Yintoni Izulu?

Impendulo esuka eBhayibhileni

Igama elithi izulu lisetyenziswa ngeendlela ezintathu eBhayibhileni: (1) amazulu abonakalayo; (2) ummandla womoya; yaye (3) lithetha indawo ephakamileyo okanye isikhundla esiphakamileyo. Kwimeko nganye, loo nto kuthethwa ngayo yiyo esinceda siqonde intsingiselo echanileyo.a

1. Amazulu abonakalayo. Kule nkalo, amazulu abhekisela esibhakabhakeni apho kubhudla umoya, kubhabha iintaka, apho amafu ahlisa imvula nekhephu nalapho kulenyeza imibane. (INdumiso 78:26; IMizekeliso 30:19; Isaya 55:10; Luka 17:24) Asenokubhekisela nasemajukujukwini apho kukho “ilanga nenyanga neenkwenkwezi.”​—Duteronomi 4:19; Genesis 1:1.

2. Ummandla womoya. Igama elithi izulu likwabhekisela kummandla womoya, kwindawo yokuhlala ephakame ngaphezulu lee kunesibhakabhaka. (1 Kumkani 8:27; Yohane 6:38) Kummandla womoya kuhlala uYehova uThixo ‘onguMoya’ kwakunye neengelosi awazidalayo. (Yohane 4:24; Mateyu 24:36) Maxa wambi amazulu ayamntwiswa ukufanekisela iingelosi ezithembekileyo, ‘ibandla labangcwele.’​—INdumiso 89:5-7.

   IBhayibhile iphinde isebenzise igama elithi amazulu xa ibhekisela kwinxalenye yommandla womoya ‘kwindawo ahlala kuyo’ uYehova. (1 Kumkani 8:43, 49; Hebhere 9:24; ISityhilelo 13:6) Ngokomzekelo, iBhayibhile yaxela kwangaphambili ukuba uSathana needemon zakhe baza kuphoselwa ngaphandle kwezulu ibe abazange banikwe mvume yokubuyela ezulwini. Sekunjalo, babeza kuhlala bekummandla womoya.​—ISityhilelo 12:7-9, 12.

3. Indawo ephakamileyo okanye isikhundla esiphakamileyo. IZibhalo zisebenzisa igama elithi izulu ukuchaza isikhundla esiphakamileyo esidla ngokuba sesomntu ophetheyo. Eso sikhundla sinokuba:

   • SesikaYehova uThixo njengoMongami.​—2 Kronike 32:20; Luka 15:21.

   • BuBukumkani bukaThixo, urhulumente oza kuthabathel’ indawo ulawulo lwabantu. IBhayibhile ibhekisela kobo Bukumkani ‘njengamazulu amatsha.’​—Isaya 65:17; 66:22; 2 Petros 3:13.b

   • NgamaKristu asemhlabeni anethemba lokuphila ezulwini.​—Efese 2:6.

   • Ngoorhulumente babantu ababaphakameleyo abantu ababalawulayo.​—Isaya 14:12-14; Daniyeli 4:20-22; 2 Petros 3:7.

   • Ngoomoya abangendawo abalawula emhlabeni ngoku.​—Efese 6:12; 1 Yohane 5:19.

Kunjani ezulwini?

Kuyasetyenzwa kummandla womoya. Kuhlala amakhulu ezigidi zeengelosi ‘eziphulaphula isandi selizwi lakhe [uYehova].’​—INdumiso 103:20, 21; Daniyeli 7:10.

Xa ithetha ngezulu iBhayibhile ithi linokukhanya okuqaqambileyo. (1 Timoti 6:15, 16) Umprofeti uHezekile wabona umbono wamazulu ‘onjengokukhanya okuqaqambileyo’ ukanti yena uDaniyeli wabona ‘umsinga womlilo.’ (Hezekile 1:26-28; Daniyeli 7:9, 10) Izulu lingcwele okanye licocekile yaye lihle.​—INdumiso 96:6; Isaya 63:15; ISityhilelo 4:2, 3.

Indlela iBhayibhile elichaza ngayo izulu iyamangalisa. (Hezekile 43:2, 3) Ekubeni ummandla womoya ungaphaya kwamandla ethu, akunakwenzeka ngabantu ukukuqonda ngokupheleleyo oko kwenzeka ezulwini.