Ngaba ‘Ukulungele Ukuthobela’?

1. Ziintoni ezinokwenza kube nzima ukuba sithobele?

NGABA ngamanye amaxesha kukhe kube nzima ukuthobela? Kwakukhe kube nzima nakuKumkani uDavide. Yiloo nto wathandaza kuThixo esithi: “Ndenze ndikufune ukukuthobela.” (INdu. 51:12) Wayemthanda uYehova. Kodwa ngamanye amaxesha kwakukhe kube nzima ukumthobela. Kunjalo ke nakuthi. Kutheni? Okokuqala, ukungathobeli sakufumana kubazali bethu bokuqala. Okwesibini, uSathana usoloko ezama ukusenza singamthobeli uYehova njengaye. (2 Kor. 11:3) Okwesithathu, siphila phakathi kwabantu beli hlabathi abangathobeliyo nabalawulwa ‘ngumoya osebenza kwabo bangamthobeliyo uThixo.’ (Efe. 2:2) Ngoko simele silwe kakhulu nemizimba yethu enesono, uMtyholi neli hlabathi ukuze sithobele uYehova nabantu abanike igunya.

2. Kuthetha ukuthini ‘ukukulungela ukuthobela’? (Yakobi 3:17)

² Funda uYakobi 3:17. UYakobi waphefumlelwa ukuba abhale athi abantu abazizilumko ‘bakulunge ukuthobela.’ Inoba ithetha ukuthini loo nto? Simele sikufune nyhani ukuthobela abantu uYehova abavumele ukuba babe negunya. Kodwa akalindelanga ukuba sithobele umntu ofuna singayihoyi imithetho Yakhe.​—IZe. 4:18-20.

3. Kutheni kubalulekile kuYehova ukuba sithobele abantu abanegunya?

³ Kusenokuba lula ukuthobela uYehova kunokuthobela abantu. Kaloku yena akaphazami xa esinika imiyalelo. (INdu. 19:7) Kodwa bona abantu abanegunya bakhe baphazame. Sekunjalo, likhona igunya uTata wethu osezulwini alinike abazali, amagosa karhulumente nabadala. (IMize. 6:20; 1 Tes. 5:12; 1 Pet. 2:13, 14) Xa sibathobela sithobela uYehova. Makhe sibone ukuba singabathobela njani abantu abanikwe igunya, ngoxa ngamanye amaxesha sisenokungavumelani nemiyalelo abasinika yona okanye kube nzima ukuyithobela.

THOBELA ABAZALI

4. Kutheni abantwana abaninzi bengabathobeli abazali?

⁴ Abantwana bethu bakhula phakathi kwabantwana ‘abangabathobeliyo abazali.’ (2 Tim. 3:1, 2) Kutheni abaninzi babo bengathobeli? Abanye bavakalelwa kukuba abazali babo bathetha le benze leyaa. Balindele ukuba abantwana benze izinto abangazenziyo bona. Abanye bacinga ukuba izinto abazicetyiswa ngabazali babo azincedi okanye zibonisa ukuba akufunwa baphazame nakancinci. Ukuba usemtsha, ngaba ukhe uvakalelwe ngaloo ndlela? Akukho lula kwabaninzi ukuthobela lo myalelo kaYehova: “Bathobeleni abazali benu ngokwendlela eyamkelekileyo eNkosini, kuba nenza ubulungisa xa nisenza loo nto.” (Efe. 6:1) Yintoni enokuninceda niwuthobele?

5. Kutheni uYesu engoyena mntu abanokuyifunda kuye abantu abasebatsha indlela yokuthobela abazali? (Luka 2:46-52)

⁵ Oyena mntu ninokufunda kuye ukuthobela nguYesu. (1 Pet. 2:21-24) Abazali bakhe babenesono, yena engenaso. Kodwa wayebahlonipha nangona babezenza iimpazamo, ngamanye amaxesha bangaziqondi nezinto awayezenza. (Eks. 20:12) Cingani ngento eyenzekayo xa wayeneminyaka eyi-12. (Funda uLuka 2:46-52.) Abazali bakhe baya naye eYerusalem, baza xa begoduka ababona ukuba ushiyekile. Babemele baqiniseke ukuba bagoduka nabo bonke abantwana babo emva kwepasika. Bathi bakumfumana, uMariya wamxelela ukuba nguye obafake kule ngxaki bakuyo! UYesu wayesenokumxelela ukuba umdlel’ indlala. Kodwa kunokuba enze loo nto, wabaphendula ngembeko abazali bakhe, futhi zange athethe into ininzi. Sekunjalo, uYosefu noMariya ‘babengayiqondi into awayeyithetha.’ Kodwa “waqhubeka ebathobela.”

