Sebenzisana NeNkokheli Yethu UYesu

1. Yintoni ayifunayo uYehova kule mihla?

INTO efunwa nguThixo kule mihla kukuba iindaba ezilungileyo ezingoBukumkani zishunyayelwe kuwo wonke umhlaba. (Marko 13:10; 1 Tim. 2:3, 4) Ngumsebenzi Wakhe lo, ibe ubaluleke kangangokuba uye wabeka uNyana wakhe amthandayo ukuba ibe nguye okhokelayo kuwo. Sinokuqiniseka ukuba, ekubeni lo msebenzi usezandleni zikaYesu, uza kwenziwa ugqitywe ngaphambi kokuba kufike isiphelo.—Mat. 24:14.

2. Siza kufunda ngantoni kweli nqaku?

² Kweli nqaku siza kubona ukuba uYesu ulisebenzisa njani ‘ikhoboka lakhe elithembekileyo neliyingqondi’ ukuze lifundise izinto ezikwiLizwi LikaThixo nokuze lincede abalandeli bakhe basebenze kakuhle kwelona phulo likhulu lokushumayela lakha labakho. (Mat. 24:45) Siza kubona nokuba singasebenzisana njani noYesu nekhoboka elithembekileyo.

UYESU UYAKHOKELA KUMSEBENZI WOKUSHUMAYELA

3. UYesu unikwe igunya lokwenza ntoni?

³ UYesu uyakhokela kumsebenzi wokushumayela. Yintoni esenza siqiniseke? Ngaphambi nje kokuba aye ezulwini, wadibana nabanye abalandeli bakhe abathembekileyo kwintaba yaseGalili. Wathi kubo: “Ndinikwe lonke igunya ezulwini nasemhlabeni.” Khawuve into awayithetha emva koko: “Ngoko ke, hambani niyokubenza abafundi abantu beentlanga zonke.” (Mat. 28:18, 19) Ngoko enye yezinto uYesu azinikiweyo ligunya lokukhokela kumsebenzi wokushumayela.

4. Yintoni esenza siqiniseke ukuba uYesu usakhokela kumsebenzi wokushumayela?

⁴ UYesu wathi umsebenzi wokushumayela wawuza kwenziwa kuzo zonke ‘iintlanga’ futhi wayeza kuba nabalandeli bakhe “yonke imihla de kube sekuphelisweni kweli hlabathi.” (Mat. 28:20) Loo mazwi abonisa ukuba uYesu wayeza kuqhubeka ekhokela kulo msebenzi de kube yile mihla yethu.

5. Yintoni esiyenzayo ukuze kwenzeke into eyayiprofetwe kwiNdumiso 110:3?

⁵ UYesu wayengenaxhala lokuba baza kuvela phi abasebenzi ngexesha lesiphelo sehlabathi. Wayesazi ukuba yayiza kwenzeka into eyaprofetwa ngumdumisi, esithi: “Abantu bakho baza kuzinikela ngokuvumayo ngemini yokuphuma komkhosi wakho.” (INdu. 110:3) Ukuba ushumayela iindaba ezilungileyo, usebenzisana noYesu nekhoboka elithembekileyo, futhi nawe ufaka isandla ekwenzekeni kwesi siprofeto. Umsebenzi wona uyaqhubeka, kodwa zikhona iingxaki.

6. Yeyiphi ingxaki abanayo abantu abashumayela ngoBukumkani kule mihla?

⁶ Ingxaki abanayo abantu abashumayela ngoBukumkani kukungafunwa. Abawexuki, abefundisi nabantu beepolitiki balahlekise abantu abaninzi, bethetha izinto ezingeyonyani ngomsebenzi wethu. Xa abantu esibaziyo, esizalana nabo okanye esisebenza nabo bebukholelwa obu buxoki, basenokuzama ukusenza siyeke ukukhonza uYehova, siyeke noko kushumayela. Kwamanye amazwe, abantu abangasifuniyo bade baboyikise abazalwana noodade, babahlasele baze babavalele nasezitrongweni. Yonke le nto ayisothusi. Kaloku uYesu wathi: ‘Niza nicatshukelwe zizo zonke iintlanga ngenxa yegama lam.’ (Mat. 24:9) Kwainto yokuba singafunwa ibonisa ukuba siyamvuyisa uYehova. (Mat. 5:11, 12) NguSathana owenza abantu bangasifuni. Kodwa soze alenze ixesha kuYesu! Kuba sincedwa nguYesu, iindaba ezilungileyo zishunyayelwa kubantu bazo zonke iintlanga. Nantsi into esenza siqiniseke.

