza kuphendulwa kwinqaku elilandelayo.