Yintoni Esinokuyifunda Kumabhinqa AseBhayibhileni?

Impendulo yeBhayibhile

EBhayibhileni kuthethwa ngamabhinqa amaninzi esinokufunda izinto ezibalulekileyo kwindlela awayephila ngayo. (Roma 15:4; 2 Timoti 3:16, 17) Eli nqaku lithetha ngamanye awo. Amaninzi kuwo sinokuwalinganisa. Amanye asisilumkiso sezinto esingamele sizenze.—1 Korinte 10:11; Hebhere 6:12.

UAbhigali

Wayengubani uAbhigali? Wayengumfazi kaNabhali, indoda eyayisisityebi kodwa ikhohlakele. Kodwa uAbhigali yena wayemhle, enengqondo ibe eneempawu ezithandwayo nguYehova.—1 Samuweli 25:3.

Wenza ntoni? UAbhigali wabonisa ukuba unengqondo ibe ulumkile kuba wanqanda into embi eyayiza kwenzeka. Yena noNabhali babehlala kwisixeko awayebalekele kuso uDavide, owayeza kuba ngukumkani wakwaSirayeli. UDavide kunye namadoda akhe bazikhusela iigusha zikaNabhali kootsotsi ngoxa babezimele kweso sixeko. Kodwa xa uDavide wathumela abantu ukuba bayokucela ukutya. UNabhali zange avume. Yamcaphukisa kakhulu loo nto uDavide! Ngoko yena namadoda akhe bazixelela ukuba bayokubulala uNabhali nawo onke amadoda asendlini yakhe.—1 Samuweli 25:10-12, 22.

UAbhigali wathi wakuva into eyenziwe ngumyeni wakhe, wakhawuleza wathumela izicaka zakhe ukuba zithumele ukutya kuDavide nakumadoda akhe. Emva koko walandela ukuze ayokucela inceba kuDavide. (1 Samuweli 25:14-19, 24-31) Xa uDavide wabona izipho awayeziphathelwe nguAbhigali, ukuthobeka kwakhe, nendlela awayemcebisa kakuhle ngayo, waqonda ukuba usetyenziswe nguThixo ukuze amnqande ekubulaleni uNabhali namadoda akhe. (1 Samuweli 25:32, 33) Akuzange kudlule ixesha elide emva koko, uNabhali wafa ibe uAbhigali waba ngumfazi kaDavide.—1 Samuweli 25:37-41.

Sifunda ntoni kuAbhigali? Nangona wayemhle ibe esisityebi, uAbhigali wayengacingi ukuba ubalulekile kunabanye abantu. Wayekulungele ukuxolisa nokuba wayengenzanga nto irongo ukuze abantu bahlale bengaxabani. Xa kwakukho ingxaki, wazola wabonisa ukuba unobuchule bokuthetha, unesibindi ibe uyakwazi ukucinga kakuhle.

▸ Ukuze ufunde ezinye izinto ngoAbhigali, jonga inqaku elithi “Wasebenzisa Ingqiqo.”

UDebhora

Wayengubani uDebhora? Wayengumprofetikazi owayesetyenziswa nguYehova ukuze axelele abantu Bakhe amaSirayeli izinto ababefanele bazenze. UThixo waphinda wasebenzisa yena ukuze akwazi ukulungisa iingxaki ezaziphakathi kwamaSirayeli.—ABagwebi 4:4, 5.

Wenza ntoni? Umprofetikazi uDebhora wayexhasa abakhonzi bakaThixo enesibindi. Ethunywa nguThixo, wabiza uBharaki ukuba akhokele umkhosi wamaSirayeli ukuze ayokulwa namaKanan. (ABagwebi 4:6, 7) Xa uBharaki wamcela ukuba ahambe naye, akazange avumele ukoyika kumenze angahambi kodwa wavuma, waza wahamba naye.—ABagwebi 4:8, 9.

Emva kokuba uThixo ebancede boyisa, uDebhora yayingomnye wabantu ababhala ingoma ababeyicula noBharaki, eyayichaza ngezinto ezenzeke kuloo mfazwe. Kuloo ngoma, wathetha nangelinye ibhinqa elalinesibindi elancedisayo ekoyiseni amaKanan, elo bhinqa yayinguYaheli.—ABagwebi, isahluko 5.

Sifunda ntoni kuDebhora? UDebhora wayenesibindi ibe wazincama. Wakhuthaza nabanye ukuba benze izinto ezilungileyo emehlweni kaThixo. Xa beyenza loo nto, wayebancoma.

▸ Ukuze ufunde okungakumbi ngoDebhora, jonga inqaku elithi “Ndaphakama Njengomama KuSirayeli.”