7. Yintoni ebonisa ukuba iyenzeka into eyayiprofetwe kwiSityhilelo 14:6, 7?

⁷ Enye ingxaki esinayo kukuba abantu abaninzi esishumayela kubo abathethi ulwimi lwethu. Embonweni, uYesu wabonisa umpostile uYohane ukuba ukushunyayelwa kweendaba ezilungileyo kwakungazukunqandwa yiloo nto. (Funda iSityhilelo 14:6, 7.) Njani? Sizama ukufikelela abantu abaninzi kangangoko kunokwenzeka ukuze beve umyalezo woBukumkani. Namhlanje, abantu abasemhlabeni wonke bayakwazi ukufunda amanqaku athetha ngeBhayibhile kwiwebhsayithi yethu ujw.org, kuba izinto ezikuyo zifumaneka ngeelwimi ezingaphezu kwe-1 000! IQumrhu Elilawulayo lavuma ukuba eyona ncwadi siyisebenzisela ukwenza abafundi, ethi Phila Ubomi Obumnandi Ngonaphakade! iguqulelwe ngeelwimi ezingaphezu kwe-700! Ukuze kuncedwe nabantu abangevayo bafunde izinto ezithethwa yiBhayibhile benzelwe iividiyo; abangaboniyo bona benzelwa iincwadi zebraille. Sizibona zisenzeka izinto ezaziprofetwe eBhayibhileni. Abantu ‘bazo zonke iilwimi zeentlanga’ bafunda ukuthetha ‘ulwimi olusulungekileyo’ lwenyaniso eseBhayibhileni. (Zek. 8:23; Zef. 3:9) Yonke le nto yenzeka kuba uYesu ekhokela kakuhle.

8. Ziintoni esezenzekile ngenxa yomsebenzi wethu wokushumayela?

⁸ Namhlanje kukho amaNgqina angaphezu kwe-8 000 000, kumazwe ayi-240, kubekho nabantu abaninzi ababhaptizwayo qho ngonyaka! Eyona nto ibaluleke ngaphezu kwamanani ziimpawu zamaKristu abaye banazo aba bazalwana noodade basand’ ukubhaptizwa, ‘ezibubuntu obutsha.’ (Kol. 3:8-10) Abaninzi kubo baye bayeka ukuziphatha kakubi, ukuthanda ukulwa, ukucalula nokungabathandi abantu abasuka kwamanye amazwe. Iyenzeka into eyayiprofetwe kuIsaya 2:4, ‘abaphindi bafunde ukulwa imfazwe.’ Njengoko sizama ngamandla ukuba nobuntu obutsha, sinceda nabanye abantu bafune ukuba kwintlangano kaYehova, sibonisa nokuba silandela inkokheli yethu, uYesu Kristu. (Yoh. 13:35; 1 Pet. 2:12) Azizenzekeli ke ezi zinto. Zenzeka kuba sincedwa nguYesu.

UYESU UMISELA IKHOBOKA

9. Ngokutsho kukaMateyu 24:45-47, uYesu wathi kwakuza kwenzeka ntoni ngexesha lesiphelo?

⁹ Funda uMateyu 24:45-47. UYesu wathi uza kumisela ‘ikhoboka elithembekileyo neliyingqondi’ ngexesha lesiphelo, ukuze lifundise abantu bakhe iLizwi LikaThixo. Ngoko silindele ukuba elo khoboka lisebenze nyhani kule mihla yethu. Iyenzeka ke loo nto. Inkokheli yethu isebenzise amadoda ambalwa athanjisiweyo ukuze anike abantu bayo “ukutya” okuqinisa ukholo “ngexesha elifanelekileyo.” La madoda ayazi ukuba awazonkosi phezu kokholo lwabanye. (2 Kor. 1:24) Ayaqonda ukuba “inkokheli nomphathi” nguYesu Kristu.—Isa. 55:4.

