Linganisa Iingelosi Ezithembekileyo

1-2. (a) Ziintoni esahluke ngazo kwiingelosi? (b) Ziintoni esifana ngazo neengelosi?

XA UYEHOVA wakutsalela enyanisweni, wakuzisa kwintsapho enabakhonzi bakhe abangafaniyo nabathandanayo. Kule ntsapho kukho neemiliyon zeengelosi ezithembekileyo. (Dan. 7:​9, 10) Xa sicinga ngeengelosi, sisenokucinga ngendlela ezahluke ngayo kuthi. Ngokomzekelo, sadalwa sekukudala zikhona. (Yobhi 38:​4, 7) Zinamandla kakhulu kunathi. Zingcwele futhi zingamalungisa ngendlela esingenakukwazi ngayo thina bantu banesono.​—Luka 9:26.

² Ngoxa zikhona izinto esahluke ngazo kwiingelosi, zininzi esifana ngazo. Ngokomzekelo, njengazo siyakwazi ukuba neempawu ezintle anazo uYehova. Sinayo nenkululeko yokuzikhethela ezinayo nazo. Njengeengelosi, nathi sinamagama angafaniyo, ubuntu obahlukahlukeneyo, nemisebenzi esiyinikwe nguYehova ayifani. Nathi siyakudinga ukukhonza uMdali wethu njengazo.​—1 Pet. 1:12.

3. Ziintoni esinokuzifunda kwiingelosi ezithembekileyo?

³ Ekubeni zininzi izinto esifana ngazo neengelosi, sinokukhuthazeka, futhi zininzi nezinto ezibalulekileyo esinokuzifunda kuzo. Kweli nqaku siza kufunda ngendlela ezithobeke ngayo ezi ngelosi zithembekileyo, ngendlela ezibathanda ngayo abantu, ezinyamezela ngayo, nendlela ezisebenza ngayo ukuze ibandla lihlale licocekile, nokuba thina singazilinganisa njani kwezi zinto.

IINGELOSI ZITHOBEKILE

4. (a) Yintoni eyenziwa ziingelosi ebonisa ukuba zithobekile? (b) Kutheni iingelosi zithobekile? (INdumiso 89:7)

⁴ Iingelosi ezithembekileyo zithobekile. Ngoxa zininzi izinto ezizaziyo, zinamandla kakhulu futhi zilumkile, ziyithobela yonke imiyalelo kaYehova. (INdu. 103:20) Xa zisenza imisebenzi yazo, aziqhayisi ngezinto ezizenzayo okanye zifune ukubonwa ukuba zona zinamandla. Ziyakuvuyela ukwenza imisebenzi eziyithunywa nguThixo nokuba asizukuwazi amagama azo.a (Gen. 32:​24, 29; 2 Kum. 19:35) Azifuni kuzukiswa, kodwa zifuna kuzukiswe uYehova. Kutheni zithobeke kangaka? Kungenxa yokuba ziyamthanda uYehova futhi zimhlonipha kakhulu.​—Funda iNdumiso 89:7.

5. Ingelosi eyayilungisa umpostile uYohane yabonisa njani ukuba ithobekile? (Jonga nomfanekiso.)

⁵ Nantsi enye into eyakhe yenzeka eyabonisa ukuba iingelosi zithobekile. Malunga no-96 C.E., ingelosi engabizwa ngegama yabonisa umpostile uYohane umbono omangalisayo. (ISityhi. 1:1) Yintoni awayenzayo uYohane xa ebona loo mbono? Wazama ukuyikhonza. Kodwa loo ngelosi inyanisekileyo yakhawuleza yamnqanda isithi: “Lumka! Ungayenzi loo nto! Ndilikhoboka njengawe nabazalwana bakho . . . Khonza uThixo!” (ISityhi. 19:10) Yayithobeke nyhani. Yayingenamdla wokuzukiswa okanye wokunconywa. Yakhawuleza yaxelela uYohane ukuba makakhonze uYehova uThixo. Kodwa zange imjongele phantsi uYohane. Ngoxa yayinexesha elide ikhonza uYehova futhi inamandla kunaye, yathobeka, yathi ilikhoboka njengaye. Nangona le ngelosi kwafuneka imlungise uYohane, zange ithethe kakubi naye. Yathetha naye ngobubele. Mhlawumbi yayimbona ukuba wothukile.

6. Sinokuyilinganisa njani indlela ezithobeke ngayo iingelosi?

⁶ Sinokuyilinganisa njani indlela ezithobeke ngayo iingelosi? Nathi asifuni ukuqhayisa okanye ukuzukiswa ngemisebenzi esiyenzela uYehova. (1 Kor. 4:7) Enye into, asifanele sicinge ukuba sibhetele kunabanye ngenxa yokuba sinexesha elide sikhonza uYehova kunabo, okanye simenzela imisebenzi abangayenziyo bona. Phofu, xa isiya isiba mininzi imisebenzi esiyenzela uYehova, kufuneka siye sizijonga njengabancinci kunabanye. (Luka 9:48) Njengeengelosi, sifuna ukusebenzela abanye, asifuni bacinge ukuba sibalulekile kunabo.