UDelila

Wayengubani uDelila? Wayelibhinqa elathandwa nguSamson.—ABagwebi 16:4, 5.

Wenza ntoni? Wathatha imali awayinikwa ziinkokheli zamaFilisti ukuze aqhathe uSamson, owayesetyenziswa nguThixo ukuze akhulule amaSirayeli kumaFilisti. AmaFilisti ayengakwazi ukumoyisa ngenxa yokuba wayenamandla angummangaliso. (ABagwebi 13:5) Yiloo nto acela uncedo kuDelila.

AmaFilisti anika uDelila imali ukuze abuze uSamson ukuba uwathatha phi amandla amangaka. UDelila wayithatha loo mali, wamane embuza ukuba uwathatha phi amandla akhe emcenga de uSamson wamxelela. (ABagwebi 16:15-17) Emva koko uDelila waya kuxelela amaFilisti, aza ambamba uSamson amvalela.—ABagwebi 16:18-21.

Sifunda ntoni kuDelila? UDelila ngumzekelo ombi esingamele siwulinganise. Ngenxa yokuba wayethanda imali, wenza into embi, ezicingela yedwa, ibe zange anyaniseke kumkhonzi kaYehova uThixo.

UEstere

Wayengubani uEstere? Wayeyintombi engumYuda eyayikhethwe nguKumkani uAhaswerosi wasePersi ukuba ibe nguKumkanikazi wakhe.

Wenza ntoni? UKumkanikazi uEstere wasebenzisa amandla awayenawo ukuze anqande ukubulawa kwabantu bakowabo. Wafumanisa ukuba kukho umthetho okhutshiweyo wokuba ngosuku oluthile, amaYuda ahlala ePersi abulawe. Eli cebo lingcolileyo leza nendoda enguHaman, owayesisikhulu kwaKumkani. (Estere 3:13-15; 4:1, 5) UEstere wabeka ubomi bakhe engozini encedwa ngumzala wakhe omdala uMordekayi ukuba achazele umyeni wakhe uKumkani uAhaswerosi ngeli cebo libi. (Estere 4:10-16; 7:1-10) Ahaswerosi wavumela uEstere noMordekayi ukuba bakhuphe omnye umyalelo wokuba amaYuda azilwele. AmaYuda azoyisa ngokupheleleyo iintshaba zabo.—Estere 8:5-11; 9:16, 17.

Sifunda ntoni kuEstere? UKumkanikazi uEstere wamisela umzekelo omhle wokuba nesibindi, ukuthobeka, nokungazijongi njengobhetele. (INdumiso 31:24; Filipi 2:3) Ukuba nguKumkanikazi nokuba mhle kwakunokumenza acinge ukuba ubalulekile kunabanye, kodwa wayethobekile ekwazi ukucela uncedo namacebiso kwabanye. Xa wayethetha nomyeni wakhe, wayewakhetha kakuhle amagama, enembeko kodwa enesibindi. Xa amaYuda ayesengozini, waba nesibindi wabonisa ukuba ungakwicala labo.

▸ Ukuze ufunde ezinye izinto ngoEstere, jonga inqaku elithi “Wamela Abantu BakaThixo” nelithi. “Wenza Ngobulumko, Ngenkalipho Nangokuzincama.”

UEva

Wayengubani uEva? Libhinqa lokuqala elabakho nekuthethwa ngalo eBhayibhileni.

Wenza ntoni? UEva akazange athobele umyalelo kaThixo ocacileyo. UEva wayefana nomyeni wakhe uAdam, wayengenasono, eneempawu ezifana nezikaThixo njengothando nobulumko, enenkululeko yokuzikhethela into afuna ukuyenza. (Genesis 1:27) UThixo wayexelele uAdam ukuba xa betye kumthi othile, babeza kufa ibe uEva wayeyazi loo nto. Kodwa uSathana wamqhatha uEva, wamenza wacinga ukuba akazokufa. Phofu wamenza wacinga ukuba uza kuphila obona bomi bubhetele xa engamthobeli uThixo. Ngoko wathatha isiqhamo saloo mthi, wasitya, waza wasinika nomyeni wakhe.—Genesis 3:1-6; 1 Timoti 2:14.

Sifunda ntoni kuEva? Umzekelo ombi kaEva uyasilumkisa ngendlela ekuyingozi ngayo ukungayeki ukucinga ngeminqweno erongo. Zange awuthobele umyalelo kaThixo ocacileyo, kuba wanqwenela ukuthatha into engeyoyakhe.—Genesis 3:6; 1 Yohane 2:16.

UHana

Wayengubani uHana? Wayengumfazi kaElikana nomama kaSamuweli, owayengumprofeti owaziwayo kwaSirayeli.—1 Samuweli 1:1, 2, 4-7.

