“Ngoku Ndiyakuthanda Ukushumayela!”

NDAYEKA UKUVUYA

Xa ndandimalunga neminyaka eyi-13, ndaya ndiyeka ukumthanda uYehova. Ndandibona ngathi abantwana endifunda nabo benza yonke into abayithandayo, akukho nto ibanqandayo. Nam ndandifuna ukuphila njengabo. Yayingathi imithetho endiyibekelwe ekhaya nendlela aphila ngayo amaKristu ayindenzi ndikhululeke. Nkqu nokukhonza uYehova ndakubona kunzima kakhulu. Into endingazange ndiyilibale kukuba uYehova ukhona, kodwa ndandiyekile ukuba ngumhlobo wakhe.

Zange ndiyeke kona ukushumayela, qha ndandishumayela ngelo xesha nelo xesha. Loo mini ndiye ngayo entsimini, ndandisiya ndingalungiselelanga, kube nzima nokuqala incoko. Naxa sendiyiqalile kwakuba nzima ukuqhubeka nayo. Loo nto yandenza andabi namabuyelo okanye izifundo. Ndandingasakuvuyeli, ndingasakuthandi nokukuthanda ukuya kushumayela. Ndandide ndizibuze, ‘Umntu ukwazi njani ukuba sentsimini qho, iveki emva kwenye nenyanga emva kwenye?’

Xa ndandina-17, ndafuna nyhani ukukhululeka, ndenze nantoni na endiyithandayo. Ndapakisha iimpahla zam, ndaya kuzihlalela eAustralia. Babekhathazeke nyhani abazali bam xa ndandimka ekhaya, kodwa babecinga ukuba andizukuyeka ukukhonza uYehova.

Ukufika kwam eAustralia, ndaba ngumvakalisi njee ngegama. Ndandiphoswa ziintlanganiso. Ndaba nootshomi abangangam ababengayi qho kwiintlanganiso. Babesiba kwiintlanganiso namhlanje, ngobusuku obulandelayo babe kwiinightclub. Xa ndicinga ngaloo maxesha, ndiyabona ukuba ndandingumacala, ndifumaneka entlanganweni kanti ndinganqabanga nasehlabathini. Kodwa kuwo omabini la macala, alikho endandisonwaba kulo.

ISIFUNDO ESIBALULEKILEYO ENDANDINGASILINDELANGA

Malunga neminyaka emibini emva koko, ndadibana nodade owayengazazi ukuba undenza ndicinge ubomi endandikhe ndabuphila. Ndandihlala nabanye oodade abane abangatshatanga. Samema umveleli wesiphaluka nomfazi wakhe uTamara ukuba baze kuhlala nathi kuloo veki. Xa umveleli esenza izinto zebandla, umkakhe wayehlala nathi sincokole, sihleke kube mnandi. Ndandiyithanda loo nto. Kwakungafuneki uqale ucinge xa uza kuncokola naye. Zange ndiyicinge into yokuba umntu oxakeke njengaye enkonzweni angakwazi ukuhlala ancokole, onwabe nathi.

UTamara wayengumntu okhutheleyo. Wawungasoze ungayithandi inyaniso nokuya entsimini xa uhleli naye. Wayeyivuyela indlela azinikele ngayo kumsebenzi kaYehova. Ngelo xesha mna ndandingavuyi kuba ndandingazinikelanga kumsebenzi kaYehova, ndandisenza njee. Indlela awayezenza ngayo izinto nawayonwabe ngayo yandenza ndacinga ukuba uYehova ufuna sonke simkhonze ‘sikhwaza sivuya.’ —INdu. 100:2.

NDAPHINDA NDAQALA APHO BENDIYEKE KHONA

Nam ndandifuna ukonwaba njengoTamara, kodwa zininzi izinto ekwakufuneka ndizilungise. Zange ndikhawuleze ndizilungise, kodwa ndade ndaqala kancinci kancinci. Ndaqala ndalungiselela xa ndiza kuya entsimini, ndamana ndisiba nguvulindlela ongumncedani. Loo nto yandinceda ndayeka ukoyika, ndazithemba. Ngoku ndandikuvuyela ukuba sentsimini kuba ndandiyisebenzisa kakhulu iBhayibhile. Kungabanga xesha lide, ndaba nguvulindlela ongumncedani oqhubekayo.

Ndaqala ukuba nootshomi abaneminyaka eyahlukahlukeneyo, ababekuvuyela ukumkhonza ngamandla abo onke uYehova. Izinto ababezenza zandinceda ndacinga ngeyona nto ibalulekileyo ebomini bam, ndaqala ukuyifunda yonke imihla iBhayibhile. Ndandisonwaba kakhulu xa ndisentsimini, ndaba nguvulindlela othe ngxi. Emva kweminyaka emininzi, ndaphinda ndonwaba, ndaziva ndisekhaya xa ndisebandleni.

