Kuncedwa Abantu Nangona Kukho ‘Iimfazwe’

Kule mihla yokugqibela, siza kusoloko ‘sisiva ngeemfazwe.’ (Mateyu 24:6) Kodwa, xa abazalwana noodade beneengxaki ngenxa yazo bayancedwa. Ingxelo YeQumrhu Elilawulayo Ka-2022 #3 iye yachaza indlela abancedwe ngayo abazalwana baseMpuma Yurophu, abaye bahlelwa zizinto ezibuhlungu ngenxa yemfazwe eUkraine. Abazalwana bancedana njani njengokuba kusiliwa phaya? Izinto ezenziweyo zibancede njani abazalwana baseUkraine?

Bekudingeka Ntoni? Isiwe Njani Kubazalwana Noodade?

Nge-24 kaFebruwari 2022, kwaqalisa imfazwe eUkraine. Kwangaloo mini, iKomiti Yabanxibelelanisi yachaza imali eyayiza kusetyenziswa ukuze kuncedwe abazalwana bethu abaseUkraine. Isebe laseUkraine laqalisa ukuthenga izinto, laza lazisa kubazalwana, lisebenzisa iiKomiti Zokunceda Abantu Abehlelwe Yintlekele eziyi-27.

Njengoko iSebe laseUkraine lalinceda, abazalwana bakwiKomkhulu Lehlabathi LamaNgqina KaYehova bazama iindlela zokuncedisana neli sebe. IKomiti Yabanxibelelanisi neyokuPapasha yeQumrhu Elilawulayo zacela iSebe Lokuthenga Lasehlabathini Lonke, ukuba lisebenzisane neofisi yesebe yaseUkraine neyasePoland ukuze kugqitywe ukuba kungenziwa ntoni ukuze kuncedwe. Abazalwana abakwiSebe Lokuthenga, lokuhambisa izinto, nabakwezomthetho kumasebe, babedibana yonke imihla nomzalwana okwiKomiti yesebe laseUkraine, nabakwiSebe Lokuthenga Lasehlabathini Lonke ukuze bancedisane.

UJay Swinney okwiSebe Lokuthenga Lasehlabathini Lonke uthi, “Okokuqala, sasidinga ukwazi ukuba kudingeka ntoni. Sasifuna ukunika abazalwana ukutya nezinto zokucoca abaziqhelileyo. Kodwa, ukwazi izinto abazidingayo kwakungathethi ukuba sigqibile. Kwakufuneka sazi nokuba siza kuzisa njani eUkraine ngokukhawuleza, kuze kungonzakali mntu nangona kukho imfazwe.”

Nge-9 kaMatshi 2022, abazalwana babesazi ukuba ziintoni abazidingayo abazalwana noodade baseUkraine. Babeza kuphathelwa iibhokisi zokutya, njengenyama nentlanzi esetotini, irice, iimbotyi, kunye nezinto zokucoca ezifana nesepha kunye netoilet paper. Ngelo xesha, kwakuqikelelwa ukuba izinto eziza kusetyenziswa ngumntu omnye ngenyanga ziyi-R1 100. Kuba iKomiti Yabanxibelelanisi yayiqonda ukuba baninzi abazalwana abaza kudinga ezi zinto, yagqiba ngemali eza kusetyenziswa ukuze bancedwe. Kodwa ezi zinto zaziza kusiwa njani kwabo bazidingayo ngaphandle kokufaka abazalwana engozini?

Nge-13 kaMatshi, abazalwana ababini basuka kwiofisi yesebe lasePoland besisa izinto kwindawo ekugcinwa kuyo izinto ekufuphi naseLviv, eseUkraine, ukuze bajonge ukuba zinokuhambiseka na. Kwiintsuku ezimbalwa ngaphambi kokuba bahambe, abazalwana bakwisebe lasePoland naseUkraine babanceda ukuze balungiselele uhambo lwabo. Isebe lagcwalisa amaphepha asemthethweni ababewadinga ukuze badlule kwibhoda kuba beyokunceda abantu. Laza laqinisekisa ukuba neemoto ziyabonakala ukuba ziyokunceda abantu. Enye into lasebenzisana nabazalwana baseUkraine ukuze kubonwe ukuba yeyiphi eyona ndlela iza kuba mfutshane. Ngenxa yokuncedwa nguYehova nokuba belungiselele kakuhle, izinto zokunceda zakwazi ukunikwa iiKomiti Zokunceda Abantu Abehlelwe Yintlekele kungekapheli nosuku zifikile eLviv, baza abazalwana bethu babuyela ePoland.

