Funda Ukucinga NjengoYehova NoYesu

1-2. Simele simthande njani uYehova? UYesu wabonisa njani ukuba umthanda ngengqondo yakhe yonke uYehova?

“UMELE umthande uYehova uThixo wakho ngentliziyo yakho yonke nangomphefumlo wakho wonke nangamandla akho onke nangengqondo yakho yonke.” (Luka 10:27) UYesu wavuma ukuba lo ngowona myalelo ubalulekileyo kuMthetho owabhalwa nguMoses. Phawula ukuba uYehova simele simthande ngeentliziyo zethu. Le nto ithetha ukuba izinto esizinqwenelayo nendlela esiziva ngayo zimele zibonise ukuba siyamthanda uYehova. Simele simthande ngomphefumlo wethu wonke nangamandla ethu onke. Kodwa simele simthande nangengqondo yethu okanye indlela esicinga ngayo. Kakade ke, asinakukwazi ukuyiqonda yonke indlela uYehova acinga ngayo. Kodwa sinokuyiqonda bhetele xa sifunda ‘ukucinga njengoKristu,’ kuba indlela acinga ngayo ifana nqwa nekaTata wakhe.​—1 Kor. 2:16.

² UYesu wayemthanda ngengqondo yakhe yonke uYehova. Wayeyazi into uThixo awayefuna ayenze, ezimisele nokuyenza, ngoxa loo nto yayinokumenza aphathwe kakubi. Wayezimisele ukuvuyisa uTata wakhe, ngoko zange avumele nantoni na imphazamise.

3. Umpostile uPetros wafunda ntoni kuYesu? Wawakhuthaza ukuba enze ntoni amanye amaKristu? (1 Petros 4:1)

³ UPetros nabanye abapostile bafumana ithuba elihle lokuba kunye noYesu nokufunda indlela acinga ngayo. Kwileta yakhe yokuqala ephefumlelweyo wakhuthaza amaKristu ukuba azimisele ukucinga njengoKristu. (Funda u-1 Petros 4:1.) Ngolwimi eyayibhalwe ngalo iBhayibhile, igama awalisebenzisayo uPetros neliguqulelwe ngokuthi “zimiseleni,” lalisetyenziswa xa kuthethwa ngamajoni axhobele imfazwe. Ngoko ukucinga njengoYesu kuza kunceda amaKristu akuxhobele kakuhle ukulwa neminqweno engafanelekanga kunye neli hlabathi lilawulwa nguSathana.​—2 Kor. 10:​3-5; Efe. 6:12.

4. Eli nqaku linokusinceda njani siyenze into eyacetyiswa nguPetros?

⁴ Siza kuthetha ngendlela uYesu acinga ngayo, size sibone ukuba sinokumlinganisa njani. Siza kutsho sikwazi (1) ukucinga njengoYehova, ize loo nto isincede sicinge ngendlela efanayo, (2) sithobeke, futhi (3) siphile engqondweni ngokuthembela kuYehova ngomthandazo.

CINGA NJENGOYEHOVA

5. Kunini apho uPetros wayekhe akacinga njengoYehova?

⁵ Kwakukhe kwakho ixesha apho uPetros wayengacingi njengoYehova. UYesu waxelela abafundi bakhe ukuba umele aye eYerusalem, anikelwe kubefundisi balapho, angcungcuthekiswe aze abulawe. (Mat. 16:21) Kusenokwenzeka ukuba kwakunzima kuPetros ukuyamkela into yokuba uYehova uza kuvuma ukuba uYesu, olithemba lamaSirayeli noMesiya othenjisiweyo, abulawe. (Mat. 16:16) Ngoko uPetros wabizela uYesu ecaleni, wathi: “Zicingele Nkosi; soze zenzeke kuwe ezi zinto.” (Mat. 16:22) Ngenxa yokuba uPetros wayengacingi njengoYehova, zange avumelane noYesu kule nto.

6. UYesu wabonisa njani ukuba ucinga njengoYehova?

⁶ Indlela awayecinga ngayo uYesu yayifana nqwa nekaTata wakhe osezulwini. UYesu wathi kuPetros: “Yiya emva kwam, Sathana! Uyandiphazamisa, kuba awucingi njengoThixo, kodwa ucinga njengabantu.” (Mat. 16:23) Kusenokwenzeka ukuba uPetros wayecinga ukuba uyanceda, kodwa uYesu zange alithathe icebiso lakhe. Ikhona into esiyifundayo apha. UYesu wayesazi ukuba ukuze enze ukuthanda kukaThixo kwakuza kufuneka angazicingeli, kodwa eve ubunzima aze afe. Le nto yafundisa uPetros isifundo esibalulekileyo sokuba umele acinge njengoThixo.