NDAFUMANA UVULINDLELA ENDINGASOZE NDAHLUKANE NAYE

Emva konyaka ndadibana noAlex, umzalwana onobubele nowayengathethi le enze leya, owayethanda uYehova nokushumayela. Wayesisicaka solungiselelo, eneminyaka eyi-6 enguvulindlela. Wakhonza iinyanga eziyi-7 ukuya kweziyi-8 apho kwakufuneka abavakalisi abaninzi khona, eMalawi. Apho, wayesoloko ekunye nabavangeli basemazweni. Wafunda izinto ezininzi kubo, bamkhuthaza nangokuba ukukhonza uYehova kuhlale kuyeyona nto ibalulekileyo kuye.

Ngo-2003, satshata, sisekwinkonzo yexesha elizeleyo nangoku. Zininzi izinto ezintle esizifundileyo, noYehova uye wasisikelela ngeendlela ezininzi.

UYEHOVA ZANGE AYEKE UKUSISIKELELA

Ngo-2009, samenywa ukuba siye kuba ngabavangeli basemazweni eTimor-Leste, ilizwana elikwiziqithi zaseIndonesia. Sothuka, savuya kodwa sinalo nexhala. Kwiinyanga ezintlanu emva koko, safika kwidolophu elikomkhulu laseTimor-Leste, iDili.

Ubomi balapho babahluke kakhulu kwesibuqhelileyo. Kwafuneka siqhele indlela ekuphilwa ngayo, sifunde ulwimi oluthethwayo, siqhele nokutya kwakhona. Entsimini sasihlala sidibana nabantu ababehlupheka kakhulu, abangafundanga kangako okanye abangakhange baye kwaukuya esikolweni, nababephethwe kabuhlungu. Abanye babelimele emizimbeni, bengonwabanga ngenxa yemfazwe nobundlobongela.a

Entsimini kwakusenzeka izinto ezimangalisayo! Ngokomzekelo, ndakha ndadibana nentombazana enguMaria eyayilusizi nyhani. Yayineminyaka eyi-13.b Kwiminyaka embalwa edlulileyo waswelekelwa ngumamakhe, utatakhe yena wayemnqabele. Njengoontanga bakhe abaninzi, wayengazi ukuba ufuna ukwenza ntoni ebomini. Ndikhumbula ngenye imini ekhala endibalisela indlela aziva ngayo. Ndandingeva ukuba uthini kuba ndandingekalazi kakuhle ulwimi lwalapho. Ndacela uYehova ukuba andincede ndimkhuthaze, ndamfundela nezibhalo ezimthuthuzelayo. Ngokuya ihamba iminyaka, ndabona indlela inyaniso ebutshintsha ngayo ubomi bukaMaria, nkqu nendlela abukeka ngayo. Wabhaptizwa, ngoku naye ufundela abantu iBhayibhile. Uyayibona indlela athandwa ngayo yintsapho yakowabo enkulu, abantu bakaYehova.

UYehova uyawusikelela umsebenzi wokushumayela eTimor-Leste. Abavakalisi abaninzi babhaptizwe kwiminyaka eyi-10 edlulileyo, kodwa abanye ngoovulindlela, izicaka zolungiselelo nabadala. Abanye bakwiiofisi zokuguqulela, baguqulela iincwadi ezithetha ngeBhayibhile ngolwimi oluthethwayo. Kuba mnandi nyhani kum xa ndibeva becula kwiintlanganiso, bencumile futhi besiba ngabahlobo bakaYehova.

KWAKUMNANDI NGAPHEZU KOKUBA NDANDICINGA

ETimor-Leste ubomi babahluke kakhulu kwesasibuphila eAustralia, kodwa kwakumnandi kakhulu. Ngamanye amaxesha, sasikhwela kwibhasi encinci egcwele qhu ngabantu, iintlanzi ezomileyo neveji eninzi ethengwe emarikeni. Ngezinye iimini sasiye siqhube isifundo kwindlu encinci etshisayo, emdaka phantsi nekwehla kusenyuka iinkukhu kuyo. Eyona nto ndandiye ndiyicinge yile, ‘Kodwa ubomi buyamangalisa!’

Xa ndicinga ngeminyaka edlulileyo, ndiyababulela abazali bam abandifundisa ngoYehova nababehlala bekunye nam, nkqu nangala minyaka ndandingamkhonzi kakuhle uYehova. Ndiye ndayibona isenzeka kum into ethethwa yiMizekeliso 22:6. Utata nomama basithanda kakhulu sinoAlex; bayavuya xa besibona sikhonza uYehova. Ukusuka ngo-2016 siye sakumsebenzi wesiphaluka kwintsimi yesebe laseAustralasia.

Andiyikholelwa nanamhlanje into yokuba ndandikhe andakuthanda ukushumayela. Ngoku ndikuthanda nyhani! Into endiyifundileyo kukuba, nokuba kungenzeka ntoni kubomi bethu, ayikho into evuyisa njengokuzinikela ekukhonzeni uThixo. Ndivuye nyhani kule minyaka iyi-18 ndikhonza uYehova kunye noAlex. Ngoku ndiyiqonda kakuhle indlela anyanise ngayo umdumisi uDavide xa ethetha ngoYehova esithi: “Bonke abo bathembele ngawe baza kuvuya. . . . Yaye baza kuvuya abo bathanda igama lakho.”​—INdu. 5:11.