Wenza ntoni? Xa uHana wayengenamntana, wacela uThixo ukuba amthuthuzele. Umyeni wakhe wayenabafazi ababini. Omnye umfazi wakhe, uPenina wayenabantwana, kodwa uHana wayengafumani bantwana ixesha elide emva kokuba etshatile. UPenina wayemgezela, kodwa uHana wayecela uncedo kuThixo. Wafunga kuThixo wathi, ukuba umnike unyana wayeza kunikela ngaye ukuba aye kukhonza kwintente engcwele, eyayisetyenziswa ngamaSirayeli ukuze amkhonze.—1 Samuweli 1:11.

UThixo wawuphendula umthandazo kaHana, wamitha waza wazala umntwana onguSamuweli. UHana wayenza into awayeyithembisile, wathatha umntwana wamsa kwintente engcwele eseyinkwenkwe. (1 Samuweli 1:27, 28) Qho ngonyaka, wayemenzela isambhatho esingenamikhono aze asise kuye. Ekuhambeni kwexesha, uThixo wamsikelela uHana ngabanye abantwana abahlanu, oonyana abathathu neentombi ezimbini.—1 Samuweli 2:18-21.

Sifunda ntoni kuHana? Umthandazo osuka entliziyweni wamnceda wakwazi ukunyamezela iingxaki. Ku-1 Samuweli 2:1-10 sifunda ngomthandazo wakhe wombulelo kuThixo ibe sibona ukuba wayenokholo.

▸ Ukuze ufunde okungakumbi ngoHana, jonga inqaku elithi “Wakhuphela Imbilini Yakhe KuThixo Ngomthandazo.”
▸ Ukuze ufunde okungakumbi ukuba kwakutheni ukuze uThixo ayeke abantu bakhe bakudala ukuba babe nesithembu, jonga inqaku elithi “Ngaba UThixo Uyasamkela Isithembu?”

UYaheli

Wayengubani uYaheli? Wayengumfazi kaHebheri, umKeni. UYaheli waxhasa abantu bakaThixo enesibindi.

Wenza ntoni? USisera owayeyinkokheli yomkhosi wamaKanan woyiswa emkhosini waza wakhangela indawo yokuzimela ukuze ayokuphumla. Wathi xa efika enkampini kaYaheli, wammemela ngaphakathi ukuze azokuphumla kuyo. Waza wathi xa elele uYaheli wambulala.—ABagwebi 4:17-21.

Le nto uYaheli wayenzayo yazalisekisa isiprofeto esathethwa nguDebhora kuba wayethe: “UYehova uza kumnikela esandleni somfazi uSisera.” (ABagwebi 4:9) Ngenxa yento awayenzayo, uYaheli wazukiswa kuba kwathiwa “ngoyena usikelelekileyo kubafazi.”—ABagwebi 5:24.

Sifunda ntoni kuYaheli? UYaheli wayenesibindi ibe wayengalibazisi ekwenzeni izinto. Ibali lakhe lisibonisa ukuba uThixo angenza nantoni na ukuze kuzaliseke isiprofeto.

UIzebhele

Wayengubani uIzebhele? Wayengumfazi kaKumkani wakwaSirayeli uAhabhi. WayengengomSirayeli ibe wayengamkhonzi uYehova. Kodwa wayekhonza uthixo wamaKanan uBhahali.

Wenza ntoni? UKumkanikazi uIzebhele wayethanda ukubalawula kakubi abantu, ekhohlakele ibe ethanda nobundlobongela. Wayekhuthaza abantu ukuba bakhonze uBhahali ibe baziphathe kakubi ngesondo, njengokuba kwakusenziwa xa wayekhonzwa. Enye into awayeyenza kukufuna ukuyekisa bonke abantu ababekhonza uThixo oyinyaniso, uYehova.—1 Kumkani 18:4, 13; 19:1-3.

Ukuze afumane into ayifunayo, uIzebhele wayexoka aze abulale abantu. (1 Kumkani 21:8-16) Njengokuba uThixo wayetshilo, wafa kabuhlungu ibe zange angcwatywe.—1 Kumkani 21:23; 2 Kumkani 9:10, 32-37.

Sifunda ntoni kuIzebhele? UIzebhele ngumzekelo ombi esingamele siwulinganise. Kuba wayeziphethe kakubi ibe ekulungele ukwenza nantoni na ukuze afumane into ayifunayo, igama lakhe lisetyenziswa kumabhinqa angenazintloni zokwenza into embi, aziphethe kakubi, nangayikhathalelanga imithetho, nangayikhathalelanga into yokuba esenza into erongo.