7. Yintoni awayenzayo uPetros eyabonisa ukuba ucinga njengoYehova? (Jonga umfanekiso )

⁷ Ekuhambeni kwexesha, uPetros wabonisa ukuba ufuna ukucinga njengoYehova. Lalifikile ixesha lokuba nabantu abangengomaYuda babe ngabantu bakaThixo. UThixo wathuma uPetros ukuba ayokushumayela kuKorneli, owaba ngumntu wokuqala kubantu abangengomaYuda ukuba ngumKristu. AmaYuda ayengafuni nto iwadibanisa nabantu abangengawo, ngoko ayisothusi into yokuba kufuneke uPetros ancedwe ukuze akwazi ukuwenza lo msebenzi. Wathi akuyiqonda into ecingwa nguThixo ngabantu abangengomaYuda, wayitshintsha indlela acinga ngayo. Ngoko xa uKorneli wathi uPetros makayokumbona, ‘zange ale.’ (IZe. 10:​28, 29) Washumayela kuKorneli nabantu bendlu yakhe, emva koko babhaptizwa.​—IZe. 10:​21-23, 34, 35, 44-48.

8. Yintoni esinokuyenza ebonisa ukuba sicinga njengoYehova? (1 Petros 3:8)

⁸ Kwiminyaka eyalandelayo, uPetros wakhuthaza amaKristu ukuba “acinge ngendlela efanayo.” (Funda u-1 Petros 3:8.) Ekubeni singabantu bakaYehova, sinokucinga ngendlela efanayo ukuba sizama ukucinga ngendlela acinga ngayo uYehova, nechazwe kwiLizwi lakhe. Ngokomzekelo, uYesu wathi kubalandeli bakhe uBukumkani BukaThixo mabube yeyona nto ibalulekileyo ebomini babo. (Mat. 6:33) Ecinga ngaloo nto, omnye umvakalisi ebandleni usenokugqiba ekubeni abe kwinkonzo yexesha elizeleyo. Endaweni yokuba simcebise ukuba makazicingele, simele sithethe kakuhle ngale nto afuna ukuyenza size simncede.

THOBEKA

9-10. UYesu wabonisa njani ukuba uthobeke kakhulu?

⁹ Kubusuku bokugqibela ngaphambi kokuba afe, uYesu wafundisa uPetros nabanye abapostile isifundo esibalulekileyo ngokuthobeka. Ngaphambi koko, wayethume uPetros noYohane ukuba bayokulungiselela isidlo sokugqibela awayeza kusitya nabo ngaphambi kokuba afe. Kusenokwenzeka ukuba ezinye zezinto ekwakufuneka baqiniseke ukuba zikhona yikom netawuli, ukuze kuhlanjwe iinyawo zeendwendwe ngaphambi kokuba zitye. Kodwa ngubani owayeza kuthobeka, ahlambe iinyawo zabanye?

¹⁰ UYesu zange alibazise ukuwenza lo msebenzi kuba wayethobeke kakhulu. Bothuka nyhani abapostile xa bembona esenza umsebenzi owawuqhele ukwenziwa sisicaka. Wakhulula izambatho zakhe zangaphezulu, wabhinqa itawuli, wagalela amanzi ekomini, waza waqalisa ukuhlamba iinyawo zabo. (Yoh. 13:​4, 5) Inoba kwamthatha ixesha uYesu ukuhlamba iinyawo zabo boyi-12 abapostile, nezikaYudas owayeza kumjikela. Kodwa kuba wayethobekile, wawenza wawugqiba loo msebenzi. Emva koko, ezolile wathi: “Niyayiqonda na le nto ndigqiba kuyenza? Nithi ‘Mfundisi’ okanye ‘Nkosi’ xa nindibiza, ibe ninyanisile, kuba kunjalo. Ngoko ke, ukuba mna ndihlambe iinyawo zenu, ndakugqiba ukuba yiNkosi noMfundisi, nani nimele nihlambane iinyawo.”​—Yoh. 13:​12-14.

11. UPetros wabonisa njani ukuba wayekufundile ukuthobeka? (1 Petros 5:5) (Jonga nomfanekiso.)

¹¹ UPetros wafunda kwindlela uYesu awayethobeke ngayo. Emva kokuba uYesu ebuyele ezulwini, uPetros wenza ummangaliso ngokuphilisa indoda eyazalwa iqhwalela. (IZe. 1:​8, 9; 3:​2, 6-8) Abantu abaninzi abayibonayo loo nto babaleka baya kuPetros. (IZe. 3:11) Ngaba uPetros wayeza kufuna kuzukiswe yena, ekubeni wakhulela kwindawo apho abantu babethanda udumo nezikhundla? Hayi, wathobeka waza akafuna kuzukiswe yena, kodwa kuzukiswe uYehova noYesu, esithi: “Ngenxa yegama [likaYesu], nangenxa yokuba sinokholo kwigama lakhe, lo mntu nimbonayo nenimaziyo uye waphiliswa.” (IZe. 3:​12-16) Ekuhambeni kwexesha, wabhalela amaKristu esithi kufuneka athobeke. Ngolwimi eyayibhalwe ngalo iBhayibhile nakumbhalo osemazantsi, amazwi awawasebenzisayo enza umntu acinge ukuba ukuthobeka kwambathwa njengempahla. Le nto isikhumbuza indlela uYesu awayibhinqa ngayo itawuli, waza wahlamba iinyawo zabapostile bakhe.​—Funda u-1 Petros 5:5.

