Isihlwele Esikhulu Sezinye Izimvu Sizukisa UThixo NoKristu

1. Intetho eyanikelwa kwindibano ka-1935 yatshintsha ntoni kumfana owabhaptizwa eneminyaka eyi-18?

KWAKUKHO intsapho yaBafundi BeBhayibhile, igama awayebizwa ngalo amaNgqina KaYehova ngelo xesha. Loo ntsapho yayinoonyana abathathu neentombi ezimbini. Bonke aba bantwana bakhula befundiswa ukukhonza uYehova uThixo nokulinganisa uYesu Kristu. Omnye waba nyana wabhaptizwa ngo-1926 eneminyaka eyi-18. Njengabo bonke aBafundi BeBhayibhile ngelo xesha, qho ngonyaka, lo mfana uthanda uThixo wayesitya eSikhumbuzweni. Ithemba awayenalo latshintsha xa weva intetho angasoze ayilibale eyayinomxholo othi: “Isihlwele Esikhulu.” Loo ntetho yanikelwa nguJ. F. Rutherford kwindibano ka-1935, eyayiseWashington, D.C., eUnited States. Yintoni eyathethwa kuloo ndibano ababeqala ukuyiva aBafundi BeBhayibhile?

2. Yintoni eyachazwa nguMzalwan’ uRutherford ababengayiqondi ngendlela echanileyo aBafundi BeBhayibhile?

² Kwintetho yakhe, uMzalwan’ uRutherford wachaza ukuba ngoobani esi ‘sihlwele sikhulu’ kuthethwa ngaso kwiSityhilelo 7:9. Ngaphambi kwaloo ntetho, aBafundi BeBhayibhile babecinga ukuba isihlwele esikhulu sasiza kuya ezulwini kodwa sasingazukuba ngookumkani kunye noYesu kuba sasingathembekanga kangako. Esebenzisa iZibhalo, uMzalwan’ uRutherford wathi isihlwele esikhulu asizukuphila ezulwini sona. Sizezinye izimvub uKristu awathi ziza kusinda ‘kwintlungu engathethekiyo’ zize ziphile ngonaphakade apha emhlabeni. (ISityhi. 7:14) Ethetha ngaso uYesu wathi: “Ndinazo nezinye izimvu, ezingezizo ezesi sibaya; nazo ndimele ndize nazo, ibe ziza kumamela ilizwi lam, zize zibe ngumhlambi omnye, zibe nomalusi omnye.” (Yoh. 10:16) Ezi zimvu, ngamaNgqina KaYehova athembekileyo nanethemba lokuphila kumhlaba oyiParadesi ngonaphakade. (Mat. 25:31-33, 46) Makhe sibone ukuba le ntetho yabutshintsha njani ubomi baBafundi BeBhayibhile abaninzi, kunye nobala mfana wabhaptizwa eneminyaka eyi-18.​—INdu. 97:11; IMize. 4:18.

UKULUNGISWA KWENDLELA ABABEQONDA NGAYO KWATSHINTSHA UBOMI BABANINZI

3-4. Kwindibano eyayingo-1935, yintoni abayiqondayo abakhonzi bakaYehova abaninzi ngethemba abanalo, ibe yintoni eyabenza baqonda loo nto?

³ Kwaba yimincili engathethekiyo kuloo ndibano xa uMzalwan’ uRutherford wathi: “Sicela bonke abanethemba lokuphila emhlabeni ngonaphakade baphakame.” Omnye umzalwana owayelapho uthi kwaphakama abantu abangaphezu kwe-10 000. Emva kokuba bephakame bonke wathi: “Uyabona! Nasi isihlwele esikhulu.” Wathi akutsho, abantu abakwazi ukuzibamba luvuyo. Bonke abaphakamayo babeqonda ukuba uYehova akabakhethelanga ukuya kuphila ezulwini. Ngoku, babesazi ukuba abathanjiswanga ngomoya kaThixo. Ngosuku olulandelayo lwendibano, kwabhaptizwa abantu abayi-840, abaninzi kubo izezinye izimvu.

⁴ Emva kwaloo ntetho, umfana ekuthethwe ngaye kwiziqendu ezidlulileyo nabanye abakhonzi bakaYehova abaninzi zange baphinde batye eSikhumbuzweni. Abaninzi babefana nomzalwana othobekileyo owathi: “Ndagqibelisa ukutya isonka nokusela iwayini yeSikhumbuzo ngo-1935. Ndaqonda ukuba uYehova khange andenze ndibe nethemba lokuphila ezulwini ngomoya wakhe. Ithemba endinalo lelokuphila apha emhlabeni, ndincedise xa usenziwa iparadesi.” (Roma 8:16, 17; 2 Kor. 1:21, 22) Ukuqala ngoko, liye landa inani lesihlwele esikhulu futhi siye sasebenza kunye nabathanjiswa abasesemhlabeni.