7. Sinokubonisa njani ukuba sithobekile xa kufuneka silungise umntu?

⁷ Sinokubonisa ukuba sithobekile naxa kufuneka silungise umntu esikhonza naye okanye umntwana. Xa simlungisa kusenokufuneka singqale. Njengengelosi eyaba nobubele xa yayilungisa uYohane, sinokungqala xa silungisa umntu kodwa singamshiyi ekhathazekile. Ukuba asicingi ukuba sibhetele kunabanye abantu, siza kukwazi ukulungisa umntu ngendlela ebonisa ukuba siyamhlonipha futhi siyamthanda, sisebenzisa iZibhalo.​—Kol. 4:6.

IINGELOSI ZIYABATHANDA ABANTU

8. (a) Ngokutsho kukaLuka 15:​10, iingelosi zibonisa njani ukuba ziyabathanda abantu? (b) Iingelosi zisinceda njani kumsebenzi wokushumayela? (Jonga ongaphandle.)

⁸ Iingelosi azizibhekelisi ebantwini, ziyabathanda. Ziyavuya xa imvu ebilahlekile ibuyela kuYehova okanye xa umntu etshintsha iindlela zakhe aze akhonze uYehova. (Funda uLuka 15:10.) Ziyasincedisa nakumsebenzi wokushumayela ngoBukumkani. (ISityhi. 14:6) Ngoxa zingayi ngqo ebantwini, zisenokukhokelela umvakalisi kumntu ofuna ukufunda ngoYehova. Ewe kona, asinakuqiniseka ukuba ziingelosi eziye zasikhokelela kumntu onomdla. UYehova unokusebenzisa nezinye iindlela, njengomoya wakhe oyingcwele, ukuze ancede abantu abafuna ukumazi, okanye akhokelele abakhonzi bakhe kubo. (IZe. 16:​6, 7) Sekunjalo, uzisebenzisa kakhulu zona iingelosi. Ngoko xa sishumayela sinokuqiniseka ukuba iingelosi zikunye nathi ukuze zisincede.​—Jonga ibhokisi ethi “Yaphendulwa Imithandazo Yabo.”b

9. Sinokuyilinganisa njani indlela ezibathanda ngayo abantu iingelosi?

⁹ Singayilinganisa njani indlela ezibathanda ngayo abantu iingelosi? Xa kusenziwa isaziso sokuba umzalwana okanye udade ubuyiselwe, sinokuvuya njengazo. Sinokumenza aqiniseke ukuba siyamthanda, nokuba sivuyiswa kukuba ebuyele kuYehova. (Luka 15:​4-7; 2 Kor. 2:​6-8) Singazilinganisa iingelosi nangokukhuthala kumsebenzi wokushumayela. (INtshu. 11:6) Njengoko zisinceda kumsebenzi wokushumayela, nathi sinokukhangela iindlela zokunceda abazalwana noodade entsimini. Ngokomzekelo, sisenokulungiselela ukusebenza nomntu osand’ ukuba ngumvakalisi. Okanye sinokunceda abazalwana noodade abakhulileyo nabagulayo bakwazi ukushumayela nathi.

10. Sifunda ntoni kuSara?

¹⁰ Siza kuthini ukuba iimeko azisivumeli ukuba simkhonze ngendlela ebesifuna ngayo uYehova? Sinokukhangela ezinye iindlela zokuba kunye neengelosi kumsebenzi wokushumayela. Khawuve into eyenzeka komnye udade waseIndia, uSara.c Emva kweminyaka emalunga neyi-20 enguvulindlela, wagula kwaza kwafuneka ahlale esebhedini. Waba buhlungu kakhulu, kodwa waphinda wonwaba ngenxa yokuncedwa ngabazalwana noodade, nokufunda iBhayibhile qho. Ewe kona, kwafuneka azame ukushumayela ngezinye iindlela. Ekubeni wayengakwazi ukuhlala ukuze abhale iileta, wayeshumayela ngefowuni kuphela. Ngoko wayefowunela amabuyelo akhe, aze wona amxelele nangabanye abasenokuba nomdla wokufunda iBhayibhile. Kwenzeka ntoni? Kwiinyanga nje ezimbalwa, uSara waba nezifundo zeBhayibhile eziyi-70, awayengenakukwazi ukuziqhuba yedwa, ngoko ezinye wazinika abavakalisi abasebandleni. Abaninzi kwezo zifundo bayaya kwiintlanganiso. Inoba kuzivuyisa nyhani iingelosi ukusebenza nabazalwana noodade abafana noSara, abenza konke okusemandleni ukuze bashumayele.