ULeya

Wayengubani uLeya? Wayengumfazi wokuqala kasolusapho uYakobi. Udadewabo omncinci uRakeli, wayengumfazi wakhe wesibini.—Genesis 29:20-29.

Wenza ntoni? ULeya waba ngumama woonyana bakaYakobi abayi-6. (Rute 4:11) UYakobi wayefuna ukutshata noRakeli, hayi uLeya. Kodwa uLabhan utata wezi ntombi, walungiselela ukuba ibe nguLeya otshatwa nguYakobi endaweni kaRakeli. Xa uYakobi wabona ukuba uqhathiwe waza watshatiswa uLeya, wayokuthetha noLabhan. ULabhan wamxelela ukuba yayingelosiko into yokuba intombi encinci itshate kuqala kunentombi endala. Kwiveki elandelayo, uYakobi watshata noRakeli.—Genesis 29:26-28.

UYakobi wayethanda uLeya ngaphezu koRakeli. (Genesis 29:30) Ngenxa yaloo nto, uLeya waba nomona ngendlela udade wabo athandwa ngayo ngoko wazama ukukhuphisana naye ukuze athandwe nguYakobi aze ahoywe. UThixo wayibona indlela uLeya awayeziva ngayo, waza wamsikelela ngabantwana abayi-7, oonyana abayi-6 nentombi enye.—Genesis 29:31.

Sifunda ntoni kuLeya? ULeya wayethembele kuThixo ethandaza, ibe nangona wayeneengxaki kwintsapho yakhe, wayeyibona indlela uThixo amxhasa ngayo. (Genesis 29:32-35; 30:20) Ibali lakhe lobomi libonisa ngokucacileyo ukuba isithembu asisebenzi, nangona uThixo wayebayeka ukuba abantu basenze ngelo xesha. Ufuna ukuba indoda ibe nomfazi omnye.—Mateyu 19:4-6.

▸ Ukuze ufunde ezinye izinto ngoLeya, jonga inqaku elithi “Amabhinqa Ayeselusizini ‘Ayakha Indlu KaSirayeli.’”
▸ Ukuze ufunde okungakumbi ukuba kwakutheni ukuze uThixo ayeke abantu bakhe bakudala ukuba babe nesithembu, jonga inqaku elithi “Ngaba UThixo Uyasamkela Isithembu?”

UMarta

Wayengubani uMarta? YayingudadeboLazaro noMariya, ibe bobathathu babehlala kwilali eyayikufutshane neYerusalem, iBhethani.

Wenza ntoni? UMarta wayengumhlobo osondeleyo kaYesu, ibe uYesu “wayemthanda uMarta nodadewabo uLazaro.” (Yohane 11:5) UMarta wayengumntu onobubele. Ngenye imini xa uYesu wayeye kwikhaya labo, uMariya wakhetha ukuhlala ukuze amamele izinto ezazithethwa nguYesu kodwa yena uMarta wayexakeke yimisebenzi yasendlini. UMarta wakhalaza esithi uMariya wayengamncedisi. UYesu wamlungisa uMarta ngobubele.—Luka 10:38-42.

Xa uLazaro wayegula, uMarta nodadewabo bacela ukuba kuyokubizwa uYesu, kuba babeqinisekile ukuba uza kumphilisa. (Yohane 11:3, 21) Kodwa uLazaro wafa. Incoko kaMarta noYesu yayibonisa ukuba wayeqinisekile ukuba iza kwenzeka into ethenjiswa yiBhayibhile ngovuko, nokuba uYesu angakwazi ukumvusa ubhuti wakhe.—Yohane 11:20-27.

Sifunda ntoni kuMarta? UMarta wayengumntu onobubele ibe wayekuthanda ukubuka iindwendwe. Wayevuma naxa elungiswa. Wayeyichaza ngokukhululekileyo indlela aziva ngayo ngezinto azikholelwayo.

▸ Ukuze ufunde nezinye izinto ngoMarta, jonga inqaku elithi “Ndikholiwe.”

UMariya (umama kaYesu)

Wayengubani uMariya? Wayeyintombi yomYuda, ibe xa wazala uYesu awayemkhulelwe ngokungummangaliso, wayengekalali nandoda.

Wenza ntoni? Ngokuthobeka, uMariya wenza ukuthanda kukaThixo. Wayengejwe nguYosefu xa kwafika ingelosi kuye yaza yamazisa ukuba uza kukhulelwa aze azale uMesiya ekudala elindiwe. (Luka 1:26-33) Ngokuthobeka wavuma. Emva kokuba uYesu ezelwe, uMariya noYosefu baba noonyana abane kunye neentombi ezimbini. Ngoko kucacile ukuba uMariya, emva kokuba uYesu ezelwe walala nomyeni wakhe. (Mateyu 13:55, 56) Nangona wayenze into ebalulekileyo, zange afune ukuzukiswa ibe zange aphathwe ngendlela ekhethekileyo xa wayekwibandla lamaKristu okuqala, naxa uYesu wayeshumayela apha emhlabeni.