6-7. Ziintoni ezinokunceda abantu abasebatsha bathobele abazali?

⁶ Bantu abasebatsha, ngaba kukhe kube nzima ukubathobela abazali benu xa besenza iimpazamo okanye benganiqondi? Yintoni enokuninceda? Okokuqala, cingani ngendlela aziva ngayo uYehova. IBhayibhile ithi xa nithobela abazali benu, “iNkosi iyayithanda loo nto.” (Kol. 3:20) UYehova uyazi xa abazali benu benganiqondi kakuhle okanye benibekela imithetho ekungekho lula ukuyithobela. Kodwa xa nivele niyithobele, niza kumvuyisa.

⁷ Okwesibini, cingani ngendlela abaziva ngayo abazali benu xa nibathobela, bayonwaba batsho banithembe. (IMize. 23:22-25) Loo nto inokunenza niye nivana kakhulu. Omnye umzalwana osemtsha waseBelgium, uAlexandre, uthi: “Xa ndaqalisa ukuzenza izinto abazali bam ababesithi mandizenze, savana kakhulu saza sonwaba.”b Okwesithathu, cingani ngendlela eniza kuncedakala ngayo kwixesha elizayo xa nibathobela ngoku abazali benu. UPaulo ohlala eBrazil uthi, “Ukuthobela abazali kundincede ndathobela uYehova nabantu abanegunya.” ILizwi LikaThixo likunika isizathu esibambekayo sokuthobela abazali. Lithi: “Ukuze zikuhambele kakuhle izinto uze uphile ixesha elide emhlabeni.”​—Efe. 6:2, 3.

8. Kutheni abantu abasebatsha abaninzi bebathobela abazali babo?

⁸ Abantu abaninzi abasebatsha baye babona ukuba izinto ziye zibahambele kakuhle xa bethobela. ULuiza, naye ongowaseBrazil, wayengaqondi ukuba kutheni abazali bakhe befuna kukhe kudlule ixesha ngaphambi kokuba abe nefowuni. Kaloku wayebona abantwana abaninzi abalingana naye benayo. Kodwa wabona ukuba abazali bakhe babefuna ukumkhusela. Ngoku uyazi ukuba xa ethobela abazali akamele acinge ukuba abafuni enze izinto azifunayo, kuba izinto abamcebisa zona zinokumkhusela. Nangoku kukhe kube nzima ukuthobela abazali komnye udade waseUnited States, uElizabeth. Uthi, “Xa ndingasiqondi isizathu sokuba abazali bandibekele umthetho, ndiye ndicinge ngexesha laxa imithetho ababendibekela yona yayindikhusela.” Yena uMonica waseArmenia uthi izinto bezisoloko zimhambela kakuhle xa ebathobela abazali bakhe kunaxa engabathobeli.

THOBELA “ABASEMAGUNYENI”

9. Abantu abaninzi bacinga ntoni ngokuthobela umthetho?

⁹ Abantu abaninzi bayaqonda ukuba siyamdinga urhulumente, nokuba simele siyithobele eminye imithetho esiyinikwa ‘ngabasemagunyeni.’ (Roma 13:1) Kodwa kwa-abo bantu basenokungayithobeli imithetho abangayifuniyo okanye abacinga ukuba iyabacinezela. Ngokomzekelo, cinga ngokubhatalwa kwerhafu. Kwelinye ilizwe laseYurophu abantu bacinga ukuba umele ungayibhatali irhafu xa ucinga ukuba iyakucinezela. Yiloo nto abantu belo lizwe bengazirhafeli ezinye izinto urhulumente afuna bazirhafele.

10. Kutheni sithobela nemithetho esingayithandiyo?

¹⁰ IBhayibhile ithi oorhulumente bacinezela abantu, balawulwa nguSathana futhi sebeza kutshatyalaliswa. (INdu. 110:5, 6; INtshu. 8:9; Luka 4:5, 6) Iphinda ithi “nabani na olwa namagunya, ulwa nendlela kaThixo yokwenza izinto.” Okwangoku uYehova usawavumele ukuba alawule ukuze kubekho ucwangco, futhi ulindele ukuba siwathobele. Ngoko simele ‘siwanike zonke izinto ezimele ziye kuwo,’ ezifana nembeko, irhafu nokuwathobela. (Roma 13:1-7) Sisenokucinga ukuba umthetho awuncedi, uyasicinezela okanye kunzima ukuwuthobela. Kodwa sithobela uYehova osixelela ukuba sithobele abasemagunyeni xa izinto abafuna sizenze zingaphikisani nemithetho yakhe.​—IZe. 5:29.