IINGELOSI ZIYAKWAZI UKUNYAMEZELA

11. Iingelosi ezithembekileyo zibonise njani ukuba zikwazi nyhani ukunyamezela?

¹¹ Ininzi into esinokuyifunda kwiingelosi ezithembekileyo ngokunyamezela. Ngamawaka eminyaka zinyamezele izinto ezimbi nokungabikho kobulungisa. Zabona uSathana nezinye iingelosi ezininzi ezazikhonza kunye nazo zijikela uYehova. (Gen. 3:1; 6:​1, 2; Yude 6) IBhayibhile isixelela ngenye ingelosi ethembekileyo eyalwa nedemon enamandla. (Dan. 10:13) Ukususela ngexesha lika-Adam noEva, iingelosi ziye zabona iqela elincinci kakhulu labantu likhetha ukukhonza uYehova. Sekunjalo, ezi ngelosi zithembekileyo khange ziyeke ukukhuthala nokukhonza uYehova zivuya. Ziyazi ukuba ngexesha alibekileyo, uza kukuphelisa konke ukungabikho kobulungisa.

12. Yintoni enokusinceda sikwazi ukunyamezela?

¹² Sinokuyilinganisa njani indlela ezinyamezela ngayo iingelosi? Njengazo, sinokubona ukungabikho kobulungisa okanye singafunwa ngabantu. Kodwa siqiniseke njengazo ukuba ngexesha lakhe, uThixo uza kuziphelisa zonke izinto ezimbi. Nathi sifana nazo, ‘asiyeki ukwenza izinto ezilungileyo.’ (Gal. 6:9) UThixo uthembisa ukuba uza kusinceda sikwazi ukunyamezela. (1 Kor. 10:13) Sinokumcela asiphe umoya wakhe oza kusenza sibe nomonde size sivuye. (Gal. 5:22; Kol. 1:11) Yintoni onokuyenza xa ungafunwa kuba ukhonza uYehova? Sukoyika, mthembe ngentliziyo yakho yonke. UYehova uza kuhlala ekunceda aze akomeleze.​—Heb. 13:6.

IINGELOSI ZINCEDA IBANDLA LIHLALE LICOCEKILE

13. Ngowuphi umsebenzi okhethekileyo eziwunikiweyo iingelosi kule mihla yokugqibela? (Mateyu 13:​47-49)

¹³ Kule mihla yokugqibela, uYehova unike iingelosi umsebenzi okhethekileyo. (Funda uMateyu 13:​47-49.) Iimiliyon zabantu abasehlabathini lonke zinomdla kwiindaba ezilungileyo. Abanye batshintsha indlela abaphila ngayo ukuze babe ngamaKristu okwenene, kodwa abanye abayenzi loo nto. Iingelosi zithunywe ukuba “zahlule abenzi-bubi kumalungisa.” Le nto ithetha ukuba zithunywe ukuba zincede ibandla lihlale licocekile. Ayithethi ukuba abantu abayekileyo ukuba ngamaNgqina soze baphinde babe ngawo; ingathethi nokuthi soze kubekho zingxaki ebandleni. Kodwa sinokuqiniseka ukuba iingelosi zisebenza nzima ukuze zincede amabandla ahlale ecocekile.

14-15. Sinokuyilinganisa njani indlela iingelosi ezikuxhalabele ngayo ukucoceka kwebandla? (Jonga nemifanekiso.)

¹⁴ Sinokuyilinganisa njani indlela iingelosi ezikuxhalabele ngayo ukucoceka kwebandla? Ngokwenza konke esinokukwazi ukukwenza ukuze sigcine ibandla licocekile. Yiloo nto sikhusela iintliziyo zethu ngokukhetha ukuba nabahlobo abalungileyo, nangokungavumeli nantoni na yonakalise ubuhlobo bethu noYehova. (INdu. 101:3) Sinokunceda namanye amaKristu ahlale ethembekile kuYehova. Ngokomzekelo, yintoni esimele siyenze xa sisazi ukuba omnye umKristu wenze isono esinzulu? Kuba simthanda, sinokumcela ukuba aye kuxelela abadala. Kodwa ukuba akade abaxelele, sinokubaxelela ngokwethu. Sifuna nawuphi na umKristu ophelelwa lukholo akhawuleze ancedakale.​—Yak. 5:​14, 15.

¹⁵ Okubuhlungu kukuba abanye abenze izono ezinzulu kuye kufuneke basuswe ebandleni. Siye ‘siyeke ukuhlobana’ nabo.d (1 Kor. 5:​9-13) Loo nto inceda ibandla lihlale licocekile. Enye into, xa siyeka ukuzidibanisa nabantu abasusiweyo ebandleni, sibenzela ububele. Kaloku loo nto inokubanceda babuyele kuYehova. Xa bebuyele kuye, kuvuya thina, uYehova neengelosi.​—Luka 15:7.

16. Uzimisele ukuzilinganisa njani iingelosi?

¹⁶ Simbulela kakhulu uYehova ngokusivumela sifunde ngeengelosi futhi sisebenze nazo. Masilinganise ezi mpawu zazo zintle: Ukuthobeka, ukuthanda abantu, ukunyamezela nokuxhalabela ukucoceka kwebandla. Ukuba siyazilinganisa ezi ngelosi zikaYehova zithembekileyo, nathi sinokuba kwintsapho kaYehova ngonaphakade.