Abantu Abangevayo Abalityelwanga

UYehova uThixo ufuna bonke abantu bafunde ngoBukumkani bakhe, kungakhathaliseki ukuba baneziphi iingxaki. (1 Timoti 2:3, 4) Ngenxa yaloo nto, amaNgqina kaYehova enzela abantu abaninzi iiBhayibhile nezinto zokufunda kuquka nabantu abangevayo. Kangangokuba, intlangano iye yenza iividiyo ezininzi zabantu abangevayoa ezifumaneka ngeelwimi ezingaphezu kweziyi-100! Sizenza njani ezi vidiyo? Ibe abantu bazifumana njani? Ziintoni esiye saziphucula?

Zenziwa Njani Iividiyo Zentetho Yezandla?

Iividiyo zentetho yezandla zenziwa ngamaqela abaguquleli emhlabeni wonke. Abantu abakula maqela baye bazame ukuyiqonda kakuhle into abaza kuyiguqulela. Emva koko, baye bagqibe ukuba banokuyibeka njani loo nto ngentetho yezandla. Xa begqibile bayayirekhoda. Ngoku, kukho amaqela ayi-60 asoloko eguqulela izinto zeBhayibhile ngentetho yezandla aze ayi-40 asebenze ngamaxesha athile.

Kudala, kwakuduru ukwenza iividiyo zentetho yezandla. Iikhamera zokwenza ividiyo zazibiza imali eninzi kunanamhlanje. Kwakufuneka sakhe iindawo zokurekhodela okanye silungise izakhiwo esezikhona ukuze sikwazi ukwenza ezi vidiyo. Kwakufuneka imali engaphezu kwe-R515 000 ukuze kube khona yonke into edingwa liqela labaguquleli bentetho yezandla.

Ukuze isetyenziswe kakuhle iminikelo, intlangano iye yasebenza nzima ukuze iphucule umsebenzi wokuguqulela ubelula. Ngenxa yaloo nto sisebenzisa izinto zangoku ekulula ukuzisebenzisa nezingaduriyo. Endaweni yokuba abaguquleli baye kwindawo ekurekhodelwa kuyo, bavele baxhome ilaphu eligreen emva kwabo baze barekhode iividiyo. Xa kudingwa abantu abaninzi abaza kwenza intetho yezandla, abazalwana noodade bayakwazi ukuzirekhoda besemakhayeni abo okanye kwiiofisi zabo. Akunyanzelekanga ukuba baye kwindawo ekurekhodelwa kuzo.

Senze neApp eza kunceda abantu abenza intetho yezandla kumsebenzi wabo. Loo nto incede kwasetyenziswa ixesha elincinci ngehafu kunelo belisetyenziswa ngabaguquleli ukuze kwenziwe ezi vidiyo ekuqaleni. Abazalwana bethu bayivuyele kakhulu le nto. Omnye umzalwana ekuthwa nguAlexander uthi: “Iividiyo zentetho yezandla ziphuma kakhulu ngoku kunakuqala. Iyandivuyisa kakhulu loo nto, ibe ndizibukela yonke imihla.”

Ngoku, ukuze sithenge izinto ezidingwa liqela labaguquleli, siye sasebenzisa imali engaphantsi kwe-R86 000. Ngenxa yaloo nto, siye sakwazi ukukhupha iividiyo zentetho yezandla ngeelwimi ezininzi.

Abantu Bazifumana Njani Iividiyo Zentetho Yezandla?

Xa abaguquleli begqiba ukurekhoda iividiyo, kufuneka abantu bazifumane. Kudala sasizenza ikhaseti neDVD, kodwa le ndlela yayidura, isitya ixesha, ibe ingumsebenzi omninzi. Ezi zinto zirekhodiweyo zazithunyelwa kwenye inkampani ukuze zenziwe zibe ninzi. Emva koko, ezi khaseti zeevidiyo neeDVD zazisiwa emabandleni. Ngo-2013, saye sasebenzisa imali engaphezu kwe-R34 000 000 ukuze senze iiDVD zentetho yezandla.