5. Uthini uYehova ngabantu abaye bayeka ukutya eSikhumbuzweni?

⁵ UYehova uthini ngabantu abayekayo ukutya eSikhumbuzweni emva konyaka ka-1935? Uthini ngoku xa iNgqina lakhe ebelithatha kwisonka newayini yeSikhumbuzo kuba licinga ukuba lithanjisiwe, liye layeka kuba liqonda ukuba alithanjiswanga? (1 Kor. 11:28) AmaKristu amaninzi ebesitya eSikhumbuzweni kuba ebengaliqondi kakuhle ithemba analo. Kodwa xa evuma ngokusuk’ entliziyweni ukuba ebephazama, ayeke, aze aqhubeke ethembekile kuYehova, ngokuqinisekileyo uza kuwamkelela kwezinye izimvu. Nokuba awasatyi, ayaya eSikhumbuzweni kuba eyibulela kakhulu into ayenzelwe nguYehova noYesu.

ITHEMBA ELIMANGALISAYO LESIHLWELE ESIKHULU

6. UYesu uyalela iingelosi ukuba zenze ntoni?

⁶ Ixesha lentlungu engathethekiyo lisemnyango, ngoko kuza kusinceda ukufunda ngento ethethwa kwiSityhilelo isahluko 7 ngabathanjiswa nesihlwele esikhulu esizezinye izimvu. UYesu uyalela iingelosi ukuba ziyibambe ziyiqinise imimoya emine yentshabalalo. Azimele ziyiyeke ivuthuze emhlabeni de atywinwe onke amaKristu athanjisiweyo. Loo nto ithetha ukuba de uYehova awabone ethembekile. (ISityhi. 7:1-4) La maKristu athanjisiweyo angabazalwana bakaKristu aza kufumana umvuzo wokuthembeka kwawo ngokuba ngookumkani nababingeleli kunye naye ezulwini. (ISityhi. 20:6) UYehova, uYesu neengelosi, baza kuvuya kakhulu xa bebona abathanjiswa abayi-144 000 befumana umvuzo wabo wokuphila ezulwini.

7. ISityhilelo 7:9, 10, sithi ngoobani ababonwa nguYohane embonweni, ubabona besenza ntoni? (Jonga umfanekiso ongaphandle.)

⁷ Emva kokuba ethethe ngaba kumkani nababingeleli bayi-144 000, uYohane uchaza enye into evuyisayo, “isihlwele esikhulu” sabantu abangaphezulu lee kwe-144 000. Sona asisazi ukuba siza kuba ngabantu abangaphi. (Funda iSityhilelo 7:9, 10.) “Sinxibe iimpahla ezimhlophe.” Le nto ibonisa ukuba siye ‘saziphepha iindlela ezimbi” zeli hlabathi likaSathana, sahlala sithembekile kuThixo nakuKristu. (Yak. 1:27) Siyakhwaza sisithi sisindisiwe ngenxa yento esiyenzelwe nguYehova noYesu, iMvana kaThixo. Ngelo xesha siphethe amasebe omthi wesundu. Le yona into ibonisa ukuba simamkela sivuya uKumkani okhethwe nguYehova, uYesu.​—Thelekisa uYohane 12:12, 13.

8. ISityhilelo 7:11, 12 sisixelela ntoni ngoYehova, uYesu, iingelosi nabathanjiswa?

⁸ Funda iSityhilelo 7:11, 12. Kwenzeka ntoni xa abasezulwini bebona isihlwele esikhulu? UYohane uthi bayavuya kwaye badumisa uThixo. UYehova, uYesu iingelosi nabathanjiswa baza kuvuyiswa kukubona isihlwele esikhulu siphuma kwintlungu engathethekiyo.

