Thobeka Xa Kukho Izinto Ongazaziyo

1. UYehova usidale njani? Kutheni?

UYEHOVA usidale sakwazi ukucinga, ukufunda izinto ezintsha nokuyazi indlela emasizisebenzise ngayo izinto esizifundayo. Kwakutheni ukuze asidale ngolu hlobo? Ufuna ‘simazi uThixo’ futhi simkhonze sisebenzisa ingqondo.​—IMize. 2:​1-5; Roma 12:1.

2. (a) Ngoxa sikwazi ukufunda, yintoni ekufuneka siyiqonde? (Yobhi 37:​23, 24) (Jonga nomfanekiso.) (b) Kusinceda njani ukuthobeka, sivume ukuba kukho izinto esingazaziyo?

² Ngoxa sikwazi ukufunda, zininzi izinto esingazaziyo. (Funda uYobhi 37:​23, 24.) Cinga ngoYobhi. UYehova wambuza imibuzo eyamenza waqonda ukuba zazininzi izinto awayengazazi. Loo nto yamenza wathobeka, yaza yamnceda walungisa indlela awayecinga ngayo. (Yobhi 42:​3-6) Nathi kuyasinceda ukuthobeka, siqonde ukuba asazi yonke into. Xa sithobekile siza kumthemba uYehova ukuba uza kusixelela izinto ekufuneka nyhani sizazi, ukuze sikwazi ukwenza izigqibo ezifanelekileyo.​—IMize. 2:6.

3. Siza kuthetha ngantoni kweli nqaku?

³ Kweli nqaku siza kuthetha ngezinye izinto esingazaziyo, nangeengxaki ezinokwenziwa kukuba singazazi ezo zinto. Siza kubona nokuba kutheni kusinceda ukungazazi ezinye izinto. Ukuthetha ngezi zinto kuza kusenza siqiniseke kakhulu ukuba uYehova, ‘Lowo unolwazi olugqibeleleyo,’ uyasixelela izinto ekufuneka nyhani sizazi.​—Yobhi 37:16.

ASAZI UKUBA ISIPHELO SIZA KUFIKA NINI

4. Ngokutsho kukaMateyu 24:36 yintoni esingayaziyo?

⁴ Funda uMateyu 24:36. Asazi ukuba siza kufika nini isiphelo seli hlabathi. Naxa uYesu wayelapha emhlabeni wayengayazi “loo mini naloo yure.”a Ekuhambeni kwexesha waxelela abapostile bakhe ukuba oyena Mntu uligcinayo ixesha, uYehova, “ngegunya lakhe” ubeka amaxesha ezimele zenzeke ngawo ezinye izinto. (IZe. 1:​6, 7) UYehova sele elibekile ixesha aza kulitshabalalisa ngalo eli hlabathi, kodwa thina asinakulazi ukuba linini kanye kanye elo xesha.

5. Ukungazi ukuba isiphelo siza kufika nini kunokusenza sizive njani?

⁵ Ngenxa yento eyathethwa nguYesu, asazi ukuba siza kulinda ixesha elide kangakanani ngaphambi kokuba kufike isiphelo. Loo nto inokusenza siphelelwe ngumonde okanye sityhafe, ngokukodwa xa sele sinexesha silinde imini kaYehova. Okanye kusenokuba nzima ukunyamezela xa abantu esizalana nabo okanye abanye abantu behlekisa ngathi. (2 Pet. 3:​3, 4) Sisenokucinga ukuba, ukuba besilwazi usuku esiza kufika ngalo isiphelo, besiza kuba nomonde kakhulu, kube lula nokunyamezela xa kuhlekiswa ngathi.

6. Kutheni ifanelekile into yokuba singazi ukuba isiphelo siza kufika nini?

⁶ Ngokungasixeleli usuku esiza kufika ngalo isiphelo, uYehova usinika ithuba lokumbonisa ukuba simkhonza kuba simthanda futhi sithembele ngaye. Asikhonzi uYehova sicinga ngosuku, ngokungathi ukholo lwethu luza kuhamba luhambe luphele, kodwa sifuna ukumkhonza ngonaphakade. Kunokuba sisoloko sicinga ngokuba iza kufika nini ‘imini kaYehova,’ senza kakuhle xa sisoloko sicinga ngezinto ezintle eziza kwenzeka ngaloo mini. Xa sisenza loo nto, siyaqhubeka sizinikela kakhulu kuThixo, size senze konke okusemandleni ethu ukuze simvuyise.​—2 Pet. 3:​11, 12.