Kuhambo lwabo lokuqala abazalwana bakwazi ukuhambisa izinto zoncedo ezingaphantsi kwetoni nje enye. Kodwa kwakusadingeka iitoni eziyi-200! Izinto ezininzi kangaka zaziza kuhanjiswa zize zifike njani kubazalwana ngokukhawuleza?

“Abantu Bakho Baza Kuzinikela Ngokuvumayo”

Emva kokuba abazalwana basemhlabeni wonke befunde iingxelo zezinto ezehlele abazalwana bethu abaseUkraine ku-jw.org, bafuna ukunceda. Abaninzi abahlala kwiindawo ezikude banikela ngemali kumsebenzi wamaNgqina kaYehova wasehlabathini lonke, bengathandabuzi ukuba iminikelo yabo iza kusetyenziswa kakuhle. Kanti abo bahlala kumazwe akufutshane bancama ixesha, amandla, kunye nezinto zabo ukuze bancede. Khawuve nje le mizekelo imbalwa.

EPoland, amavolontiya ayedibanisa izinto ezininzi zokunceda ibe abantwana bona bezoba amakhadi. Omnye umzalwana okwiSebe Lokuthenga ePoland uBartosz Kościelniak uthi: “Kudala ndayifunda iNdumiso 110:3 ethetha ngokuba abantu bakaYehova ‘baza kuzinikela ngokuvumayo.’ Kodwa ngoku ndizibonele ngokwam indlela abancedana ngayo abazalwana noodade. Kufike amavolontiya amaninzi ngokukhawuleza ekulungele ukwenza nantoni na ukuze ancede. Loo nto indibonise indlela ayinyani ngayo la mazwi eNdumiso.”

Omnye umzalwana oliNgqina likaYehova onenkampani enkulu ekumazwe ngamazwe wasinika iitrakhi zakhe, zinepetrol eyaneleyo eyayiza kudingeka. Uthi: “Kum, eli ibilithuba lokubonisa abazalwana indlela endibathanda ngayo nendimthanda ngayo uYehova. Ndivuya kakhulu kuba ndikwazile ukunceda.” Kuqikelelwa ukuba kwanikelwa ngeelitha zepetrol ezingaphezu kweziyi-7 700, ibe abazalwana basebenzisa ixesha namandla abo ukuze bahambise izinto, beqhuba iikhilomitha eziphantse zibeyi-48 000!

Abazalwana noodade babezimisele kulo msebenzi, kuba kwintsuku nje eziyi-15 emva kokuba kuhanjiswe izinto okokuqala, nge-28 kaMatshi, kwakusele kuhanjiswe ukutya, izinto zokucoca, nezonyango ezizitoni eziyi-100 eUkraine! Ibe kuba abazalwana noodade banikela ngezinto ezininzi, zange sisebenzise mali ininzi ukuze sincede abazalwana bethu. Ukuza kutsho ngoku, amaNgqina kaYehova sele ethumele iitoni ezingaphezu kweziyi-190 zezinto zokunceda eUkraine. Ezi zinto zibancede njani abazalwana noodade?

“Baluvile Uthando Lwenu!”

Emva kokuba ezi zinto zifikile eLviv, iKomiti Yokunceda Abo Behlelwe Yintlekele iye yahambisa izinto kubantu abazidingayo eUkraine. Ziye zasiwa kwizixeko ezahlukeneyo, nakwiindawo ezikude ngeekhilomitha eziyi-1 300 eLviv. Nangona lo msebenzi wenziwe kakuhle, uthathe ixesha.a

Umzalwana okwiKomiti yeSebe laseUkraine, uMarkus Reinhardt, uthi: “Kweli xesha lobunzima, abazalwana abaninzi bayibone kakuhle indlela uYehova abathanda ngayo. Babone nendlela ekunceda ngayo ukuthobela imiyalelo esuka kwintlangano yakhe nangaphambi kokuba kwenzeke intlekele. Ngokomzekelo, kukhuthazwa ukuba wonke umntu ekhayeni lakhe abe nokutya okunokusetyenziswa iiveki eziliqela kunye namanzi. Omnye umdala ekuthiwa nguAnton okhonza eKyiv, uthe xa ethetha ngalo myalelo: ‘Intlangano kaYehova isincede salungiselela iimeko ezinzima, ibe siyabulela kakhulu ngaloo nto. Ukuba nokutya, amanzi, kunye nerediyo kusindise ubomi bethu.’ Sivuya kakhulu kuba abazalwana bewuthobele lo myalelo kuba batsho banezinto abazidingayo xa intlangano ibisalungiselela ukubathumelela nezinye izinto zoncedo.”