9. ISityhilelo 7:13-15 sithi senza ntoni isihlwele esikhulu?

⁹ Funda iSityhilelo 7:13-15. UYohane uthi isihlwele esikhulu ‘sizihlambile iimpahla zaso zamhlophe egazini leMvana.’ Le nto ithetha ukuba sinesazela esicocekileyo yaye siyathandwa nguYehova. (Isa. 1:18) La ngamaKristu azahlulele kuYehova aze abhaptizwa. Anokholo olungagungqiyo kwidini likaYesu yaye angabahlobo bakaYehova. (Yoh. 3:36; 1 Pet. 3:21) Yiloo nto uThixo ewathanda. ‘Enza umsebenzi wakhe ongcwele imini nobusuku’ emhlabeni. Akhuthele kumsebenzi wokushumayela nokwenza abafundi kuba uBukumkani BukaThixo yeyona nto ibalulekileyo kuwo.​—Mat. 6:33; 24:14; 28:19, 20.

10. Yintoni esiqiniseke ngayo isihlwele esikhulu, ibe yintoni le sinethemba lokuyibona isenzeka?

¹⁰ Isihlwele esikhulu esiza kusinda kwintlungu engathethekiyo siqinisekile ukuba uThixo uza kuhlala esikhathalele, kuba ‘Lowo uhleli etroneni uza kuyolulela phezu kwaso intente yakhe.’ Ekugqibeleni le nto kudala zinethemba layo kwaye ziyilindile ezinye izimvu ziza kuyibona isenzeka: ‘UThixo uza kuzosula zonke iinyembezi emehlweni azo, kungabi sabakho kufa, kungabi sabakho kuzila nakukhala nantlungu.’​—ISityhi. 21:3, 4.

11-12. (a) ISityhilelo 7:16, 17 sithi zeziphi iintsikelelo eziza kufunyanwa sisihlwele esikhulu kwixesha elizayo? (b) Yintoni ezimele ziyenze ezinye izimvu, ibe ziyenzela ntoni?

¹¹ Funda iSityhilelo 7:16, 17. Ngoku abanye abantu bakaYehova balambile kuba abanamali yokuthenga ukutya okanye ngenxa yeengxaki ezenziwe yimfazwe. Abanye basezitrongweni ngenxa yokholo lwabo. Sekunjalo, abo besihlwele esikhulu bavuyiswa kukwazi ukuba emva kokuba kutshatyalaliswe eli hlabathi likaSathana, baza kuba nokutya okuninzi kwaye baza kufundiswa nguYehova. Baza kukhuselwa kubushushu obutshisayo bomsindo kaYehova kwiintlanga. Emva kwentlungu engathethekiyo, uYesu uza kusa abantu abasindileyo ‘kumanzi obomi.’ Khawuyicinge nawe le nto: Isihlwele esikhulu sinethemba elimangalisayo. Kwiibhiliyoni zabantu ezakha zaphila, sona sinokungaze sazi ukuba ukufa kunjani.​—Yoh. 11:26.

¹² Ezinye izimvu zinethemba elimangalisayo kwaye ngenxa yelo themba ziyambulela uYehova noYesu. UYehova akazikhethelanga ukuya kuphila ezulwini, kodwa uzithanda njengokuba ethanda abathanjiswa. Abathanjiswa bekunye nezinye izimvu bayamzukisa uThixo noKristu. Enye yeendlela ababazukisa ngazo kukubakho kwiSidlo SeNkosi Sangokuhlwa.

BAZUKISE NGENTLIZIYO YAKHO YONKE ESIKHUMBUZWENI

13-14. Kutheni abathanjiswa nezinye izimvu besiya kwiSikhumbuzo sokufa kukaKristu?

¹³ Kule minyaka, bambalwa kakhulu abantu abatyayo eSikhumbuzweni. Kumabandla amaninzi akubikho nomnye. Abantu abaninzi ababa kwiSikhumbuzo banethemba lokuphila emhlabeni. Bayela ntoni ke kwiSidlo SeNkosi Sangokuhlwa? Bona bafana nabantu abamenywe emtshatweni. Baya emtshatweni kuba kutshata abantu ababathandayo. Ngoko isihlwele esikhulu siya eSikhumbuzweni kuba sithanda uKristu nabathanjiswa. Esinye isizathu kukuba simbulela kakhulu uYesu ngokuncama ubomi bakhe ukuze sibe nethemba lokuphila ngonaphakade emhlabeni.

¹⁴ Esinye isizathu sokuba ezinye izimvu ziye eSikhumbuzweni kukwenza into uYesu awasiyalela ukuba siyenze. Ukuqala kwakhe ukwenza iSidlo SeNkosi Sangokuhlwa, uYesu wathi kubapostile bakhe: “Hlalani nisenza le nto, niyenzela ukundikhumbula.” (1 Kor. 11:23-26) Ngoko, besekho abathanjiswa abasesemhlabeni, ezinye izimvu azizukuyeka ukuya eSikhumbuzweni. Zide zimeme nabanye abantu ukuba baye.