7. Yintoni esiyaziyo?

⁷ Senza kakuhle xa sicinga ngento esiyaziyo yokuba imihla yesiphelo yaqala ngo-1914. EBhayibhileni uYehova usixelele iziprofeto ezibonisa ukuba isiphelo sasiza kufika ngaloo nyaka, nangezinto ezaziza kwenzeka ukususela ngoko. Loo nto isenza siqiniseke ukuba “imini enkulu kaYehova isondele.” (Zef. 1:14) Siyawazi nomsebenzi uYehova afuna siwenze, owokuxelela abantu abaninzi kangangoko kunokwenzeka ‘ngeendaba zilungileyo ezingoBukumkani.’ (Mat. 24:14) Ezi ndaba zishunyayelwa kumazwe amalunga ne-240, ngeelwimi ezingaphezu kwe-1 000. Akufuneki side sazi ‘imini neyure’ ukuze sikhuthale kulo msebenzi ubalulekileyo.

ASAZI UKUBA YINTONI ASENOKUYENZA UYEHOVA

8. Athetha ukuthini amazwi athi ‘umsebenzi kaThixo wokwenene’? (INtshumayeli 11:5)

⁸ Asisoloko siwazi ‘umsebenzi kaThixo wokwenene.’ (Funda iNtshumayeli 11:5.) La mazwi athetha ngento uYehova abangela yenzeke okanye ngento avumela ukuba yenzeke ukuze kwenzeke ukuthanda kwakhe. Asinakuqiniseka ngesizathu sokuba uYehova avumele into ethile yenzeke, okanye siyazi eyona ndlela aza kusinceda ngayo. (INdu. 37:5) Ukufuna ukwazi loo nto bekuya kufana nokufuna ukuqonda ukuba lukhula njani usana esibelekweni sikamama walo, nto leyo engaqondwa kakuhle nangoososayensi.

9. Ngenxa yokuba singayazi indlela uYehova anokusinceda ngayo, sinokuba neziphi iingxaki?

⁹ Ukungayazi indlela uYehova aza kusinceda ngayo kunokusenza sithandabuze ukwenza ezinye izigqibo. Sisenokuthandabuza ukuncama ezinye izinto esinazo ukuze simsebenzele ngaphezu kokuba sisenza uYehova, siphile ngezinto ezimbalwa okanye siye kuhlala kwindawo edinga abavakalisi boBukumkani. Okanye sinokuzibuza ukuba uyavuya na uYehova xa singade sikwazi ukuyenza into ebesizimisele ukumenzela yona, xa singade sifumane izifundo ngoxa sikhuthele entsimini, okanye sineengxaki kumsebenzi esiwenzayo wentlangano.

10. Xa singayazi indlela uYehova aza kuzenza ngayo izinto, siza kutsho sibe noluphi uphawu?

¹⁰ Xa singayazi into uYehova aza kuyenza siza kutsho sibe nophawu olubalulekileyo, ukuthobeka. Siza kubona ukuba indlela uYehova acinga ngayo nazenza ngayo izinto iyodlula lee eyethu. (Isa. 55:​8, 9) Sifunda nokumthemba ngokupheleleyo uYehova, siqinisekile ukuba nguye oza kusenza siphumelele. Xa sifumana izifundo eziqhuba kakuhle entsimini okanye siwenza kakuhle umsebenzi wentlangano, sizukisa uYehova. (INdu. 127:1; 1 Kor. 3:7) Xa izinto zingahambi ngendlela ebesiyilindele, masingalibali ukuba uYehova ubona yonke into. (Isa. 26:12) Senza yonke into esinokukwazi ukuyenza, sinethemba lokuba uYehova uza kuhlala esinceda. Siqinisekile ukuba uYehova uza kusibonisa indlela esimele sizenze ngayo izinto, nokuba loo nto akazukuyenza ngendlela engummangaliso, njengokuba wayedla ngokwenza njalo kudala.​—IZe. 16:​6-10.