Abazalwana baye baziva njani xa befumana izinto abazidingayo? UMykola noZinaida abahlala eKharkiv, bathi: “Isichukumise kakhulu indlela enisikhathalele ngayo. Enkosi kakhulu ngokutya nezinto zonyango. Sibone ngokucacileyo ukuba uYehova usihoyile.” UValentyna ohlala apho yena uthi: “Xa bekuqala imfazwe, abantu bebelinda ixesha elide xa bezama ukuyothenga ukutya. Zazingafumaneki nanini na izinto ezidingekayo. Kodwa yena uYehova ebesazi ibe uyibonile le ngxaki. Wakhetha abazalwana abaza kuza noncedo emakhayeni ethu, bephethe kanye ezi zinto sizidingayo! Xa kunzima, kubonakala ngathi akukho themba, uyibona kakuhle indlela uYehova akukhathalele ngayo nentlangano yakhe. . . . Kuvuyisa kakhulu ukufumana uncedo lwakhe ngexesha kanye oludinga ngalo uze uve nendlela uYehova akuxhasa ngayo.”

UYevhen, uIryna, noMykyta abasuka eMariupol bathi: “Siyixabisa kakhulu indlela enisikhathalela nenisixhasa ngayo njengentsapho. Asixoki xa sisithi uncedo lwenu silufumene kanye ngexesha ebesiludinga ngalo. Yazi, ekuqaleni besicinga ukuba kukho izinto nje kuphela kwezi bhokisi bezifika, kodwa sithe xa sizivula saluva uthando lwenu!”

Siqinisekile ukuba nawe uyabona ukuba uYehova usebenzise umoya wakhe, ekhokela abantu bakhe ukuze bahambise izinto zoncedo ‘ngexesha lemfazwe.’ Enkosi ngokwenza iminikelo kumsebenzi wasehlabathini lonke kudonate.jw.org. Iye yaluncedo kakhulu. Siyakubulela ngobubele bakho!

Ukunceda Abazalwana Ngokukhawuleza Nangendlela Ekhuselekileyo

1. 

   NgoFebruwari 24, 2022: IKomiti Yabanxibelelanisi yavuma ukuba kusetyenziswe imali ethile ukuze kuncedwe abazalwana baseUkraine, ibe isebe lakwazi ukuqalisa ukwenza amalungiselelo

2. 

   NgoFebruwari 24–Matshi 8, 2022: Isebe laseUkraine lathenga izinto lazisa kwiiKomiti Zokunceda Abantu Abehlelwe Yintlekele, ukuze zithunyelwe kubazalwana abazidingayo. Le ofisi yesebe yalungiselela nokufumana izinto ezisuka ePoland ukuze nazo zihanjiswe

3. 

   NgoMatshi 9, 2022: IKomiti Yabanxibelelanisi yavuma ukuba kuthunyelwe izinto zokunceda eUkraine

4. 

   NgoMatshi 10–12, 2022: Kwenziwa amalungiselelo okuba kuhanjiswe ukutya nezinto ezidingekayo ezisuka ePoland zisiya eLviv, eUkraine

5. 

   NgoMatshi 13, 2022: Ukutya nezinto ezidingekayo ezisuka ePoland zathunyelwa eLviv, eUkraine

6. 

   NgoMatshi 14–16, 2022: KwiHolo yeNdibano engasePoznan, ePoland, amavolontiya esebe lokwakha lasekuhlaleni ancedisa ukuze kudityaniswe ukutya nezinto zokucoca

7. 

   NgoMatshi 17, 2022: Emva kweentsuku ezine kwathunyelwa izinto okokuqala, abazalwana baphinda bahambisa iitoni eziyi-13 besiya kwibhoda yaseUkraine

8. 

   NgoMatshi 21–27, 2022: NasePoland kwenziwa ngokufanayo, kwadityaniswa izinto zokunceda zaza zathunyelwa eUkraine. Emva koko zasiwa ebantwini kungekapheli neeyure eziyi-24

9. 

   NgoMatshi 28, 2022: Kwiintsuku nje eziyi-20 emva kokuba kuvunyiwe ukuba kungathunyelwa izinto, kwakusele kuthunyelwe ukutya, izinto zokucoca, nezonyango ezizitoni eziyi-100 eUkraine

Ukuza kutsho ngoku, sele kuthunyelwe izinto zoncedo ezizitoni eziyi-190 eUkraine.