Abantu abangevayo babezithanda kakhulu ezi zinto. Njengoko ayesiya esiba maninzi lamakhaseti neDVD, kwakuba nzima usebenzisa ezo vidiyo. Ngamanye amaxesha kwakudingeka iiDVD ezininzi ukuze kurekhodwe incwadi yeBhayibhile enye nje qha. Omnye umzalwana waseBrazil ekuthiwa nguGilnei uthi: “Qho xa sifuna ukufunda isibhalo, kwakufuneka siqale sikhangele ukuba sikweyiphi ikhaseti, kwakunzima kakhulu.” Omnye udade yena ekuthiwa nguRafayane, owayedla ngokusebenzisa iiDVD zentetho yezandla uthi: “Kwakungumsebenzi ukwenza ufundisiso lobuqu, ixesha elininzi sasikhangela izibhalo okanye imbekiselo.” Xa abazalwana nodade beyokushumayela babedla ngohamba neDVD okanye ikhaseti baze bacele ukuzidlala kwiTV yomntu onomdla. Abanye abazalwana babedla ngokuhamba nezabo izinto zokudlala iDVD. Kodwa kwathi kungekagqithi ixesha elide kwakho izinto zokudlala iDVD ezingathi yithablethi ibe abazalwana abaninzi basebenzisa zona. UBobby ohlala eUnited States, yena uthi: “Ukuba emva kokuba ubonise umntu othetha naye isibhalo uze ufune umbonise esinye kwakufuneka ufake enye iDVD. Le nto yayisityela ixesha ibe isenza kube nzima ukusebenzisa iBhayibhile xa sishumayela.”

Ngo-2013, intlangano iye yakhupha iApp yentetho yezandla, eyanceda abazalwana noodade bakwazi ukudawunlowuda iividiyo zentetho yezandla kwifowuni okanye kwiithablethi zabo. Le App yaqale yabakho ngentetho yezandla yaseMerika, kwaza kwafakwa nezinye iilwimi ngo-2017. Abazalwana noodade emhlabeni wonke bavuya kakhulu. Nomnye umzalwana waseBrazil uJuscelino uthi: “Ndandingayikholelwa le nto, ndandingayeki ukucinga ngendlela iQumrhu Elilawulayo elisithanda ngayo thina bantu bangevayo nokuba lufuna nolwethu ukholo luqine njengabantu abakwaziyo ukuthetha. Ndandivuya gqitha kuba leApp yandinceda ndakwazi ukufundisisa iBhayibhile.”

Namhlanje kwenziwa iividiyo zentetho yezandla zize zifakwe kwiwebhsaythi nakwiApp yentetho yezandla. Ngenxa yaloo nto iividiyo zentetho yezandla ziyakwazi ukuguqulelwa, zirekhodwe zize zisasazwe kwintsuku nje ezimbalwa kunokuba zithathe iinyanga okanye iminyaka. Kangangokuba iividiyo zentetho yezandla ezininzi ziye ziphume ngexesha elinye nezo zelwimi ezithethwayo.

Khawuve ukuba bathini abanye abazalwana noodade wethu abangevayo. Udade ekuthiwa nguKlízia uthi: “Ungayifumana phi intlangano ebakhathalele kangaka abantu abangevayo ide isebenze nzima ukuze isinike izinto eziqinisa ukholo ngendlela elula? Ayikho into eyodlula into esiyenzelwa yintlangano kaYehova.” UVladimir uthi: “Ezi vidiyo zindibonisa ukuba uYehova usikhathalele ngendlela efanayo thina bantu bangevayo nabevayo.”

Iividiyo zethu zentetho yezandla zidla ngokuba nento ethi: “Le yenye yeencwadi ezisetyenziswa kumsebenzi wokufundisa ngeBhayibhile ehlabathini lonke oxhaswa ngeminikelo yokuzithandela.” Enkosi ngeminikelo yakho ethunyelwe ngeendlela ezahlukahlukeneyo eziku-donate.jw.org. Le minikelo isinceda senze iiBhayibhile nezinto ezinceda ekuyifundiseni sizenzela bonke abantu kuquka nabo bentetho yezandla.