15. Yintoni esinokuyenza ukuze sizukise uThixo noKristu eSikhumbuzweni?

¹⁵ ESikhumbuzweni sizukisa uThixo noKristu ngengoma nomthandazo. Intetho yeSikhumbuzo salo nyaka ithi: “Yixabise Into Akwenzele Yona UThixo NoKristu!” Iza kusenza simbulele kakhulu uYehova noKristu. Xa kuhanjiswa isonka newayini, abantu abakhoyo baza kube becinga into eziyimelayo; umzimba negazi likaYesu. Siza kukhumbula nokuba uYehova wavuma ukuba uNyana wakhe aze kusifela ukuze sifumane ubomi. (Mat. 20:28) Bonke abantu abamthandayo uTata wethu osezulwini noNyana wakhe baza kuya eSikhumbuzweni.

MBULELE UYEHOVA NGENTO AKUTHEMBISE YONA

16. Ziintoni abafana ngazo abathanjiswa nezinye izimvu?

¹⁶ UThixo uthanda abathanjiswa ngokufanayo nezinye izimvu. Omabini la maqela abalulekile kuye, wawathenga ngobomi boNyana wakhe amthandayo. Into ohluke ngayo kukuba elinye liza kuphila apha emhlabeni, elinye ezulwini. Bonke abantu abakula maqela bamele bahlale bethembekile kuThixo nakuKristu. (INdu. 31:23) Enye into, umoya kaThixo usebenza ngokufanayo kubathanjiswa nabezinye izimvu. Le nto ithetha ukuba sonke uYehova uyasipha umoya wakhe ukuze usincede kuloo nto siyidingayo.

17. Yintoni abayifunayo abathanjiswa abasesemhlabeni?

¹⁷ AmaKristu athanjisiweyo akazalwanga enethemba lokuphila ezulwini, nguThixo owenza abe nalo. Ayacinga ngalo, alithandazele kwaye ahlala enomdla wokufumana umvuzo wokuphila ezulwini. Awazi ukuba imizimba yawo iza kuba njani xa esezulwini. (Fil. 3:20, 21; 1 Yoh. 3:2) Into ayifunayo kukudibana noYehova, uYesu, iingelosi nabanye abathanjiswa abasezulwini. Bakufuna nyhani ukuba kunye nabo kuBukumkani basezulwini.

18. Yintoni eziyingxameleyo ezinye izimvu?

¹⁸ Ezinye izimvu zinomdla kwithemba abanalo bonke abantu; ukuphila ngonaphakade emhlabeni. (INtshu. 3:11) Zingxamele ixesha eziza kuncedisa ngalo ekwenzeni wonke lo mhlaba ube yiparadesi. Zihlala zicinga ngexesha eziza kukwazi ngalo ukuzakhela izindlu zazo, zizityalele iigadi zazo zize zihlale zisempilweni nabantwana bazo. (Isa. 65:21-23) Ingathi alisafiki elo xesha, xa ziza kube zizula wonke umhlaba ukuze ziwazi, zisiya kwiintaba, amahlathi, iilwandle, zazi nezinye izinto ngayo yonke indalo kaYehova. Eyona nto izivuyisa kakhulu kukwazi ukuba ziza kuya zisiba ngabahlobo abanyaniseke kakhulu kuYehova.

19. ISikhumbuzo lixesha lantoni? Siza kuba nini kulo nyaka?

¹⁹ UYehova unike bonke abakhonzi bakhe ithemba elimangalisayo. (Yer. 29:11) ISikhumbuzo sokufa kukaKristu lixesha elikhethekileyo kubo bonke abathanjiswa nezinye izimvu. Lixesha lokuzukisa uThixo noKristu ngenxa yento abasenzele yona ukuze sikwazi ukuphila ngonaphakade. Olu lolona suku lubalulekileyo adibana ngalo amaKristu qho ngonyaka. Siza kuba ngoMgqibelo, Matshi 27, 2021, emva kokutshona kwelanga. Kulo nyaka baninzi abaza kuya ngokukhululekileyo eSikhumbuzweni. Abanye bayachaswa, kodwa baza kuya, kanti abanye baza kusenza besezitrongweni. Sinqwenela ukuba wonke umntu akuvuyele ukuba seSikhumbuzweni njengoko uYehova, uYesu, iingelosi nabathanjiswa beza kube bebukele!