Kunokukunceda Njani Ukuthandaza?

UPamela wagula kakhulu de wayokufuna uncedo koogqirha. Wathandaza kuThixo waze wamcela ukuba amphe amandla okumelana nemeko awayekuyo. Ngaba ukuthandaza kwamnceda?

Uthi: “Xa ndandinyangelwa icancer ndandidla ngokoyika kakhulu. Kodwa xa ndigqiba kuthandaza kuYehova uThixo ndandiye ndizive ndizolile ndize ndikwazi nokucinga kakuhle. Ndiseneentlungu ezingapheliyo, kodwa ukuthandaza kundinceda ndikwazi ukuhlala ndizolile. Xa abantu bendibuza ukuba ndinjani, ndiye ndithi, ‘Ndiyagula, kodwa ndonwabile!’”

Ewe kona, akufanelanga silinde side sigule kakhulu ukuze siqalise ukuthandaza. Sonke sineengxaki noba zincinci okanye zinkulu, ibe siyaludinga uncedo ukuze sikwazi ukumelana nazo. Ngaba ukuthandaza kungakunceda?

IBhayibhile ithi: “Wuphosele kuYehova umthwalo wakho, yena uza kukuxhasa. Soze avumele ilungisa liwe.” (INdumiso 55:22) Akhuthaza nyhani la mazwi! Ukuthandaza kungakunceda njani? Xa sithandaza kuThixo ngendlela afuna ngayo uza kusinika amandla okukwazi ukumelana neengxaki esinazo.—Jonga ibhokisi ethi “Sifumana Ntoni Xa Sithandaza?”

Sifumana Ntoni Xa Sithandaza?

Uxolo lwengqondo

“Zonke izinto zixeleleni uThixo; yaye uxolo lukaThixo oluyodlulayo indlela yabantu yokucinga, luza kuzikhusela iintliziyo neengqondo zenu ngoKristu Yesu.” (Filipi 4:6, 7) Xa uxelela uThixo iingxaki onazo uza kukunceda ukwazi ukuhlala uzolile uze wenze izinto ngobulumko nangona unestres.

Ubulumko obuvela kuThixo

“Nabani na odinga ubulumko, makaqhubeke ebucela kuThixo, ibe uza kumnika, kuba uThixo ubapha kakhulu bonke ababucelayo, engagxeki mntu.” (Yakobi 1:5) Xa sisengxakini kulula ngathi ukwenza izigqibo ezimbi. Kodwa xa uthandazela ubulumko, uThixo angakwazi ukukukhumbuza ngezinto ezincedayo ezibhalwe kwiLizwi lakhe iBhayibhile.

Intuthuzelo namandla

“Ezintweni zonke ndinamandla ngenxa yalowo undinika amandla.” (Filipi 4:13) Kuba uYehova enguThixo uSomandla, angakwazi ukukunika amandla okunyamezela iingxaki onazo. (Isaya 40:29) IBhayibhile ithi xa ithetha ngoYehova, ‘nguThixo wayo yonke intuthuzelo.’ Uyakwazi ukusithuthuzela “kubo bonke ubunzima esijongene nabo.”—2 Korinte 1:3, 4.