10. Yeyiphi kwezi ncwadi zikule mifanekiso ekuncede wakhonza uYehova?

¹⁰ Ukususela ngo-1919, ikhoboka elithembekileyo liye lenza iincwadi ukuze lincede abantu abanomdla bafunde inyaniso eseLizwini LikaThixo. Ngo-1921, lenza incwadi ethi Uhadi LukaThixo ukuze libancede bazazi iimfundiso ezilula zeBhayibhile. Ekuhambeni kwexesha, kwenziwa nezinye iincwadi. Yeyiphi kwezi ekuncede wamazi waza wamthanda uTata wethu osezulwini? UThixo Makabe Nenyaniso, Inyaniso Ekhokelela Kubomi Obungunaphakade, Unokuphila Ngonaphakade KwiParadisi Esemhlabeni, Ulwazi Olukhokelela Kubomi Obungunaphakade, Yintoni Ngokwenene Efundiswa YiBhayibhile?, Isifundisa Ntoni IBhayibhile?, nale intsha ithi Phila Ubomi Obumnandi Ngonaphakade! Zonke ezi ncwadi zifike kanye ngexesha ezidingeka ngalo.

11. Kutheni kubalulekile ukuba sonke sifumane izinto eziza kusinceda sihlale sinokholo oluqinileyo?

¹¹ Onke amaKristu nabantu abanomdla bamele bazazi iimfundiso ezinzulu zeBhayibhile. Umpostile uPawulos wathi: “Ukutya okuqinileyo kokwabantu abaqolileyo.” Waphinda wathi xa sizenza izinto esizifundiswa yiBhayibhile, sitsho sikwazi “ukwahlula into elungileyo nembi.” (Heb. 5:14) Akukho lula ukuthobela imithetho kaThixo kule mihla kuba abantu abaninzi baziphethe kakubi. Kodwa uYesu uhlala eqiniseka ukuba sihlala sifumana izinto eziza kusinceda sihlale sinokholo oluqinileyo. Ezo zinto zisuka kwiLizwi LikaThixo eliphefumlelweyo, iBhayibhile. Likhokelwa nguYesu ikhoboka xa lilungiselela naxa lisinika izinto eziqinisa ukholo.

12. Ziintoni ezibonisa ukuba siye salizukisa njengoYesu igama likaThixo?

¹² Nathi njengoYesu, siye salizukisa ngendlela elimele lizukiswe ngayo igama likaThixo. (Yoh. 17:6, 26) Ngokomzekelo, ngo-1931 saqalisa ukuba negama elitsha elisuka eZibhalweni elithi AmaNgqina KaYehova. Loo nto yayibonisa ukuba sifuna ukubizwa ngegama loTata wethu osezulwini futhi libaluleke kakhulu kuthi. (Isa. 43:10-12) Ukususela ngo-Oktobha waloo nyaka, igama likaThixo lahlala likwiphepha lokuqala lale magazini uyifundayo. Enye into, kwiZibhalo Ezingcwele ZeNguqulelo Yehlabathi Elitsha, igama likaThixo liye labuyiselwa kwiindawo elalikade likuzo. Le nto yahluke kakhulu kwinto eyenziwe ziicawa ezithi zezamaKristu, eziye zalikhupha igama likaThixo kwiiBhayibhile zazo ezininzi.