11-12. Ngokutsho kukaLuka 2:1-6 uYosefu noMariya benza ntoni ukuze bathobele umthetho? Kwenzeka ntoni? (Jonga nemifanekiso.)

¹¹ Sinokufunda kuYosefu noMariya ababekulungele ukuthobela abasemagunyeni naxa kwakunzima. (Funda uLuka 2:1-6.) Xa uMariya wayemalunga neenyanga eziyi-9 ekhulelwe, kwenzeka into eyafuna yena noYosefu babonise ukuba bayathobela na. UAgasto owayelawula kuBukhosi BaseRoma wakhupha umyalelo owawusithi abantu mababhalise. UYosefu noMariya bahamba iikhilomitha eziyi-150 kwindawo eyayineenduli besiya eBhetelehem. Lwalungazukuba lula olo hambo, ngokukodwa kuMariya. Kusenokwenzeka ukuba babenexhala lempilo yakhe nomntwana wabo ongekazalwa. Babeza kuthini ukuba wayenokubeleka besesendleleni? Kaloku wayekhulelwe umntwana owayeza kuba nguMesiya. Ngaba loo nto yayiza kubenza bangawuthobeli umthetho karhulumente?

¹² UYosefu noMariya zange bavumele zonke ezo zinto babenexhala lazo zibenze bangawuthobeli umthetho. Ngenxa yaloo nto uYehova wabasikelela. UMariya wafika kakuhle eBhetelehem, wazala umntwana osempilweni, kwatsho kwenzeka into ekwakuprofetwe ngayo eBhayibhileni.​—Mika 5:2.

13. Ukuthobela kwethu kunokubanceda njani abazalwana noodade?

¹³ Xa sithobela abasemagunyeni kuncedakala thina nabanye. Yenzeka njani loo nto? Kaloku asiye sohlwaywe njengabantu abangawuthobeliyo umthetho. (Roma 13:4) Xa sibathobela abasemagunyeni, baza kubona ukuba amaNgqina KaYehova ngabantu abalungileyo. Ngokomzekelo, kwiminyaka emininzi eyadlulayo eNigeria kwangena amajoni kwiHolo YoBukumkani iintlanganiso zisaqhuba, ekhangela abantu ababengafuni ukubhatala irhafu. Kodwa ijoni eliwaphetheyo lathi mawaphume, lisithi: “AmaNgqina KaYehova ahlala eyibhatala irhafu.” Qho xa uthobela umthetho, wenza abantu bakaYehova badume kakuhle. Loo nto inokubakhusela abazalwana noodade ngeny’ imini.​—Mat. 5:16.

14. Yintoni eyanceda omnye udade ‘wakulungela ukuthobela’ abasemagunyeni?

¹⁴ Ngamanye amaxesha sisenokungafuni ukubathobela abasemagunyeni. Omnye udade waseUnited States, uJoanna uthi: “Kwakunzima kakhulu ukubathobela kuba bakhe babaphatha kakubi abanye abantu basekhaya.” Kodwa uJoanna wazixelela ukuba uza kuyitshintsha le ndlela acinga ngayo. Waqala ngokuyeka ukufunda izinto ezikwiiwebhsayithi zokuncokola ezazimenza angabathandi abasemagunyeni. (IMize. 20:3) Okwesibini, wacela uYehova ukuba amncede athembe Yena kunokuba athembele kwinto yokutshintsha koorhulumente babantu. (INdu. 9:9, 10) Okwesithathu, wafunda amanqaku akwiincwadi zethu athetha ngokungathathi cala. (Yoh. 17:16) Ngoku uthi ukubathobela nokubahlonipha abasemagunyeni “kumenze waxola ngendlela engathethekiyo.”

THOBELA IMIYALELO ESUKA KWINTLANGANO KAYEHOVA

15. Kutheni kusenokuba nzima ukuthobela imiyalelo esuka kwintlangano kaYehova?

¹⁵ UYehova uthi ‘masibathobele abo bakhokelayo’ emabandleni. (Heb. 13:17) INkokheli yethu uYesu ayinasono, kodwa abazalwana abakhokelayo ebasebenzisayo banaso. Kusenokuba nzima ukubathobela ngokukodwa xa besicela ukuba senze into esingafuniyo ukuyenza. Kwakhe kwanzima nakumpostile uPetros ukuthobela. Xa ingelosi yamyalela ukuba atye inyama yezilwanyana, ekwakusithiwa azicocekanga kuMthetho owabhalwa nguMoses, wala kwada kwakathathu. (IZe. 10:9-16) Wayesalela ntoni? Wayengayiqondi into eyayithethwa yile ngelosi. Yayingafani tu nento awayeyiqhelile. Ukuba kwakunzima kuPetros ukuthobela ingelosi eyayingenasono, kunokuba nzima kangakanani ke kuthi ukuthobela abantu abanesono!