Sifunda ntoni kuMariya? UMariya wayengumfazi owayenokholo owawamkela ngokuthobeka umsebenzi onzima. Wayezazi kakuhle iZibhalo. Kubonakala ngathi kumazwi akhe akuLuka 1:46-55 wacaphula iZibhalo kayi-20.

▸ Ukuze ufunde ezinye izinto ngoMariya, jonga inqaku elithi “Oko Sinokukufunda Kumzekelo KaMariya.”

UMariya (udadeboMarta noLazaro)

Wayengubani uMariya? Yena, nobhuti wakhe uLazaro, nodadewabo uMarta babenobuhlobo obusondeleyo noYesu.

Wenze ntoni? Wayesoloko ebonisa indlela amthanda ngayo uNyana kaThixo onguYesu. Wayenokholo lokuba ubhuti wakhe wayengazokufa ukuba wayekhona uYesu. Wayekhona naxa uYesu wayevusa uLazaro. Usisi wakhe uMarta, wamgxeka xa wakhetha ukumamela uYesu kunokuba ancedise kwimisebenzi yasendlini. Wabonisa ukuba eyona nto ibalulekileyo kuye yinyaniso.—Luka 10:38-42.

Ngenye imini uMariya wabonisa ububele bakhe ngokuthambisa uYesu intloko neenyawo zakhe ‘ngeoli enuka kamnandi enexabiso elikhulu.’ (Mateyu 26:6, 7) Abanye ababekhona bamgxeka uMariya besithi uyamosha. Kodwa uYesu wamthethelela wathi: “Naphi na apho zishunyayelwa khona ezi ndaba zilungileyo [ezingoBukumkani bukaThixo] emhlabeni, kuza kuthethwa nangaye lo mfazi, aze akhunjulwe ngale nto ayenzileyo.”—Mateyu 24:14; 26:8-13.

Sifunda ntoni kuMariya? UMariya wayenokholo oluqinileyo. Eyona nto yayibalulekile kuye yayikukukhonza uThixo ngaphezu kwezinye izinto. Wazukisa uYesu ngokuthobeka nangona kwakufuneka ukuba asebenzise imali eninzi ukuze enze loo nto.

UMariya Magadala

Wayengubani uMariya Magadala? Wayengumfundi kaYesu.

Wenza ntoni? UMariya Magadala wayengomnye wabafazi abahamba noYesu kunye nabafundi bakhe. Wayesebenzisa imali yakhe ukuze abancede ngezinto abazidingayo. (Luka 8:1-3) Wayekufuphi xa uYesu wayebulawa, kuba wayengumlandeli wakhe de wawugqiba umsebenzi wakhe wokushumayela. Wayephakathi kwabantu bokuqala ababona uYesu emva kokuba evusiwe.—Yohane 20:11-18.

Sifunda ntoni kuMariya? UMariya Magadala wayesoloko ewuxhasa umsebenzi kaYesu wokushumayela, ibe waba ngumlandeli wakhe ozimiseleyo.

UMiriyam

Wayengubani uMiriyam? Wayengusisi kaMoses noAron. Libhinqa lokuqala elibizwa ngokuba ngumprofetikazi eBhayibhileni.

Wenza ntoni? Kuba wayengumprofetikazi, wayexelela abantu umyalezo ovela kuYehova uThixo. Wayenesikhundla esiphezulu kwaSirayeli ibe wacula namadoda akwaSirayeli xa uThixo wayewancedile oyisa umkhosi waseYiputa kuLwandle Olubomvu.—Eksodus 15:1, 20, 21.

Ekuhambeni kwexesha, uMiriyam noAron bathetha kakubi ngoMoses. Babezicingela ukuba babhetele ibe babenomona. UThixo “wayeyimamele yonke loo nto,” ibe wabangxolisa kakhulu bobabini. (Numeri 12:1-9) UThixo wenza uMiriyam ukuba abe neqhenqa kuba kubonakala ukuba yayiqalwe nguye yonke le nto. UMoses wamxolisela waza uThixo wamphilisa. Emva kokuba ehlaliswe yedwa kude nabantu iintsuku eziyi-7, wabuyiselwa ukuba aye kwabanye enkampini yakwaSirayeli.—Numeri 12:10-15.

IBhayibhile ibonisa ukuba uMiriyam wavuma ukulungiswa. Emva kweminyaka emininzi, uThixo wathetha ngomsebenzi wakhe obalulekileyo xa wayekhumbuza amaSirayeli esithi: “Ndathumela uMoses, uAron noMiriyam ukuba banikhokele.”—Mika 6:4.