11. Ziintoni esizaziyo nezinokusinceda?

¹¹ Siyazi ukuba uYehova usoloko esithanda, unobulungisa futhi ulumkile. Siyazi nokuba uzixabise kakhulu izinto esimenzela zona nesizenzela abazalwana noodade. Enye into esiyaziyo kukuba uYehova usoloko ebasikelela abantu abathembekileyo kuye.​—Heb. 11:6.

ASIYAZI INTO EZA KWENZEKA NGOMSO

12. UYakobi 4:​13, 14 uthi yintoni esingaqinisekanga ngayo?

¹² Funda uYakobi 4:​13, 14. Inyaniso kukuba asazi ukuba kuza kwenzeka ntoni kuthi ngomso. Kweli hlabathi sehlelwa “lixesha naziziganeko ezingalindelekanga.” (INtshu. 9:11) Ngenxa yaloo nto asinakwazi nokuba ziza kwenzeka na izinto ebesifuna ukuzenza, okanye siza kusweleka singadanga sazenza.

13. Sinokuziva njani xa singayazi into eza kwenzeka kwixesha elizayo?

¹³ Kusenokuba nzima ukunyamezela xa singayazi into eza kwenzeka kuthi kwixesha elizayo. Sithetha ukuthini? Sisenokuba nexhala xa sicinga ngento esenokwenzeka, ize loo nto isenze siyeke ukuvuya. Xa kusenzeka izinto ezimbi singalindelanga, sisenokuba buhlungu kakhulu, singazi nokuba masithini. Naxa izinto esizilindeleyo zingenzeki, sisenokuphoxeka size sityhafe.​—IMize. 13:12.

14. Ukuze sonwabe nyhani yintoni ekufuneka siyenze? (Jonga nemifanekiso.)

¹⁴ Xa sinyamezela ubunzima siyakwazi ukubonisa ukuba, nokuba kwenzeka ntoni, sikhonza uTata wethu osezulwini kuba simthanda, asimkhonzi kuba sifuna kulungelwe thina. Amabali aseBhayibhileni abonisa ukuba asifanele silindele ukuba uYehova uza kusikhusela kuzo zonke iingxaki esidibana nazo, nokuba akagqibi kusengaphambili ngezinto ezimele zenzeke ebomini bethu. Uyazi ukuba ulonwabo lwethu aluxhomekekanga ekwazini into eza kwenzeka kuthi kwixesha elizayo. Luxhomekeke ekuvumeleni uYehova asikhokele size simthobele. (Yer. 10:23) Xa simcela asicebise xa sisenza izigqibo, ngamanye amazwi sithi: “Ukuba uYehova uyathanda, siza kuphila, senze le naleya.”​—Yak. 4:15.

15. Yintoni esiyaziyo ngento eza kwenzeka kwixesha elizayo?

¹⁵ Ngoxa singazi ukuba suku ngalunye lusiphathele ntoni, siyazi ukuba uYehova usithembise ubomi obungunaphakade ezulwini okanye emhlabeni. Siyazi ukuba soze axoke futhi akukho nto inokumnqanda ukuba angazenzi izinto asithembise zona. (Tito 1:2) Nguye yedwa ochaza “umphumo wezinto zingekenzeki. Nozichaza kwakudala izinto zingekenziwa.” Ngamaxesha okubhalwa kweBhayibhile zonke izinto awathi ziza kwenzeka zenzeka. Nezinto athe ziza kwenzeka kwixesha elizayo ziza kwenzeka nyhani. (Isa. 46:10) Siqinisekile ukuba akukho nto inokwenza uYehova angasithandi. (Roma 8:​35-39) Uza kusinika ubulumko, asithuthuzele, asiphe namandla okunyamezela yonke into. Sinokuqiniseka ukuba uYehova uza kusinceda aze asisikelele.​—Yer. 17:​7, 8.