16. Ngoxa umpostile uPawulos wayesenokucinga ukuba into ekuthiwa makayenze ayikho ngqiqweni, wenza ntoni? (IZenzo 21:23, 24, 26)

¹⁶ Umpostile uPawulos ‘wayekulungele ukuthobela’ naxa kwakusithiwa makenze into ekusenokwenzeka ukuba wayecinga ukuba ayikho ngqiqweni. AmaKristu angamaYuda eva kusithiwa uPawulos ushumayeza abantu ukuba ‘bangawuthobeli umthetho kaMoses’ futhi akawuhloniphi. (IZe. 21:21) Abadala baseYerusalem bathi makaye etempileni namadoda amane aze azicoce ukuze abonise ukuba uyawuthobela uMthetho. Kodwa yena wayesazi ukuba amaKristu awasekho phantsi koMthetho nokuba akukho nto irongo ayenzileyo. Kodwa wakhawuleza wayenza into ekwakusithiwa makayenze. “Ngosuku olulandelayo uPawulos wahamba naloo madoda, bazicoca bonke.” (Funda iZenzo 21:23, 24, 26.) Ukuthobela kukaPawulos kwalenza lamanyana ibandla.​—Roma 14:19, 21.

17. Yintoni esinokuyifunda kuStephanie?

¹⁷ Kwakunzima kudade onguStephanie ukwamkela isigqibo esasenziwe ngabazalwana abakhokelayo abakwilizwe lakhe. Yena nomyeni wakhe babekuvuyela ukukhonza neqela elithetha olunye ulwimi. Kodwa iofisi yesebe yathi malipheliswe elo qela, baza bona babuyiselwa kwibandla elithetha ulwimi lwabo. UStephanie uthi, “Zange ndiyithande tu ke le nto. Ndandilibona lingasidingi nganto ibandla elithetha ulwimi lwethu.” Sekunjalo, wasamkela isigqibo seofisi yesebe. Uthi: “Ekuhambeni kwexesha ndabona ukuba isebe lenze isigqibo sobulumko. Kwibandla lethu baninzi abantu abangamaNgqina bodwa emakhayeni abo. Ngoko siye sangabazali babo saza sabakhuthaza. Ngoku ndifundela udade osand’ ukuvuselelwa, ndinalo nexesha elininzi lokufundisisa.” Uphinda athi, “andinasazela santo kuba ndenze konke ebendinokukwazi ukukwenza ukuze ndithobele.”

18. Kusinceda njani ukuthobela?

¹⁸ Sinokukufunda ukuthobela. UYesu zange afunde ukuthobela xa kwakumnandi, ‘wakufunda kwizinto ezibuhlungu ezamehlelayo.’ (Heb. 5:8) NjengoYesu, sidla ngokufunda ukuthobela xa kunzima. Ngokomzekelo, xa kwakuqala ikhorona saxelelwa ukuba masiyeke ukuya kwiiHolo ZoBukumkani nakwindlu ngendlu. Kusenokwenzeka ukuba kwakunzima ukuyithobela loo miyalelo. Kodwa ukuyithobela kwakukhusela, kwakwenza wamanyana nabazalwana noodade waza wavuyisa uYehova. Ngoku sonke sikulungele ukuthobela nayiphi imiyalelo esiza kuyifumana ngentlungu engathethekiyo. Kaloku kukuthobela loo miyalelo okuza kusisindisa.​—Yobhi 36:11.

19. Kutheni ufuna ukuthobela?

¹⁹ Sifundile ukuba sifumana izinto ezininzi ezintle xa sithobela. Kodwa eyona isenza simthobele uYehova kukuba siyamthanda futhi sifuna ukumvuyisa. (1 Yoh. 5:3) Soze sikwazi ukumbuyekeza uYehova ngazo zonke izinto asenzele zona. (INdu. 116:12) Kodwa sinokumthobela, sithobele nabantu abanegunya. Ukuba siyathobela sibonisa ukuba silumkile. Xa silumkile sivuyisa intliziyo kaYehova.​—IMize. 27:11.