Sifunda ntoni kuMiriyam? Ibali likaMiriyam libonisa ukuba uThixo uyabamamela abakhonzi bakhe ukuba bathini xa bethetha nabanye okanye ngabanye. Enye into esiyifundayo kukuba, ukuze sivuyise uThixo asimele sizicingele ukuba sibhetele okanye sibe nomona, kuba loo nto inokusenza singcolise amagama wabanye abantu.

URakeli

Wayengubani uRakeli? Wayeyintombi kaLabhan ibe ethandwa kakhulu ngumyeni wakhe owayengusolusapho, uYakobi.

Wenza ntoni? URakeli wayetshate noYakobi ibe babenoonyana ababini. Oonyana bakhe yayingabanye boonyana bakaYakobi ababebumba iziwe eziyi-12 zakwaSirayeli. URakeli wadibana noYakobi xa wayehoye iigusha zikatata wakhe. (Genesis 29:9, 10) “Wayemhle kakhulu” ngaphezu kodadewabo omdala, uLeya.—Genesis 29:17.

UYakobi wayemthanda uRakeli, ibe wavuma ukusebenza iminyaka eyi-7 ukuze atshate naye. (Genesis 29:18) Kodwa uLabhan wamqhatha uYakobi ngokumtshatisa noLeya kuqala, emva koko wamvumela ukuba atshate noRakeli.—Genesis 29:25-27.

UYakobi wayemthanda kakhulu uRakeli noonyana bakhe ababini ngaphezu kokuba ethanda uLeya nabantwana bakhe. (Genesis 37:3; 44:20, 27-29) Ngenxa yaloo nto, uLeya noRakeli babengavani tu.—Genesis 29:30; 30:1, 15.

Sifunda ntoni kuRakeli? URakeli wayeqinisekile ukuba uThixo uza kuyiva imithandazo yakhe nangona wayenyamezele ingxaki kwintsapho yakhe. (Genesis 30:22-24) Ibali lakhe lobomi libonisa ngokucacileyo ukuba isithembu senza kube nzima entsatsheni. Lisibonisa nendlela uThixo anobulumko ngayo xa wathi indoda ifanele ibe nomfazi omnye.—Mateyu 19:4-6.

▸ Ukuze ufunde ezinye izinto ngoRakeli, jonga inqaku elithi “Amabhinqa Ayeselusizini ‘Ayakha Indlu KaSirayeli.’”
▸ Ukuze ufunde okungakumbi ukuba kwakutheni ukuze uThixo ayeke abantu bakhe bakudala ukuba babe nesithembu, jonga inqaku elithi “Ngaba UThixo Uyasamkela Isithembu?”

URahabhi

Wayengubani uRahabhi? Wayethengisa ngomzimba, ehlala kwisixeko saseKanan iYeriko, ibe waba ngumkhonzi kaYehova uThixo.

Wenza ntoni? URahabhi wafihla amaSirayeli amabini awayeye kuhlola ilizwe. Le nto wayenza kuba weva ngendlela uThixo wamaSirayeli, uYehova awabakhulula ngayo abantu bakhe kumaYiputa. Weva nokuba wawakhusela xa ayehlaselwa sisizwe sama-Amori.

URahabhi wanceda ezi ntlola waza wazicenga ukuba zincede yena nentsapho yakhe, ukuba bangatshatyalaliswa xa amaSirayeli ayeze kutshabalalisa iYeriko. Bathi baza kuyenza loo nto ukuba uRahabhi wenza ezi zinto zilandelayo: Kwakufuneka aqiniseke ukuba akaxeleli mntu ngento ababeza kuyenza abahloli. Enye into yena nentsapho yakhe kwakuza kufuneka bangaphumi endlini xa amaSirayeli ehlasela. Kwakuza kufuneka abophelele nentambo ebomvu efestileni ukuze ikhaya lakhe licace ukuba leliphi. URahabhi wayenza yonke into ababemxelele yona, ibe yena nentsapho yakhe basinda xa amaSirayeli ayehlasela iYeriko.

Ekuhambeni kwexesha, uRahabhi watshata nomSirayeli waza waba ngukhokho kaKumkani uDavide, noYesu Kristu.—Yoshuwa 2:1-24; 6:25; Mateyu 1:5, 6, 16.

Sifunda ntoni kuRahabhi? Xa iBhayibhile ithetha ngoRahabhi imchaza njengomntu ongumzekelo wokuba nokholo. (Hebhere 11:30, 31; Yakobi 2:25) Ibali lakhe lobomi libonisa kakuhle ukuba uThixo akanamkhethe, uyaxolela, uyabasikelela abo bamthembileyo nokuba babekade bephila njani.