12. Yintoni esinokuyenza ukuze siqhubeke sifunda ukuthobeka njengoPetros?

¹² NjengoPetros, nathi sinokufunda ukuthobeka. Khumbula ukuba ayiyonto ephuma emlonyeni kuphela eyenza kubonakale ukuba sithobekile. Kaloku igama elasetyenziswa nguPetros neliguqulelwe ngokuthi ‘ukuthobeka,’ likwathetha “ukuthobeka kwengqondo.” Loo nto ibonisa ukuba nezinto esizicingayo zimele zibonise ukuba sithobekile. Izinto esizenzela abantu asizenzi kuba sifuna ukunconywa, sizenza kuba sibathanda, sithanda noYehova. Xa sivuyiswa yiyo nayiphi na indlela esimsebenzela ngayo uYehova nabazalwana noodade, nokuba iyabonwa okanye ayibonwa, sibonisa ukuba sithobekile.​—Mat. 6:​1-4.

YIBA ‘NGOPHILILEYO ENGQONDWENI’

13. Unjani umntu ‘ophilileyo engqondweni’?

¹³ Unjani umntu ‘ophilileyo engqondweni’? (1 Pet. 4:7) UmKristu ophilileyo engqondweni uzama ngamandla akhe onke ukwenza izigqibo ezibonisa ukuba ucinga njengoYehova. Uyazi ukuba akukho nto ibaluleke ngaphezu kokuba ngumhlobo kaYehova. Uyaqonda ukuba zikhona izinto angazaziyo. Ubonisa nokuba uthembele ngoThixo, ngokusoloko emcela ukuba amkhokele.a

14. Kunini apho uPetros wayekhe akathembela ngoYehova?

¹⁴ Ngobusuku bangaphambi kokuba afe, uYesu walumkisa abafundi bakhe wathi: “Kobu busuku banamhlanje, nonke niza kundishiya.” Ezithembile, uPetros wathi: “Nokuba bangakushiya bonke, soze mna ndikushiye!” Kwangobo busuku, uYesu wacebisa abanye abafundi bakhe, esithi: “Hlalani nithe qwa, ningayeki ukuthandaza.” (Mat. 26:​31, 33, 41) Ukuba uPetros wayeyenzile loo nto, wayengazukoyika ukuvuma ukuba ungumfundi kaYesu. Kodwa wayiphika iNkosi yakhe, emva koko wazisola kakhulu.​—Mat. 26:​69-75.

15. Ngobusuku obungaphambi kokufa kwakhe, yintoni awayenzayo uYesu ukuze ahlale ephilile engqondweni?

¹⁵ UYesu wayethembele kuYehova ngentliziyo yakhe yonke. Ngoxa wayengenasono, wayesoloko ethandaza. Loo nto yamnceda wanesibindi sokwenza into uYehova awayefuna ayenze. (Mat. 26:​39, 42, 44; Yoh. 18:​4, 5) Inoba uPetros zange ayilibale indlela uYesu awathandaza kaninzi ngayo ngobusuku bokugqibela ngaphambi kokuba afe.

16. UPetros wabonisa njani ukuba uphilile engqondweni? (1 Petros 4:7)

¹⁶ Ekuhambeni kwexesha, uPetros wafunda ukuthembela kuYehova ngomthandazo. UYesu ovusiweyo waqinisekisa uPetros nabanye abapostile ukuba babeza kufumana umoya oyingcwele, owawuza kubanceda bawenze kakuhle umsebenzi wokushumayela. Kodwa wathi mabalinde eYerusalem de yenzeke loo nto. (Luka 24:49; IZe. 1:​4, 5) Yintoni awayenzayo uPetros ngoxa wayesalindile? Yena namanye amaKristu “baqhubeka bethandaza.” (IZe. 1:​13, 14) Kwileta yakhe yokuqala, wakhuthaza amanye amaKristu ukuba aphile engqondweni, futhi athembele kuYehova ngomthandazo. (Funda u-1 Petros 4:7.) UPetros wafunda ukuthembela ngoYehova waza waba yintsika yebandla.​—Gal. 2:9.

17. Nokuba zikhona izinto esikwaziyo ukuzenzela zona, yintoni ekufuneka siqhubeke siyenza? (Jonga nomfanekiso.)

¹⁷ Ukuze siphile engqondweni, kufuneka sihlale sithandaza kuYehova. Siyaqonda ukuba simele sihlale sithandaza kuye enoba siyakwazi ukuzenzela ezinye izinto. Ngoko simcela asikhokele, ngokukodwa xa siza kwenza izigqibo ezibalulekileyo, kuba siyamthemba ukuba uyayazi eyona nto isifaneleyo.

18. Yintoni esinokuyenza ukuze sicinge njengoYehova?

¹⁸ Simbulela nyhani uYehova kuba esidale sakwazi ukuba neempawu ezifana nezakhe. (Gen. 1:26) Ewe kona, asinakukwazi ukumlinganisa ngokupheleleyo. (Isa. 55:9) Kodwa njengoPetros sinokufunda ukucinga njengoYehova. Loo nto sinokuyenza ngokungayeki ukucinga njengaye, sithobeke size siphile engqondweni.