ASINAKUYIQONDA NGOKUPHELELEYO INDLELA UYEHOVA ASAZI KAKUHLE NGAYO

16. Ngokutsho kweNdumiso 139:​1-6, ziintoni uYehova azaziyo ngathi nesingenakuziqonda ngokupheleleyo?

¹⁶ Funda iNdumiso 139:​1-6. UMdali wethu wazi yonke into ngathi. Uyazi ukuba kutheni sicinga size sizive ngendlela esiziva ngayo. Uyazazi izinto esizithethayo nezisezintliziyweni zethu. Uzazi zonke nezinto esizenzayo nokuba kutheni sizenza. UKumkani uDavide wabona ukuba uYehova usikhathalele kangangokuba uhlala esigadile, ekulungele nokusinceda. Imangalisa nyhani into yokuba iNkosi enguMongami wendalo yonke, uMdali onamandla wezulu nomhlaba asikhathalele kangaka. UDavide wathi: “Indlela ondazi ngayo indimangalisa gqitha. Ingaphaya kwam.”​—INdu. 139:6.

17. Kutheni kusenokuba nzima ukukholelwa ukuba uYehova usazi kakuhle?

¹⁷ Kusenokwenzeka ukuba ngenxa yezinto ezenzeke emakhayeni ethu, indlela esikhule ngayo okanye izinto ebesizikholelwa, kunzima ukukholelwa ukuba uYehova nguTata osithandayo nonomdla kuthi. Okanye sisenokucinga ukuba iimpazamo esazenzayo zimbi kakhulu kangangokuba uYehova akasoze afune nokusazi futhi ukude lee kuthi. Phofu wayekhe azive ngolo hlobo noDavide. (INdu. 38:​18, 21) Okanye umntu ozama nyhani ukutshintsha indlela aphila ngayo ukuze aphile ngendlela efunwa nguThixo usenokuzibuza, ‘Ukuba uThixo undazi nyhani, kutheni elindele ukuba ndiyeke indlela endiphila ngayo eseyisegazini kum?’

18. Kusinceda njani ukukholelwa ukuba uYehova usazi ngaphezu kokuba sizazi? (Jonga nemifanekiso.)

¹⁸ Sinokuyikholelwa into yokuba uYehova usazi ngaphezu kokuba sizazi, ubona nezinto ezintle kuthi esingaziboniyo thina. Ngoxa ezibona iimpazamo zethu, uyazi ukuba sifuna ukuba ngabantu abanjani, futhi uyasithanda. (Roma 7:15) Xa siyiqonda into yokuba uYehova uyazibona izinto ezintle esinokukwazi ukuzenza, siza kutsho sifumane amandla esiwadingayo ukuze simkhonze sithembekile futhi sivuya.

19. Ziintoni esingazithandabuziyo ngoYehova?

¹⁹ Siyazi ukuba uYehova uluthando futhi asiyithandabuzi loo nto. (1 Yoh. 4:8) Siyazi ukuba yonke imithetho yakhe ibonisa ukuba uyasithanda, futhi ufuna siphile obona bomi bubhetele. Siyazi nokuba ufuna sifumane ubomi obungunaphakade. Ukuze yenzeke loo nto usincamele uNyana wakhe ukuba asifele. Loo nto isenza siqiniseke ukuba sinokukwazi ukumkhonza ngoxa sinesono. (Roma 7:​24, 25) Enye into esiyaziyo kukuba “uThixo mkhulu kuneentliziyo zethu, ibe wazi yonke into.” (1 Yoh. 3:​19, 20) UYehova wazi yonke into ngathi, futhi uqinisekile ukuba sinokukwazi ukuzenza izinto alindele ukuba sizenze.

20. Yintoni enokusenza siphephe ukuba nexhala?

²⁰ UYehova usixelela yonke into ekufuneka siyazi. Xa sithobeka size siyamkele loo nto, siza kukuphepha ukuba nexhala lezinto ezingekho semandleni ethu, size sicinge ngezinto ezibaluleke nyhani. Xa sisenza loo nto sibonisa ukuba simthembe ngokupheleleyo uYehova, ‘Lowo unolwazi olugqibeleleyo.’ (Yobhi 36:4) Ngoxa kukho izinto esingazaziyo ngoku, sikhangele phambili kubomi obungunaphakade apho uThixo wethu Ozukileyo eza kube esifundisa izinto ezintsha, sifunda nangaye.​—INtshu. 3:11.