▸ Ukuze ufunde izinto ezingakumbi ngoRahabhi, jonga inqaku elithi “Wavakaliswa Elilungisa Ngenxa Yemisebenzi.’”

URebheka

Wayengubani uRebheka? Yayingumfazi kaIsake nomama woonyana ababengamawele, uYakobi noIsake.

Wenza ntoni? URebheka wenza izinto ezazithandwa nguThixo naxa kwakunzima. Xa wayeyokukha amanzi equleni, kwafika indoda yamcela ukuba amphe amanzi. URebheka zange alibazise wakhawuleza wayipha amanzi le ndoda, waza wathi uza kukhelela neenkamela zayo. (Genesis 24:15-20) Le ndoda yayisisicaka sika-Abraham, ibe yayihambe umgama omde iye kufunela unyana ka-Abraham uIsake umfazi. (Genesis 24:2-4) Le ndoda yayicele uThixo ukuba ayisikelele ngokuyinceda. Xa yabona indlela uRebheka akhuthele nanobubele ngayo, yaqonda ukuba uThixo uyiphendulile imithandazo yayo kuba wambonisa ukuba oyena mfazi ufanelekileyo kaIsake nguRebheka.—Genesis 24:10-14, 21, 27.

Xa uRebheka weva isizathu sokuba le ndoda ize apha, wavuma ukuhamba nayo waza waba ngumfazi kaIsake. (Genesis 24:57-59) Ekuhambeni kwexesha waba noonyana ababini abangamawele. UThixo wamchazela ukuba unyana wakhe omdala, uEsawu uza kuba sisicaka sonyana wakhe omncinci, uYakobi. (Genesis 25:23) Xa uIsake wayeza kusikelela uEsawu kuba elizibulo, uRebheka wazama ukwenza ukuthanda kukaThixo ngokuqinisekisa ukuba kusikelelwa uYakobi.—Genesis 27:1-17.

Sifunda ntoni kuRebheka? URebheka wayethobekile, ekhuthele, ibe enobubele. Ezi mpawu zamenza waba ngumfazi nomama olungileyo waza wamkhonza kakuhle noThixo oyinyaniso.

▸ Ukuze ufunde nezinye izinto ngoRebheka, jonga inqaku elithi “Ndikulungele Ukuhamba.”

URute

Wayengubani uRute? Wayeyintombi yakwaMowabhi eyashiya oothixo bayo nekhaya layo ukuze iyokuba ngumkhonzi kaYehova kwaSirayeli.

Wenza ntoni? URute wabonisa ukuba umthanda kakhulu umazala wathe uNahomi. UNahomi kunye nomyeni wakhe noonyana bakhe ababini, baya kwaMowabhi kuba babebaleka indlala eyayikwaSirayeli. Oonyana babo batshata iintombi zakwaMowabhi, uRute no-Opra. Kodwa ekuhambeni kwexesha, umyeni kaNahomi noonyana bakhe ababini basweleka, bashiyeka bengabahlolokazi bobathathu.

UNahomi wagqiba ekubeni uza kubuyela kwaSirayeli, kuba indlala yayiphelile. URute no-Opra bafuna ukuhamba naye kodwa uNahomi wathi mababuyele kwiintsapho zabo. UOpra wabuyela. (Rute 1:1-6, 15) Kodwa yena uRute wafuna ukuhamba nomazala wakhe kuba wayemthanda ibe efuna ukukhonza uThixo wakhe uYehova.—Rute 1:16, 17; 2:11.

Kuba uRute wayengumakoti onothando, esebenza nzima, waye waziwa kakuhle kwindawo wayekhulele kuyo uNahomi eBhetelehem. Kukho indoda eyayinamasimi neyayisisityebi ekuthiwa nguBhohazi, ibe yamthanda uRute kangangokuba yabapha ukutya noNahomi. (Rute 2:5-7, 20) Ekuhambeni kwexesha uRute watshata noBhohazi ibe waba ngukhokho kaKumkani uDavide noYesu Kristu.—Mateyu 1:5, 6, 16.

Sifunda ntoni kuRute? Kuba wayethanda uYehova noNahomi, uRute washiya ikhaya lakhe nentsapho yakhe. Wayesebenza nzima ibe enothando naxa kwakunzima.

▸ Ukuze ufunde nezinye izinto ngoRute, jonga inqaku elithi “Apho Uya Khona Ndiya Khona” nelithi “Umfazi Obalaseleyo.”

USara

Wayengubani uSara? Wayengumfazi kaAbraham nomama kaIsake.