UYESU WENZA ABALANDELI BAKHE BALUNGELELANE

13. Yintoni ekwenza uqiniseke ukuba ‘ikhoboka elithembekileyo neliyingqondi’ lisetyenziswa nguYesu? (Yoh. 6:68)

¹³ Ukuze uThixo akhonzwe ngendlela ayifunayo, uYesu wenze kwakho intlangano esemhlabeni esebenzisa ‘ikhoboka elithembekileyo neliyingqondi.’ Uziva njani ngokuba kule ntlangano? Mhlawumbi ungathetha amazwi afanayo nawathethwa ngumpostile uPetros kuYesu, esithi: “Singaya kubani, inguwe nje onamazwi anika ubomi obungunaphakade?” (Yoh. 6:68) Ngebunjani ubomi bethu ukuba besingekho kule ntlangano? UYesu usebenzisa yona ukuze sifumane yonke into esiyidingayo ukuze sihlale sithembekile kuThixo. Usifundisa nendlela yokuwenza kakuhle umsebenzi wethu wokushumayela. Enye into ayenzayo kukusinceda sibe ‘nobuntu obutsha’ ukuze simvuyise uYehova.—Efe. 4:24.

14. Kukuncede ngantoni ukuba kwintlangano kaYehova kweli xesha lekhorona?

¹⁴ UYesu usiyalela ngobulumko ngamaxesha anzima. Xa bekuqalisa ikhorona iye yacaca kakuhle indlela esinceda ngayo imiyalelo yakhe. Xa abantu abaninzi bebengazi ukuba benze ntoni, uYesu uye waqiniseka ukuba thina sifumana imiyalelo eza kusinceda sihlale sikhuselekile. Siye sakhuthazwa ukuba sinxibe iimask xa sisiya kwiindawo ezinabantu size singasondelelani nabo. Abadala bona baye bakhuthazwa ukuba bahlale befowunela bonke abazalwana noodade, bazazi nezinto abazidingayo ukuze bakhuseleke, babe sempilweni baze bahlale bengabahlobo bakaYehova. (Isa. 32:1, 2) Siye sifumana eminye imiyalelo nezinto ezikhuthazayo kwiingxelo zeQumrhu Elilawulayo.

15. Besisiya njani kwiintlanganiso nasentsimini kweli xesha lekhorona? Yintoni eye yenzeka ngenxa yaloo nto?

¹⁵ Ngeli xesha lekhorona, siye safumana imiyalelo yendlela yokuqhuba iintlanganiso nokushumayela. Ngokukhawuleza siye safumana iintlanganiso, iindibano zesiphaluka nezengingqi ngevideoconferencing. Iindlela esiqalise ukushumayela ngazo kakhulu kukubhala iileta nokufowuna. UYehova uye wayisikelela loo mizamo yethu. Kumasebe amaninzi baye banda kakhulu abavakalisi. Phofu kukho nezinto ezikhuthazayo eziye zenzeka kubazalwana noodade abaninzi.—Jonga ibhokisi ethi “UYehova Uyawusikelela Umsebenzi Wethu Wokushumayela.”

16. Yintoni esimele siqiniseke ngayo?

¹⁶ Kungenzeka ukuba abanye bebecinga ukuba intlangano ibizibaxa izinto kwimiyalelo yendlela yokuzikhusela kwikhorona. Kodwa izinto ezenzekileyo ziye zabonisa ukuba ibingabaxi tu. (Mat. 11:19) Xa sicinga ngendlela uYesu abakhokela ngayo abantu bakhe, siqinisekile ukuba nokuba kungenzeka ntoni, uYehova noNyana wakhe amthandayo baza kuba nathi.—Funda amaHebhere 13:5, 6.

17. Uziva njani ngokuba neNkokheli enguYesu?

¹⁷ Kuyinyhweba nyhani ukuba neNkokheli enguYesu! Sikwintlangano enabantu abamanyeneyo nangona benezithethe ezingafaniyo, besuka kumazwe angafaniyo, bethetha neelwimi ezingafaniyo. Sifundiswa izinto ezininzi ezikwiLizwi LikaThixo nendlela yokuwenza kakuhle umsebenzi wokushumayela. Sonke sincedwa ukuba sibe nobuntu obutsha, sifunda nokuthanda abanye. Sizingomb’ isifuba ngokuba neNkokheli enguYesu!