Ngaba Unalo Ukholo?

Ukuba sifuna ukuvuyisa uYehova, simele sibe nokholo. Kodwa yona iBhayibhile ithi “ayingabo bonke abantu abanokholo.” (2 Tes. 3:2) Apha umpostile uPawulos wayethetha ‘ngabantu abenzakalisayo nabenza izinto ezimbi,’ ababemphethe kakubi. Kodwa le nto wayeyithetha isebenza nakwabanye abantu. Abanye abazihoyi izinto ezibonisa ngokucacileyo ukuba ukhona uMdali onguThixo. (Roma 1:20) Kanti abanye basenokuthi bayakholwa ukuba ikhona into okanye umntu onamandla awodlula lee awethu. Kodwa olo, ayilokholo lokwenene.

Kufuneka siqiniseke ukuba uYehova ukho, futhi uyabasikelela abantu abanokholo olomeleleyo. (Heb. 11:6) Ukholo luphawu lwesiqhamo somoya wakhe oyingcwele. Ukuze siwufumane, kufuneka sithandaze. (Luka 11:​9, 10, 13) Enye indlela ebalulekileyo esinokuwufumana ngayo kukufunda iLizwi eliphefumlelwe nguThixo. Emva koko sinokucinga ngento esiyifundileyo, size sizame ukuyenza. Xa sisenza loo nto, umoya kaYehova uza kusinceda siphile ngendlela ebonisa ukuba sinokholo lokwenene.