Wenza ntoni? USara washiya ubomi obumnandi kwidolophu eyayinabantu abazizityebi iUre, kuba wayekholelwa kwizithembiso uThixo awayezenze kumyeni wakhe uAbraham. UThixo waxelela uAbraham ukuba ashiye isixeko saseUre aye kwaKanan. Wamthembisa ukuba uza kumsikelela aze amenze uhlanga olukhulu. (Genesis 12:1-5) Kusenokwenzeka ukuba uSara wayeneminyaka ekoo-60 ngelo xesha. Ukususela ngoko, uSara nomyeni wakhe bahlala ezintenteni.

Nangona ukuhlala ezintenteni kwakunokubeka ubomi bukaSara engozini, kodwa wayemxhasa umyeni wakhe njengoko wayelandela ukhokelo lukaThixo. (Genesis 12:10, 15) Kwadlula iminyaka emininzi engafumani bantwana, ibe le nto yayimkhathaza kakhulu. Kodwa uThixo wayemthembisile uAbraham ukuba uza kuyisikelela intsapho yakhe. (Genesis 12:7; 13:15; 15:18; 16:1, 2, 15) Ekuhambeni kwexesha, uThixo wamqinisekisa ukuba uSara wayeza kuba nomntwana noAbraham. Wazala emdala kakhulu, wayeneminyaka eyi-90 umyeni wakhe eneminyaka eyi-100. (Genesis 17:17; 21:2-5) Lo mntana bamthiya igama elinguIsake.

Sifunda ntoni kuSara? Umzekelo kaSara usifundisa ukuba sinokuzithemba izinto uThixo asithembise zona, nezo kubonakala ngathi azinakwenzeka! (Hebhere 11:11) Umzekelo wakhe ufundisa abafazi indlela ekubaluleke ngayo ukuba babe nentlonipho emtshatweni.—1 Petros 3:5, 6.

▸ Ukuze ufunde nezinye izinto ngoSara, jonga inqaku elithi “Ungumfazi Omhle Ngembonakalo” nelithi “UThixo Wambiza Ngokuthi ‘Yinkosazana.’”

UmShulamikazi

Wayengubani umShulamikazi? Wayeyintombi entle yasezilalini ibe ngoyena mntu kuthethwa ngaye kwincwadi yeBhayibhile ekuthiwa yiNgoma yazo iiNgoma. IBhayibhile ayilichazi igama lakhe.

Wenza ntoni? UmShulamikazi owayengatshatanga wahlala enyanisekile kumfana awayethandana naye owayengumalusi. (INgoma yazo iiNgoma 2:16) Ngenxa yendlela awayemhle ngayo, wabonwa nguKumkani uSolomon owayesisityebi ibe uSolomon wazama ukuba athandane naye. (INgoma yazo iiNgoma 7:6) Abanye babemcebisa ukuba akhethe uSolomon, kodwa umShulamikazi zange avume. Wayemthanda nyhani umalusi wakhe ibe enyanisekile kuye.—INgoma yazo iiNgoma 3:5; 7:10; 8:6.

Sifunda ntoni kumShulamikazi? Wayethobekile nangona wayemhle kakhulu, nabantu betsaleleka kuye. Zange avumele ubutyebi bumenze ayeke ukuthanda umalusi wakhe. Wayekwazi ukuyilawula indlela aziva ngaye ibe wayeziphethe kakuhle.

Umfazi kaLote

Wayengubani umfazi kaLote? IBhayibhile ayilichazi igama lakhe. Kodwa iyasichazela ukuba wayeneentombi ezimbini ibe babezenzele ikhaya kwisixeko saseSodom.—Genesis 19:1, 15.

Wenza ntoni? Zange awuthobele umthetho kaThixo. UThixo wayefuna ukutshabalalisa iSodom nezixeko ezikufutshane nayo, kuba abantu ababehlala khona babeziphethe kakubi ngesondo. Ngenxa yokuba uThixo wayemthanda uLote nentsapho yakhe, wathumela iingelosi ezimbini ukuba zibakhuphe kweso sixeko zize zibase kwindawo ekhuselekileyo.—Genesis 18:20; 19:1, 12, 13.

Ezi ngelosi zimbini zaxelela uLote nentsapho yakhe ukuba babaleke basishiye eso sixeko bangajongi ngasemva; okanye babeza kufa. (Genesis 19:17) Umfazi kaLote “waqalisa ukujonga ngasemva, waza waba yintsika yetyuwa.”—Genesis 19:26.

Sifunda ntoni kumfazi kaLote? Ibali lakhe lisifundisa ngobungozi bokuthanda izinto eziphathekayo side singamthobeli uThixo. Kangangokuba uYesu wasilumkisa esebenzisa lo mzekelo wathi: “Khumbulani umfazi kaLote”.—Luka 17:32.