“Abekho Abamelwane Abanjengani”

NGOMEYI 7 ukuya ku-8, 2016, abazalwana ababekwigumbi lokwamkela iindwendwe kwikomkhulu lethu elalise-25 Columbia Heights, eBrooklyn, eNew York babelindele iindwendwe ezingaqhelekanga. Nangona iindwendwe bezingadli ngakukhenkethiswa ngeempelaveki, kweli tyeli kwakumenywe abamelwane baseBheteli ukuze baze kubona imbali yeBhayibhile.

Iphulo lokumema abamelwane lasinceda sashumayela kwabaninzi ibe nabazalwana ababenenxaxheba kulo bahlaziyeka kakhulu. Kwakukhuthaza ukuva abantu ekukudala bengabamelwane bethu besincoma.

Enye indoda yathi, “Ndihleli kwiindawo ezahlukeneyo apha [ngaseBheteli] ukususela ngoo-1960, ibe abekho abamelwane abanjengani.” Siza kunikhumbula. Akwaba beningahambi.”

Omnye umfazi wathi: “Le ndawo ngeyingenje ukuba beningekho. Sivuya nyhani kuba siye saba ngabamelwane benu kuyo yonke le minyaka.”

Oovulindlela abaninzi ababeshumayela kule ndawo bavuya xa babona indlela ababenobubele ngayo abo bahlala kufutshane neBheteli. Enye indoda ekumbutho wabahlali yathi iyixabisa nyhani intlangano yethu yaza yathi ikhathazekile kuba iza kube ingekho xa kuvulelwa abamelwane ithuba lokubona iBheteli.

Yaba mihle gqitha imiphumo yoku. Kwiintsuku ezimbini kweza abantu abayi-48 abangengomaNgqina beze kubona imbali yeBhayibhile. Ngelo xesha kwakukho amalungu aliqela entsapho yaseBheteli awayeze kwamkela iindwendwe nokuncokola nazo.

USally, inkosikazi eneminyaka engaphaya kweyi-25 wachitha isiqingatha seyure ebuka izinto ezaziboniswa. Ukufika kwakhe, oovulindlela ababemnike isimemo babekwindawo ezifikela kuyo iindwendwe. Wathi ebengazi ukuba neeBhayibhile kuboniswa ngazo. Oovulindlela bamxelela indlela ekumnandi ngayo ukudibana nomntu ofundileyo oyithandayo iBhayibhile. USally wathi: “Ibaluleke nyhani. UThixo sinokufunda ngaye kuphela eBhayibhileni. Isinceda gqitha ebomini.”

USally uthi ukuyithanda kwakhe iBhayibhile kwambangela ukuba afunde isiLatini nesiGrike ibe wayenomdla kumsebenzi wokuguqulela. Wayesithi kubalulekile ukufumana iBhayibhile eguqulelwe kakuhle ukuze ingafundisi izinto zomntu othile. Xa oovulindlela bamxelela ukuba iwebhsayithi yethu ye-jw.org ithetha ngeBhayibhile kwaye iguqulelwe ngeelwimi ezingaphezu kweziyi-800, uSally wothuka waphants’ ukuwa. Xa aba dade bamxelela ukuba abanye abaguquleli benze ntoni kwigama likaYehova, uSally wothuka waza wathi, “Balikhuphela ntoni igama likaYehova eBhayibhileni?” Njengoko wayehamba, uSally wathi, “Zange ndakha ndahlala kwenye indawo, kodwa abekho abamelwane abanjengani.”

KuMvulo olandelayo, omnye umfundisi weza kuJohn, umzalwana waseBheteli owayeshumayela ngetroli kufutshane neBheteli. Waxelela uJohn indlela ekwakumnandi ngayo ukutyelela eBheteli nokuba uyayithanda into yokuba sinamathela eBhayibhileni. Kodwa ke, emva kokuncokola imizuzwana, wasuka wathi, “Iyandicaphukisa kodwa le nto yenziwa ngamaNgqina!” Yambhida ke le uJohn, waza wabuza ukuba, atheni? “Kutheni nifuduka? HLALANI APHA! Thengani izakhiwo ezikhulu okanye nakhe, enoba nenza ntoni kodwa hlalani apha. Nenza kuzole kule ndawo. Iyandicaphukisa le nto yokufuduka kwenu!”

Ukumenyelwa kwabantu eBheteli kwasinika ithuba elihle lokushumayela ibe igama likaThixo lenziwa lacaca nangakumbi kubamelwane bethu.